Ախտանիշներ - Կրուպ

Կ​րուպը հաճախ սկսվում է որպես սովորական մրսածություն (սուր շնչառական վիրուսային վարակ կամ ՍՇՎՎ):

Եթե զարգացել է վերին շնչուղիների բավականաչափ այտուց, գրգռվածություն և առկա է հազ, երեխայի մոտ կարող է զարգանալ՝

• հաչոցանման սուր հազ, որը վատթարանում է լացի և հազի հետևանքով, ինչպես նաև անհանգստության և աժիտացիայի պատճառով՝ առաջացնելով ախտանիշների վատթարացման շրջան
• ջերմություն
• Խռպոտ ձայն
• աղմկոտ կամ ծանր շնչառություն:

Կրուպի ախտանիշները հաճախ ավելի վատանում են գիշերը և սովորաբար տևում են 3-ից 5 օր:

Ստրիդոր

Կրուպով երեխաները կարող են ունենալ աղմկոտ և խռպոտած շնչառություն, որը կոչվում է ստրիդոր: Ստրիդորը սովորաբար վկայում է շնչուղիների նեղացման կամ խցանման մասին: Հազվադեպ ստրիդոր կարող է առաջացնել նաև էպիգլոտիտ կոչվող հիվանդությունը (մակկոկորդի բորբոքում): Նկատի ունեցեք, որ երեխայի շնչառությունը նաև կարող է ստրիդորային դառնալ վերին շնչուղիներում օտար մարմնի առկայության պայմաններում:

Ե՞րբ դիմել բժշկին

Կապ հաստատեք ձեր երեխայի բժշկի հետ, եթե ախտանիշները ծանր են, վատթարանում են, տևում են 3-ից 5 օրից ավելի կամ չեն արձագանքում տնային բուժմանը:

Անհապաղ դիմեք բուժօգնության կամ զանգեք 1-03 և կանչեք շտապ օգնություն, եթե ձեր երեխան՝

• աղմկոտ, սուր շնչառական ձայներ է հանում ինչպես ներշնչելիս, այնպես էլ արտաշնչելիս
• սուր շնչառական աղմուկներ է արձակում, երբ չի լացում կամ աժիտացված (գրգռված) չէ
• սկսում է թքահոսել կամ դժվարությամբ է կուլ տալիս
• թվում է անհանգիստ, տագնապած և աժիտացված կամ հյուծված և թուլացած
• պայքարում է շնչելու համար
• ունի կապույտ կամ մոխրագույն երանգ քթի շուրջ, բերանի մեջ կամ շուրջը կամ եղունգների վրա: