Լյարդի ցիռոզ. բուժում

2 րոպե

Ցիռոզի բուժումը կախված է ձեր լյարդի վնասման պատճառից և չափից:

Բուժման նպատակներն են դանդաղեցնել սպիական հյուսվածքի տարածումը լյարդում և կանխել կամ բուժել ցիռոզի ախտանիշներն ու բարդությունները: Ձեզ կարող է անհրաժեշտ լինել հոսպիտալացում, եթե ունեք լյարդի ծանր ախտահարում:

Ցիռոզի պատճառների բուժում

Վաղ ցիռոզի ժամանակ հնարավոր է նվազագույնի հասցնել լյարդի վնասը՝ բուժելով հիմքում ընկած պատճառը: Ընտրանքները ներառում են հետևյալը:

• Ալկոհոլային կախվածության բուժում. ալկոհոլի չափից ավելի օգտագործման հետևանքով առաջացած ցիռոզ ունեցող մարդիկ պետք է փորձեն դադարեցնել խմելը: Եթե ալկոհոլի օգտագործումը դադարեցնելը դժվար է, ձեր բժիշկը կարող է խորհուրդ տալ ալկոհոլային կախվածության բուժման ծրագիր: Եթե դուք ցիռոզ ունեք, շատ կարևոր է դադարեցնել խմելը, քանի որ ցանկացած քանակությամբ ալկոհոլը թունավոր է ձեր լյարդի համար:
• Քաշի կորուստ. ոչ ալկոհոլային ճարպային լյարդային հիվանդության հետևանքով առաջացած ցիռոզով մարդիկ կարող են ավելի առողջ դառնալ, եթե նիհարեն և վերահսկեն արյան շաքարի մակարդակը:
• Հեպատիտը վերահսկող դեղեր. դեղորայքը կարող է սահմանափակել լյարդի բջիջների հետագա վնասը, որն առաջանում է հեպատիտ B կամ C-ով՝ այս վիրուսների հատուկ բուժման միջոցով:
• Ցիռոզի այլ պատճառների և ախտանիշների վերահսկման դեղամիջոցներ. դեղամիջոցները կարող են դանդաղեցնել լյարդի ցիռոզի որոշ տեսակների զարգացումը, օրինակ, վաղ ախտորոշված առաջնային բիլիար ցիռոզի դեպքում: Կան նաև ցիռոզի ախտանիշներից քորը, թուլությունը կամ ցավը մեղմացնող դեղամիջոցներ: Բժիշկը նաև կարող է խորհուրդ տալ սննդային հավելումներ՝ ուղղված ցիռոզի հետ կապված թերսնուցման մեղմացմանը և ոսկրերի թուլացման կանխարգելմանը (օստեոպորոզ):

Ցիռոզի բարդությունների բուժում

Բժիշկը կարող է անցկացնել որոշ միջոցառումներ, որոնց նպատակը ցիռոզի բարդությունների կանխարգելումը կամ բուժումն է:

• Ավելցուկային հեղուկներ. կերակրի աղի սահմանափակումը և դեղամիջոցները, որոնք կանխարգելում են օրգանիզմում հեղուկի կուտակումը, կարող են օգնել ասցիտի և ոտքերի այտուցների մեղմացմանը: Ավելի ծանր դեպքերում կարող է առաջանալ կուտակված հեղուկը դատարկելու կարիք (դրենավորում կամ վիրահատական միջամտություն):
• Պորտալ հիպերտենզիա. արյան ճնշման որոշ դեղամիջոցները կարող են վերահսկելի դարձնել լյարդին արյուն մատակարարող երակներում բարձրացած ճնշումը և կանխարգելել սուր արյունահոսությունը: Բժիշկը կարող է առաջարկել մարսողական խողովակի վերին հատվածների կանոնավոր էնդոսկոպիա, որ գնահատի կերակրափողի և ստանոքսի լայնացած երակների վիճակը, որոնք անտեսվելու դեպքում կարող են արյունահոսել: Վարիկոզ երակների դեպքում բժիշկը նաև կարող է առաջարկել արյունահոսության ռիսկը նվազեցնող դեղամիջոցներ: Նույն կերպ, արյունահոսող կամ արյունահոսության մեծ վտանգով երակների դեպքում անհետաձգելի միջամտությամբ կարող են կապվել այդ երակները, իսկ ծանր դեպքերում տեղադրվի ներլյարդային պորտոսիտեմիկ շունտ:
• Վարակներ. բակտերիալ վարակի առկայության դեպքում բժիշկը նշանակում է հակաբիոտիկներ: Հնարավոր վարակներից պաշտպանվելու համար կարող է առաջանալ գրիպի, թոքաբորբի և հեպատիտների դեմ պատվաստման կարիք: Աշխատեք հեռու մնալ վարակներից՝ պահպանելով անձնական հիգիենայի նորմերը։
• Լյարդի քաղցկեղի բարձրացած ռիսկ. բժիշկը խորհուրդ կտա, որ պարբերաբար հանձնեք արյան թեստեր և անցնեք գերձայնային հետազոտություն, որ հնարավորինս վաղ հայտնաբերվեն լյարդի քաղցկեղի նշանները:
• Լյարդային էնցեֆալոպաթիա. բժիշկը կարող է նշանակել դեղամիջոցներ, որոնք օգնում են լյարդի գործունեության խանգարման պատճառով արյան մեջ կուտակվող նյութափոխանակության թունավոր արգասիքների հեռացմանը:

Լյարդի փոխպատվաստման վիրահատություն

Ցիռոզի ծանր դեպքերում, երբ լյարդի գործունեությունը խոր խանգարված է և զարգացել է լյարդային անբավարարություն, որպես ծայրահեղ բուժում կարող է առաջարկվել լյարդի փոխպատվաստում: