Ցելիակա. բուժում

Ցելիակա. բուժում

Ցելիակայի միակ ընդունված բուժումը ողջ կյանքի ընթացքում գլյուտեինից ազատ խիստ սննդակարգն է։

Պատճառն այն է, որ գլյուտեինի (սնձան) նկատմամբ ձեր զգայունությունը երբեք չի վերանում։ Բարակ աղիների գործունեությունը վերականգնելու և, ընդհանուր առմամբ, ձեր առողջությունը պահպանելու միակ ճանապարհը ձեր սննդակարգից գլյուտեինի կտրուկ բացառումն է, նույնիսկ, եթե ձեր ախտանիշները թեթև են։ Եթե ձեր գանգատները անհանգստացնող չեն, դեռ չի նշանակում, որ ձեր հիվանդությունը թեթև է։

Ե՞րբ պետք է սննդակարգից բացառել գլյուտեինը

Դուք պետք է զերծ մնաք գլյուտեին (սնձան) պարունակող սննդատեսակներից, եթե ունեք՝

  • ցելիակա
  • ոչ ցելիակային գլյուտեինի նկատմամբ զգայունություն
  • Դյուրինգի հերպեսանման մաշկաբորբ (dermatitis herpetiformis), որը հազվադեպ հանդիպող մաշկային հիվանդություն է
  • որևէ այլ հիվանդություն, որը պահանջում է գլյուտեին չպարունակող սննդակարգ։

Գլյուտեինից ազատ սննդակարգ

Գլյուտեինից (սնձան) ազատ սննդակարգը ներառում է սննդամթերքների պիտակները կարդալու և մեկնաբանելու հմտությունները։ Կան երկրներ, որտեղ սննդամթերքի պիտակի վրա հատուկ նշված է, որ այն գլյուտեին չի պարունակում։ Վերջինս նշանակում է, որ տվյալ սննդամթերքը չի պարունակում գլյուտեինի, վարսակի կամ ածիկային բաղադրիչների հայտնաբերելի քանակություն։

Նույնը վերաբերվում է նաև ալկոհոլային խմիչքներին։ Կան խմիչքներ, որոնց գլյուտեինը կարող է սրացնել հիվանությունը։

Ո՞ր մթերքներն են գլյուտեինից ազատ

Գլյուտեին չպարունակող ձեր սննդակարգը կարող է ներառել՝

  • մթերքներ, որոնք բնականում գլյուտեին չեն պարունակում, օրինակ՝ թարմ մրգեր և բանջարեղեններ, թարմ միս, ձու, ընկույզներ և լոբազգիներ, կաթ, յուղեր և ձեթեր, ինչպես նաև գլյուտեին չպարունակող հատիկավորներ, օրինակ՝ բրինձ և եգիպտացորեն
  • սննդամթերքներ, որոնք ծագումից անկախ պիտակավորված են որպես «գլյուտեին չպարունակող»
  • սննդամթերքներ, որոնք գլյուտեին չեն պարունակում՝ ելնելով իրենց բաղադրիչների ցանկից։

Բոլոր այն դեպքերում, երբ կասկածներ ունեք կամ վստահ չեք, որ ձեր ընտրած սննդակարգը գլյուտեինից ազատ է, դիմեք դիետոլոգին, ով կարող է՝

  • օգնել, որ դուք կազմեք ձեր սննդակարգի անհատական պլանը
  • ցույց տալ և սովորեցնել, թե ինչպես ճիշտ կարդալ սննդամթերքների պիտակները
  • օգնել, որ ձեր սննդակարգը դառնա հավասարակշռված
  • որոշել, թե արդյոք դուք վիտամինային որևէ հավելման կարիք ունեք։

Հոդվածը վերանայվել է՝ 07-05-2021