Պատճառներ - Շաքարային դիաբետ

Ըստ առաջացման պատճառի տարբերում են շաքարային դիաբետի երեք հիմնական տեսակներ` 1-ին տիպի, 2-րդ տիպի և հղիների դիաբետ:

Արյան մեջ գլյուկոզի մակարդակը գլխավորապես կարգավորվում է ինսուլին հորմոնի միջոցով։ Ինսուլինն արտադրվում է ենթաստամոքսային գեղձում (պանկրեաս)։

Երբ մեր ընդունած սնունդը մարսվում է և սննդանյութերը, այդ թվում՝ գլյուկոզը ներծծվում են արյան հուն, գլյուկոզն արյան հունից ինսուլինի օգնությամբ թափանցում է բջիջներ, որտեղ գլյուկոզը տրոհվում է՝ առաջացնելով էներգիա։ Սակայն, եթե ունեք դիաբետ, ձեր օրգանիզմը չի կարողանում գլյուկոզից ստանալ էներգիա, ընդ որում՝

• 1-ին տիպի դիաբետի ժամանակ ենթաստամոքսային գեղձը չի արտադրվում բավարար քանակի ինսուլին կամ ընդհանրապես ինսուլին չի արտադրում
• 2-րդ տիպի դիաբետի ժամանակ ենթաստամոքսային գեղձի արտադրած ինսուլինը նորմալ չէ կամ նորմալ չի գարծում:

Երկու դեպքում էլ գլյուկոզը սկսում է մնալ ու կուտակվել արյան մեջ՝ առաջ բերելով արյան գլյուկոզի մակարդակի բարձրացում (հիպերգլիկեմիա)։ Ժամանակի ընթացքում հիպերգլիկեմիան ախտահարում է արյունատար անոթները՝ առաջացնելով տարբեր օրգանների գործունեության խանգարումներ: