Ախտանիշներ - ԹՔՕՀ

Թոքերի քրոնիկ օբստրուկտիվ հիվանդության (ԹՔՕՀ) ախտանիշները հաճախ բացակայում են, քանի դեռ թոքերի զգալի վնասում չի զարգացել:

Այնուամենայնիվ, ինչ-որ մի ժամանակ ի հայտ գալով, ԹՔՕՀ ախտանիշները սովորաբար ժամանակի ընթացքում վատթարանում են, հատկապես, եթե ծխախոտի ծխի և մյուս ռիսկի գործոնների ազդեցությունը շարունակվում է:

ԹՔՕՀ-ի հնարավոր գանգատներից և ախտանիշներից են՝

• շնչարգելություն և հևոց, հատկապես՝ ֆիզիկական գործ անելիս
• շնչառական խզզոցներ
• կրծքավանդակի լարվածության զգացում
• քրոնիկ հազ, որը կարող է լինել թափանցիկ, սպիտակ, դեղնավուն կամ կանաչավուն խորխարտադրությամբ
• հաճախակի շնչառական վարակներ
• հոգնածություն և աշխատունակության անկում
• ուշ փուլերում՝ քաշի կորուստ, ոտնաթաթերի կամ սրունքների այտուց:

ԹՔՕՀ-ով մարդկանց մոտ ժամանակ առ ժամանակ կարող են ի հայտ գալ սրացումների դրվագներ, երբ ախտանիշները սովորականից ավելի են ծանրանում՝ շարունակվելով առնվազն մի քանի օր:

Ե՞րբ դիմել բժշկին

Խոսեք ձեր բժշկի հետ, եթե ձեր ախտանիշները չեն բարելավվում բուժման ընթացքում կամ վատթարանում են, կամ եթե նկատում եք վարակի ախտանիշներ, ինչպիսիք են ջերմությունը կամ խորխի բնույթի կամ գույնի փոփոխությունները:

Դիմեք անհետաձգելի բուժօգնության, եթե չեք կարողանում շունչ քաշել, ունեք շրթունքների կամ եղունգների շերտի ուժեղ կապտություն (ցիանոզ) կամ արագացած սրտազարկ (տախիկարդիա) կամ զգում եք շփոթվածություն և ուշադրության կենտրոնացման դժվարացում: