Գրադարան

Դիաբետիկ նեյրոպաթիա. ախտանիշներ

Դիաբետիկ նեյրոպաթիա. ախտանիշներ

Time Read 3 րոպե

Կան դիաբետիկ նեյրոպաթիայի չորս հիմնական տեսակներ:

Դուք կարող եք ունենալ մեկ կամ մի քանի տեսակի նեյրոպաթիա:

Ձեր ախտանշանները կախված են նեյրոպաթիայի այն տեսակից, որը դուք ունեք և նրանից, թե որ նյարդերն են ախտահարված: Ախտանիշները սովորաբար զարգանում են աստիճանաբար։ Դուք կարող եք չնկատել, որ ձեր նյարդերն ախտահարված են, քանի դեռ զգալի նյարդային վնաս չի զարգացել:

Ծայրամասային (պերիֆերիկ) նեյրոպաթիա

Նեյրոպաթիայի այս տեսակը կարող է նաև կոչվել հեռավոր (դիստալ) սիմետրիկ ծայրամասային նեյրոպաթիա: Սա դիաբետիկ նեյրոպաթիայի ամենատարածված տեսակն է: Այն առաջին հերթին ազդում է ոտքերի և ոտնաթաթերի վրա, որին հետևում են դաստակներն ու ձեռքերը: Պերիֆերիկ նեյրոպաթիայի գանգատներն ու ախտանիշները հաճախ վատթարանում են գիշերը և կարող են ներառել՝

  • թմրածություն կամ ցավ կամ ջերմաստիճանի փոփոխություններ զգալու ունակության նվազում
  • ծակոցների կամ այրման զգացում
  • սուր ցավեր կամ ջղաձգումներ
  • մկանային թուլություն
  • հպումների նկատմամբ չափազանց զգայունություն. որոշ մարդկանց համար նույնիսկ անկողնային սավանի քաշը կարող է ցավոտ լինել
  • ոտնաթաթերի լուրջ խնդիրներ, ինչպիսիք են խոցերը, վարակները և ոսկորների ու հոդերի վնասումը:

Ինքնավար (ավտոնոմ) նեյրոպաթիա

Ինքնավար կամ վեգետատիվ նյարդային համակարգը վերահսկում է արյան ճնշումը, սրտի հաճախությունը, քրտնարտադրությունը, աչքերը, միզապարկը, մարսողական համակարգը և սեռական օրգանները: Դիաբետը կարող է ազդել այս շրջանների որևէ մեկի նյարդերի վրա՝ առաջացնելով հնարավոր գանգատներ և ախտանիշներ, ինչպիսիք են՝

  • անտեղյակություն, որ արյան շաքարի մակարդակը ցածր է (հիպոգլիկեմիայի անտեղյակություն)
  • արյան ճնշման անկում նստած կամ պառկած վիճակից բարձրանալիս, որը կարող է առաջացնել գլխապտույտ կամ ուշագնացություն (օրթոստատիկ հիպոտենզիա)
  • միզապարկի կամ աղիքների դատարկման հետ կապված խնդիրներ
  • ստամոքսի դանդաղ դատարկում (գաստրոպարեզ), որն առաջացնում է սրտխառնոց, փսխում, լցվածության զգացում և ախորժակի կորուստ
  • կուլ տալու դժվարություն
  • լույսից դեպի մութ կամ հեռվից դեպի մոտիկ առարկաները դիտելիս աչքերի հարմարվողականության փոփոխություններ
  • քրտնարդադրության ավելացում կամ նվազում
  • սեռական արձագանքի հետ կապված խնդիրներ, ինչպիսիք են կանանց մոտ հեշտոցային չորությունը և տղամարդկանց մոտ էրեկտիլ դիսֆունկցիան:

Մոտակա (պրոքսիմալ) նեյրոպաթիա (դիաբետիկ պոլիռադիկուլոպաթիա)

Նեյրոպաթիայի այս տեսակը հաճախ ազդում է ազդրերի, կոնքերի, հետույքի կամ ոտքերի նյարդերի վրա: Այն կարող է ազդել նաև որովայնի և կրծքավանդակի շրջանների վրա: Ախտանիշները սովորաբար մարմնի մի կողմում են, սակայն կարող են տարածվել դեպի մյուս կողմ: Պրոքսիմալ նեյրոպաթիան կարող է ներառել՝

  • ուժեղ ցավ հետույքի կամ ազդրի հատվածում
  • թույլ և կրճատվող ազդրի մկաններ
  • նստած դիրքից բարձրանալու դժվարություն
  • կրծքավանդակի կամ որովայնի պատի ցավ:

Մոնոնեյրոպաթիա (ֆոկալ նեյրոպաթիա)

Մոնոնեյրոպաթիան վերաբերում է մեկ, առանձնահատուկ նյարդի վնասմանը: Այդ նյարդը կարող է լինել դեմքի, իրանի, ձեռքի կամ ոտքի վրա: Մոնոնեյրոպաթիան կարող է հանգեցնել՝

  • կենտրոնանալու դժվարության կամ երկտեսության (դիպլոպիա)
  • դեմքի մի կողմի լուծանքի (պարալիչ)
  • ձեռքի կամ մատների թմրածության կամ ծակոցների
  • ձեռքի թուլության, որը կարող է հանգեցնել իրերը ձեռքից բաց թողնելուն
  • սրունքի կամ ոտնաթաթի շրջանի ցավի
  • թուլության, որն առաջացնում է ոտնաթաթի առջևի հատվածը բարձրացնելու դժվարություն (կախված ոտնաթաթ)
  • ազդրի առջևի շրջանի ցավի:

Ե՞րբ դիմել բժշկին

Զանգեք ձեր բժշկին՝ այց պայմանավորվելու համար, եթե ունեք՝

  • ձեր ոտնաթաթի կտրված վերք կամ խոց, որը վարակված է կամ չի բուժվում
  • ձեռքերում կամ ոտնաթաթերում այրոց, ծակոցներ, թուլություն կամ ցավ, որը խանգարում է առօրյա գործունեությանը կամ քնին
  • փոփոխություններ մարսողության, միզելու կամ սեռական գործառույթներում
  • գլխապտույտ և ուշագնացություն:

Ամերիկյան դիաբետի ասոցիացիան (ADA) խորհուրդ է տալիս, որ դիաբետիկ նեյրոպաթիայի սքրինինգը սկսվի 2-րդ տիպի շաքարային դիաբետի ախտորոշումից անմիջապես հետո կամ 1-ին տիպի դիաբետի ախտորոշումից հինգ տարի անց: Դրանից հետո սքրինինգը խորհուրդ է տրվում տարին մեկ անգամ։

Հոդվածը տեղադրվել է՝ 30-04-2023 վերանայվել է՝ 30-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով