Գրադարան

Լյարդի ցիռոզ. բարդություններ

Լյարդի ցիռոզ. բարդություններ

Time Read 2 րոպե

Լյարդի ցիռոզը կարող է բարդանալ տարբեր ծանր առողջական խնդիրներով, որոնց մի մասը պահանջում է անհետաձգելի բուժօգնություն:

  • Լյարդը սնուցող երակներում բարձր արյան ճնշում. այս վիճակը հայտնի է որպես պորտալ հիպերտենզիա: Ցիռոզը դանդաղեցնում է արյան կանոնավոր հոսքը լյարդով: Սա մեծացնում է ճնշումն այն երակում, որը արյուն է բերում լյարդ (դռներակ կամ պորտալ երակ):
  • Ոտքերի և որովայնի այտուցվածություն. դռներակում ավելացած ճնշումը կարող է հանգեցնել հեղուկի կուտակմանը ոտքերում, որը կոչվում է օդեմա, իսկ որովայնի խոռոչում՝ ասցիտ: Օդեմա և ասցիտ նաև կարող են առաջանալ, եթե լյարդը չի կարողանում բավարար քանակությամբ արյան որոշակի սպիտակուցներ արտադրել, ինչպիսին է ալբումինը:
  • Փայծաղի մեծացում. պորտալ հիպերտենզիան կարող է հանգեցնել փայծաղում արյան սպիտակ բջիջների (լեյկոցիտների) և թիթեղիկների (թրոմբոցիտներ) թակարդում և պահում: Սա հանգեցնում է փայծաղի այտուցման, որը հայտնի է որպես սպլենոմեգալիա: Ձեր արյան մեջ լեյկոցիտների և թրոմբոցիտների քչացումը կարող է լինել ցիռոզի առաջին նշանը:
  • Արյունահոսություն. պորտալ հիպերտոնիան կարող է հանգեցնել արյան վերաուղղման դեպի փոքր երակներ: Լրացուցիչ ճնշումից լարված այս փոքր երակները կարող են պատռվել՝ առաջացնելով ծանր արյունահոսություն: Պորտալ հիպերտենզիան նաև կարող է առաջացնել լայնացած կերակրափողի կամ ստամոքսի երակներ, որոնք կոչվում են վարիկոզներ: Այս վարկիոզները նույնպես կարող են հանգեցնել կյանքին սպառնացող արյունահոսության: Եթե լյարդը չի կարող արտադրել բավարար մակարդման գործոններ, դա նույնպես կարող է նպաստել արյունահոսության շարունակմանը:
  • Վարակներ. եթե ցիռոզ ունեք, ձեր օրգանիզմը կարող է դժվարությամբ պայքարել վարակների դեմ: Ասցիտը կարող է հանգեցնել բակտերիալ պերիտոնիտի՝ ծանր վարակի:
  • Թերսնուցում. ցիռոզը կարող է դժվարացնել ձեր մարմնի համար սննդանյութերի յուրացումը, ինչը հանգեցնում է թուլության և քաշի կորստի:
  • Գլխուղեղում թույների (տոքսինների) կուտակում. ցիրոզից վնասված լյարդը չի կարող արյունից մաքրել թույները, ինչպես առողջ լյարդը: Այդ թույներն այնուհետև կարող են կուտակվել գլխուղեղում և առաջացնել շփոթվածություն և կենտրոնանալու դժվարություն: Սա հայտնի է որպես լյարդային էնցեֆալոպաթիա: Ժամանակի ընթացքում լյարդային էնցեֆալոպաթիան կարող է անցնել գիտակցության կորստի կամ կոմայի:
  • Դեղնուկ. դեղնուկը զարգանում է այն ժամանակ, երբ հիվանդ լյարդը ձեր արյունից չի հեռացնում բավականաչափ բիլիռուբին` արյան թափոնային նյութ: Դեղնուկն առաջացնում է մաշկի և աչքերի սպիտակենու դեղնացում և մեզի մգացում։
  • Ոսկրային հիվանդություն. ցիռոզով հիվանդ որոշ մարդիկ կորցնում են ոսկորների ամրությունը և կոտրվածքների ավելի մեծ ռիսկի տակ են:
  • Լյարդի քաղցկեղի ռիսկի բարձրացում. մարդկանց մեծ մասը, ում մոտ առաջանում է լյարդի քաղցկեղ, նախկինում ունեցել է ցիռոզ:
  • Սուր-քրոնիկ ցիռոզ. որոշ մարդիկ մահանում են բազմաօրգանական անբավարարությունից: Այժմ հետազոտողները կարծում են, որ սա բարդություն է որոշ մարդկանց մոտ, ովքեր ունեն ցիռոզ: Այնուամենայնիվ, նրանք լիովին չեն հասկանում, թե ինչն է դա առաջացնում:

Հոդվածը տեղադրվել է՝ 20-05-2021 վերանայվել է՝ 07-11-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով