Բուժում - Շաքարային դիաբետ

Դիաբետի բուժումը կախված է տեսակից, հիպերգլիկեմիայի մակարդկակից և մյուս ախտանիշների ծանրության աստիճանից, բարդությունների առկայությունից և ուղեկցող վիճակներից։

• 1-ին տիպի դիաբետի ժամանակ բժիշկը նշանակում է ինսուլինային փոխարինող բուժում, որի դեպքում ինսուլինի ներարկումները շարունակվում են ողջ կյանքի ընթացքում, ինչպես նաև առողջ սննդակարգ և սնման անհատական պլան, կանոնավոր ֆիզիկական վարժանքներ և արյան գլյուկոզի հսկողություն։ Բժիշկը որոշում է ինսուլինի դեղաչափը և տեսակը՝ ելնելով ձեր արյան շաքարի մակարդակից, ինսուլինի նկատմամբ ձեր օրգանիզմի պատասխանից, ընդհանուր առողջական վիճակից և մի շարք այլ գործոններից։
• 2-րդ տիպի դիաբետի կառավարումը երբեմն կարող է մեկնարկել միայն ապրելակերպի առոողջացման միջոցառումներով՝ առողջ սննդակարգով և կանոնավոր ֆիզիկական վարժանքներով։ Սակայն, երբ հիվանդությունը զարգանում է և միայն առողջ ապրելակերպով չի հաջողվում կարգավորել արյան շաքարի մակարդակը, ձեր բժիշկը նաև նշանակվում է բերանային ընդունան (օրալ) դեղամիջոցներ` դիաբետի հաբեր։ Դիաբետի հաբերը ինսուլին չեն պարունակում, այլ նշանակվում են, որ կայունացնեն արյան շաքարի մակարդակը նորմալ միջակայքին մոտ մակարդակների վրա։ Այս դեղերն ազդում են, եթե ենթաստամոքսային գեղձում (թեկուզ քիչ) արտադրվում է ինսուլին: Խնդրում ենք ուշադրություն դարձնել այն կարևոր հանգամանքի վրա, որ դեղերը ոչ թե փոխարինում են առողջ ապրելակերպին, այլ լրացնում այն։ Երբեմն անհրաժեշտություն է առաջանում 2-րդ տիպի դիաբետով մարդկանց նշանակել նաև ինսուլին, հատկապես, երբ զարգացել են դիաբետի բարդություններ կամ դրանք ստացել են ծանր ընթացք։

Դիաբետի բուժման նպատակը արյան գլյուկոզի մակարդակը «նորմալ» միջակայքին հնարավորինս մոտ պահելն է, այն է՝ քաղցած վիճակում 4-6 մմոլ/լ։ Արյան շաքարի մակարդակն առողջ միջակայքում պահելը թույլ է տալիս կանխարգելել դիաբետի ինչպես կարճաժամկետ, այնպես էլ երկարաժամկետ բարդությունները։