Ախտանիշներ - Գրիպ

Սկզբում գրիպը կարող է թվալ սովորական ընդհանուր մրսածություն՝ քթահոսությամբ (հարբուխ), փռշտոցով և կոկորդի ցավով:

Ընդհանուր մրսածությունը կամ, ինչպես անվանում են բժիշկները, սուր շնչառական վիրուսային վարակը (ՍՇՎՎ) սովորաբար դանդաղ է զարգանում։ Սակայն գրիպին ավելի հատուկ է հանկարծակի սկիզբը: Եվ, չնայած մրսածությունը կարող է ուղեկցվել գանգատներով, ձեր ինքնազգացողությունը շատ ավելի վատթարանում է գրիպի դեպքում:

Գրիպի ընդհանուր ախտանիշներից են՝

• ջերմություն
• ցավոտ մկաններ (մարմնի ջարդվածության զգացում)
• դող, սարսուռ և քրտնարտադրություն
• գլխացավ
• չոր և համառ հազ
• շնչարգելություն և հևոց
• հոգնածություն և թուլություն
• քթահոսություն (հարբուխ) կամ փակված քիթ
• կոկորդի ցավ և քերոցի զգացում
• աչքերի ցավ, լուսավախություն և արցունքահոսություն
• փսխում և փորլուծություն, որն ավելի հաճախ է հանդիպում երեխաների մոտ:

Ե՞րբ դիմել բժշկին

Գրիպով հիվանդ մարդկանց մեծամասնությունը կարող է ապաքինվել տանը և հաճախ բժշկին դիմելու կարիք չունի:

Եթե ​​ունեք գրիպի ախտանշաններ և բարդությունների ռիսկի տակ եք, անմիջապես դիմեք ձեր բժշկին: Հակավիրուսային դեղամիջոցների ընդունումը կարող է կրճատել ձեր հիվանդության տևողությունը և օգնել կանխելու ավելի լուրջ խնդիրները:

Եթե ​​ունեք անհետաձգելի բուժօգնություն պահանջող ախտանիշներ, անմիջապես դիմեք բուժօգնության: Չափահասների համար անհետաձգելի ախտանիշները կարող են ներառել՝

• դժվարաշնչություն կամ հևոց
• կրծքավանդակի ցավ
• մշտական գլխապտույտ
• ցնցումներ
• առկա առողջական խնդիրների վատթարացում
• ուժեղ թուլություն կամ մկանային ցավ:

Երեխաների մոտ անհետաձգելի բուժօգնություն պահանջող ախտանիշները կարող են ներառել`

• դժվարաշնչություն կամ հևոց
• գունատ, մոխրագույն կամ կապտավուն մաշկ, շուրթեր կամ եղունգների ծայրեր՝ կախված մաշկի գույնից
• կրծքավանդակի ցավ
• ջրազրկում
• ուժեղ մկանային ցավեր
• ցնցումներ
• առկա առողջական խնդիրների վատթարացում: