Ախտանիշներ - Ջրծաղիկ

Ջրծաղիկի ամենաբնորոշ նշանը քոր հարուցող բշտիկային ցանավորումն է, որն ի հայտ է գալիս վարակվելուց 10-21 օր անց և սովորաբար տևում է 5-10 օր:

Ջրծաղիկի ցանը կարող է հայտնվել մարմնի տարբեր մասերում՝ դեմքին, կրծքավանդակին, ազդրերին և որովայնին, սակայն խիստ բնորոշ է այն, որ ցանավորումը, որպես կանոն, լինում է նաև գլխի մազածածկ մասում։

Այլ ախտանիշները կարող են ի հայտ գալ ցանավորումից 1-2 օր առաջ՝

• ջերմություն
• ախորժակի կորուստ
• գլխացավ
• հոգնածություն և ընդհանուր ինքնազգացողության վատացում:

Հայտնվելուց հետո ջրծաղիկի ցանն անցնում է հետևյալ երեք փուլերը՝

• մաշկից բարձրացած վարդագույն կամ կարմիր հանգույցիկներ (պապուլաներ), որոնք բռնկվում են մի քանի օրվա ընթացքում
• հեղուկով լցված փոքր բշտիկներ (վեզիկուլաներ), որոնք ձևավորվում են մոտ մեկ օրվա ընթացքում, որից հետո պատռվում և դատարկվում
• գորշագույն կեղևներ, որոնք առաջանում են պատռված և արագ չորացած բշտերի տեղում և շերտազատվում ու անհետևանք մաքրվում ևս մի քանի օրից մինչև է 1-3 շաբաթվա ընթացքում (եթե երկրորդային բակտերիալ վարակ չի միացել):

Նոր հանգույցիկները շարունակվում են ի հայտ գալ մի քանի օրվա ընթացքում, ուստի կարող եք միաժամանակ տեսնել ցանի բոլոր երեք տեսակները՝ հանգույցիկներ, բշտիկներ և կեղևներ: Ցանային նման ալիքները միջին հաշվով լինում են 3-4 անգամ։

Ջրծաղիկով հիվանդը կարող է այլ մարդկանց վիրուս փոխանցել մինչև ցանավորումումը 48 ժամ առաջ և մնալ վարակիչ մինչև բոլոր պատռված բշտերի կեղևակալումը:

Առողջ երեխաների շրջանում հիվանդությունն ունի թեթև ընթացք: Ծանր դեպքերում ցանավորումը պատում է ամբողջ մարմինը և կարող է ի հայտ գալ նաև ըմպանում, աչքերում և միզուկի, հետանցքի կամ հեշտոցի լորձաթաղանթներում:

Ե՞րբ դիմել բժշկին

Եթե կարծում եք, որ դուք կամ երեխան ունեք ջրծաղիկ, կապ հաստատեք ձեր բժշկի հետ: Ջրծաղիկի ախտորոշումը սովորաբար մեծ դժվարություն չի ներկայացնում, սակայն բժիշկը նաև կարող է խորհուրդ տալ դեղամիջոցներ, որոնք մեղմացնում են հիվանդության ընթացքը և անհրաժեշտության դեպքում բուժում բարդությունները: Այլ մարդկանց չվարակելու համար խիստ կարևոր է մեկուսացումը մինչև մաշկային ցանի կեղևների վերջնական անհետացումը:

Տեղեկացրեք ձեր բժշկին, եթե՝

• առաջացել է ցան մեկ կամ երկու աչքերում
• ցանը խիստ կարմրած, տաք կամ լարված է, որը կարող է վկայել երկրորդային վարակի մասին
• ցանավորումն ուղեկցվում է գլխապտույտով, ապակողմնորոշմամբ, արագացած սրտխփոցով, շնչարգելությամբ, դողով, մկանային կորդինացիայի կորստով, վատթարացող հազով, փսխումներով, պարանոցի կարկամությամբ կամ 38.9 °C գերազանցող տենդով
• ընտանիքում ունեք իմունային համակարգի խնդիրներով անձ կամ 6 ամսականից փոքր երեխա: