Գրադարան
Քրոնիկ հազ. բուժում
2 րոպե
Արդյունավետ բուժման համար վճռորոշ նշանակություն ունի քրոնիկ հազի պատճառի որոշումը:
Շատ դեպքերում, մեկից ավելի հիմնական հիվանդությունները կարող են առաջացնել ձեր քրոնիկ հազը:
Եթե դուք ներկայում ծխում եք, ձեր բժիշկը ձեզ հետ կքննարկի ծխելը թողնելու ձեր պատրաստակամությունը և օգնություն ցույց կտա այս նպատակին հասնելու համար:
Եթե դուք ընդունում եք ԱՓՖ արգելակիչ դեղամիջոց, ձեր բժիշկը կարող է փոխարինել մեկ այլ դեղամիջոցով, որը չունի հազ առաջացնելու կողմնակի ազդեցություն:
Քրոնիկ հազի բուժման համար օգտագործվող դեղամիջոցները կարող են ներառել հետևյալը:
- Հակահիստամինայիններ, կորտիկոստերոիդներ և դեկոնգեստանտներ. այս դեղերը համարվում են ալերգիայի և հետքթային հոսքի ստանդարտ բուժումներ:
- Ասթմայի ինհալացիոն դեղամիջոցներ. ասթմայով պայմանավորված հազի ամենաարդյունավետ միջոցները կորտիկոստերոիդները և բրոնխոլայնիչներն են (բրոնխոդիլատատորներ), որոնք նվազեցնում են բորբոքումը և բացում ձեր շնչուղիները:
- Հակաբիոտիկներ. եթե քրոնիկ հազի պատճառը բակտերիալ, սնկիկային կամ միկոբակտերիալ վարակներն են, ձեր բժիշկը կարող է դեղամիջոցներ նշանակել վարակը վերացնելու համար:
- Թթվի պաշարիչներ. եթե ապրելակերպի փոփոխությունները չեն օգնում թթվային ռեֆլյուքսի վերացմանը, դուք կարող եք բուժվել դեղամիջոցներով, որոնք արգելափակում են թթվի արտադրությունը: Որոշ մարդիկ վիրահատության կարիք ունեն՝ խնդիրը լուծելու համար:
Հազը ճնշող (հակահազային) դեղամիջոցներ
Այն ժամանակահատվածում, երբ ձեր բժիշկը որոշում է ձեր հազի պատճառը և սկսում է բուժումը, նա կարող է նաև նշանակել հազը ճնշող դեղամիջոց՝ փորձելով արագացնել ձեր ախտանիշների թեթևացումը:
Դեղատոմս չպահանջող հազի և մրսածության դեղամիջոցները նախատեսված են ոչ թե հիմնական հիվանդության, այլ միայն հազի և մրսածության ախտանիշները բուժելու համար: Հետազոտությունները ցույց են տալիս, որ ապացուցված չէ, որ այս դեղամիջոցներն ավելի լավ են ազդում, քան ոչ ակտիվ դեղամիջոցները (պլացեբո): Ավելի կարևոր է, որ այս դեղամիջոցներն ունեն հնարավոր լուրջ կողմնակի ազդեցություններ, ներառյալ մահացու գերդոզավորումները 2 տարեկանից փոքր երեխաների մոտ:
6 տարեկանից փոքր երեխաների հազի և մրսածության բուժման համար մի՛ օգտագործեք դեղատոմս չպահանջող դեղեր, բացառությամբ ջերմիջեցնողների և ցավազրկողների: Մտածեք նաև այս դեղամիջոցների օգտագործումից խուսափելու մասին 12 տարեկանից փոքր երեխաների համար:
Հոդվածը տեղադրվել է՝ 12-05-2021 վերանայվել է՝ 08-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
