Բուժում - Ցելիակա

Խիստ, ողջ կյանքի ընթացքում առանց գլուտեինի (սնձանի) սննդակարգը ցելիակայի վերահսկման միակ միջոցն է:

Բացի ցորենից, գլուտեին պարունակող մթերքները ներառում են՝

• գարի
• բլղուր
• դուրում
• ֆարինա
• Գրեհեմի ալյուր
• ածիկ
• տարեկան
• սեմոլինա
• սպելտ (ցորենի ձև)
• տրիտիկալե:

Ցելիակիա ունեցող մարդկանց հետ աշխատող դիետոլոգը կարող է օգնել ձեզ, որ կազմեք առանց գլուտեինի առողջ սննդակարգ: Ձեր սննդակարգում պարունակվող գլուտենի նույնիսկ աննշան քանակությունը կարող է վնասակար լինել, նույնիսկ եթե դրանք գանգատներ կամ ախտանիշներ չեն առաջացնում:

Գլուտեինը կարող է թաքնված լինել սննդամթերքի, դեղամիջոցների և ոչ պարենային ապրանքների մեջ, այդ թվում՝

• փոփոխված սննդի օսլա, կոնսերվանտներ և սննդի կայունացուցիչներ
• դեղատոմսով և առանց դեղատոմսի դեղեր
• վիտամինային և միներալային հավելումներ
• բուսական և սննդային հավելումներ
• շրթներկի արտադրանք
• ատամի մածուկ և բերանի ողողման լուծույթներ
• ծրարների և դրոշմանիշների սոսինձ
• խմոր:

Ձեր սննդակարգից գլուտեինիբացառումն աստիճանաբար կնվազեցնի բարակ աղու բորբոքումը, ինչը կբարելավի ձեր ինքնազգացողությունը և, ի վերջո, կօգնի ձեր ապաքինմանը: Երեխաները հակված են ավելի արագ բուժվել, քան չափահասները:

Վիտամինային և միներալային հավելումներ

Եթե ձեր սակավարյունությունը (անեմիան) կամ սննդային անբավարարությունը ծանր են, ձեր բժիշկը կամ դիետոլոգը կարող են խորհուրդ տալ հավելումների օգտագործում, այդ թվում՝

• պղինձ
• ֆոլաթթու
• երկաթ
• վիտամին B12
• վիտամին D
• վիտամին K
• ցինկ:

Վիտամիններն ու հավելումները սովորաբար ընդունվում են հաբերի տեսքով: Եթե ձեր մարսողական խողովակն ունի վիտամինների ներծծման հետ կապված խնդիրներ, ձեր բժիշկը կարող է դրանք նշանակել ներարկման ձևով:

Հետագա խնամք

Կանոնավոր ժամկետներում բժշկական հսկողությունը կարող է օգնել համոզվելու, որ ձեր ախտանիշները արձագանքել են առանց գլուտեինի սննդակարգին: Ձեր բժիշկը կվերահսկի ձեր օրգանիզմի պատասխանը արյան թեստերի միջոցով:

Ցելիակա ունեցող մարդկանց մեծամասնության համար առանց գլուտեինի սննդակարգը թույլ կտա, որ նրանց բարակ աղիները վերականգնվեն: Երեխաների համար դա սովորաբար տևում է երեքից վեց ամիս: Չափահասների դեպքում ամբողջական բուժումը կարող է տևել մի քանի տարի:

Եթե դուք շարունակում եք ախտանիշներ ունենալ կամ եթե ձեր ախտանիշները կրկնվում են, ձեզ կարող է անհրաժեշտ լինել էնդոսկոպիա՝ բիոպսիաներով՝ պարզելու համար, թե արդյոք ձեր աղիներն ապաքինվել են:

Աղիների բորբոքումը վերահսկող դեղամիջոցներ

Եթե ձեր բարակ աղիները խիստ վնասված են կամ ունեք ռեֆրակտեր ցելիակիա, ձեր բժիշկը կարող է խորհուրդ տալ ստերոիդներ՝ բորբոքումը վերահսկելու համար: Ստերոիդները կարող են թեթևացնել ցելիակայի ծանր գանգատներն ու ախտանիշները՝ մինչ աղիները լավանում են:

Կարող են նաև օգտագործվել այլ դեղամիջոցներ, ինչպիսիք են Ազաթիոպրինը (Ազասան, Իմուրան) կամ Բուդեսոնիդ (Էնտոկորտ EC, Ուցերիս):

Հերպեսանման դերմատիտի բուժումը

Եթե դուք ունեք այս մաշկի ցանը, ձեր բժիշկը կարող է խորհուրդ տալ այնպիսի դեղամիջոց, ինչպիսին է Դապսոնը, որն ընդունվում է բերանով, ինչպես առանց գլուտեինի սննդակարգ: Եթե Դապսոն եք ընդունում, ձեզ հարկավոր է կանոնավոր արյան թեստեր՝ կողմնակի ազդեցությունները ստուգելու համար:

Ռեֆրակտեր ցելիակայի բուժումը

Եթե ունեք ռեֆրակտեր ցելիակիա, ձեր բարակ աղին չի ապաքինվի: Ամենայն հավանականությամբ, ձեզ անհրաժեշտ կլինի ստուգվել մասնագիտացված կենտրոնում: Ռեֆրակտեր ցելիական կարող է բավականին ծանր լինել, և ներկայումս ապացուցված բուժում չկա: