Թոքերի քրոնիկ օբստրուկտիվ հիվանդությունը (ԹՔՕՀ) միավորում է երկարատև ընթացքով թոքերի քրոնիկ բորբոքային հիվանդություններ, որոնք ընթանում են ժամանակի ընթացքում խորացող շնչառական խանգարումներով:
ԹՔՕՀ-ն առաջացնում է արտաշնչման ընթացքում թոքերից հեռացող օդի հոսքի խոչընդոտում (օբստրուկցիա): ԹՔՕՀ ախտանիշներից են դժվարացած շնչառությունը, հազը, բրոնխներում լորձի (խորխի) արտադրությունը և շնչառական խզզոցները:
Տիպիկ դեպքերում հիվանդությունն առաջանում է գրգռիչ գազերի կամ օդածին մասնիկների երկարատև ազդեցության պատճառով: Այնուամենայնիվ, ԹՔՕՀ հիմնական պատճառը ծխախոտ ծխելն է:
ԹՔՕՀ-ով մարդկանց շրջանում բարձրանում է սրտային հիվանդության, թոքի քաղցկեղի և տարբեր այլ հիվանդությունների զարգացման ռիսկը:
Էմֆիզեման և քրոնիկ բրոնխիտը ԹՔՕՀ զարգացմանը նպաստող երկու հիմնական հիվանդություններն են: Դրանք սովորաբար հանդես են գալիս միասին և ԹՔՕՀ-ով մարդկանց շրջանում կարող են դրսևորվել տարբեր ծանրության աստիճաններով:
- Քրոնիկ բրոնխիտը բրոնխիալ խողովակների լորձաթաղանթի բորբոքումն է: Այս խողովակներն օդային հոսքն անցկացում են դեպի թոքաբշտիկներ (ալվեոլներ)։ Հիվանդությունը բնորոշվում է ամենօրյա հազով և լորձի (խորխ) արտադրությամբ:
Իմացե՛ք ավելին քրոնիկ բրոնխիտի մասին:
- Էմֆիզեման մեկ այլ հիվանդություն է, որի ժամանակ ծխախոտի ծխի և այլ գրգռիչ գազերի ու օդածին մասնիկների վնասող ազդեցության պատճառով ամենափոքր բրոնխների՝ բրոնխիոլների լայնացած վերջավորությունների՝ թոքաբշտիկների (ալվեոլների) պատի առաձգական հյուսվածքը ապաճում է, իսկ միջալվեոլյար խտրոցները՝ քայքայվում:
Իմացե՛ք ավելին էմֆիզեմայի մասին:
ԹՔՕՀ-ը հարաճուն զարգացող և ժամանակի ընթացքում վատթարացող, սակայն՝ բուժելի հիվանդություն է: Պատշաճ բուժման շնորհիվ ԹՔՕՀ-ով բազմաթիվ մարդիկ կարող են հաջողությամբ վերահսկել հիվանդության ախտանիշները և կյանքի որակը, ինչպես նաև կրճատել այլ փոխկապված առողջական խնդիրների զարգացման ռիսկը:
Հոդվածը հրապարակվել է՝ 17-05-2018
Վերջին վերանայում՝ 02-06-2024