Փորլուծություն. կանխարգելում

Փորլուծություն. կանխարգելում

Փորլուծության կանխարգելման լավագույն ճանապարհը չհիվանդանալն է, իսկ փորլուծության տարածման կանխարգելման ամենակարճ ուղին՝ պատշաճ անձնական հիգիենայի կանոնները պահպանելը:

Որպեսզի որևէ վիրուսով կամ բակտերիաներով չվարակվեք կամ դրաքն այլ մարդկանց չփոխանցեք, հետևեք այս խորհուրդներին:

  • Պահեք ձեր ձեռքերը մաքուր: Համոզվեք, որ դուք և ձեր ընտանիքի անդամները մինչև սնունդ ընդունելը կամ սննդի հետ շփվելը, ինչպես նաև զուգարանից օգտվելուց հետո պատշաճ կերպով օճառով և հոսող ջրով լվանում եք ձեր ձեռքերը: Նույն կերպ, պահպանեք հիգիենայի կանոնները, երբ մաքրում եք աղտոտված մակերևույթներ կամ գործ եք ունենում կենցաղային կամ այլ աղբի, ինչպես նաև հիվանդ մարդկանց կամ նորածին ու մանկահասակ երեխաների արտաթորանքների ու փսխման զանգվածների հետ: Անպայման լվացեք ձեր ձեռքերը նման գործեր անելուց հետո: Հնարավորության դեպքում հագեք ձեռնոցներ:
  • Եթե դուք կամ ձեր երեխան ունեցել են փորլուծություն, որի պատճառը չի գտնվել, ապա մի գնացեք աշխատանքի կամ համալսարան և մի ուղարկեք ձեր երեխային դպրոց կամ մսուր-մանկապարտեզ, քանի դեռ ձեր ախտանիշները վերանալուց հետո չի անցել առնվազն 24 ժամ: Դուք պետք է նաև մնաք տանը մինչև 48 ժամ, քանի դեռ պատճառը չի նույնականացվել:
  • Եթե ձեր աշխատանքը կապված է երեխաների, մեծահասակների կամ պացիենտների խնամքի հետ, մի վերադարձեք աշխատանքի, քանի դեռ ձեր փսխման կամ փորկապության վերջին դրվագից չի անցել 48 ժամ:
  • Մաքրեք մակերևույթները: Արդյունավետ մեթոդ է համարվում ջրով և որևէ լվացող հեղուկով, իսկ անհրաժեշտության դեպքում՝ նաև ախտահանիչ լուծույթներով տարբեր մակերևույթները մաքրելը, օրինակ՝ դռան և պատուհանների բռնակներ, համակարգչի ստեղնաշար և մկնիկ, բջջային հեռախոսներ և այլն: Ախտահանիչ նյութերը կարող են ոչնչացնել բակտերիաների բազմաթիվ տեսակներ:
  • Եթե ձեզ մոտ ախտորոշել են նորովիրուսային վարակ կամ դուք ունեք փորլուծություն և փսխում, որոնք ի հայտ են եկել նորովիրուսով վարակված մարդու հետ շփվելուց հետո, ապա ախտահանեք բոլոր հնարավոր ախտոտված վարակները:
  • Անմիջապես հանեք և առանձին լվացեք փորլուծության կամ փսխման զանգվածներով աղտոտված հագուստը և անկողնային սպիտակեղենը:
  • Ձեր անհատական միջոցներից ու պարագաներից օգտվեք միայն դուք: Նույնը վերաբերվում է ձեր ընտանիքի մյուս անդամներին: Խոսքը սրբիչների, թաշկինակների, ատամի խոզանակների, սափրվելու և լոգանքի այլ պարագաների մասին է, ինչպես նաև՝ սպասք:
  • Խուսափեք շփվել սննդի հետ կամ պատրաստել կերակուրներ, քանի դեռ ձեր ախտանիշները չեն վերացել և դրանից հետո չի անցել առնվազն 48 ժամ: Սա վերաբերվում է ինչպես տանը կերակուր պատրաստելուն, այնպես էլ սննդի արդյունաբերությունում աշխատելուն:
  • Վարակի տարածումը կանխարգելելու համար մի այցելեք լողավազաններ, քանի դեռ ձեր վերջին փորլուծության դրվագից չի անցել առնվազն 2 շաբաթ:
  • Քանի դեռ ձեզ վատառողջ եք զգում, խուսափեք այլ մարդկանց, հատկապես՝ վարակների նկատմամբ ավելի զգայուն անձանց հետ շփվելուց, օրինակ՝ նորածիններ, հղի կանայք, մեծահասակ մարդիկ կամ անձինք, ովքեր ունեն թուլացած իմունային համակարգ:

Ճանապարհորդի փորլուծության կանխարգելումը

Հաճախ սանիտարահիգիենիկ ոչ համարժեք պայմաններ ունեցող և վարակված մթերքների բարձր հավանականությամբ երկրներ մեկնած անձանց մոտ ի հայտ է տալիս փորլուծություն: Նման իրավիճակներում ձեր ռիսկը նվազեցնելու համար՝

  • ուշադրություն դարձրեք այն բանի վրա, թե ինչ եք ուտում. օգտվեք միայն լավ եփված կերակուրներից և հրաժարվեք հում մրգերից ու բանջարեղեններից, ինչպես նաև թերեփ մսային կամ կաթնային արտադրանքներից
  • ուշադրություն դարձրեք այն բանի վրա, թե ինչ եք խմում. օգտագործեք միայն շշալցված մաքուր ջուր և խուսափեք ծորակից ջուր խմելուց, սառցե խորանարդիկներից (նույնը վերաբերվում է ատամները լվանալուն), իսկ ցնցուղից օգտվելիս աշխատեք, որ ձեր բերանը ջուր չլցվի
  • խորհուրդ հարցրեք ձեր բժշկից. տեղեկացրեք նրան, թե ինչ երկիր կամ տարածաշրջան եք պատրաստվում մեկնել, հարցրեք այդ շրջաններում տարածված հիվանդությունների և հնարավոր պատվաստումների մասին, հատկապես, եթե ունեք թուլացած իմունային համակարգ
  • ստուգեք տվյալ երկրի կամ տարածաշրջանի համաճարակային իրավիճակը. օգտվեք համացանցից, ճանապարհորդների համար նախատեսված ուղեցույցներից, որպեսզի ճշտեք, թե ինչպիսի ռիսկերի հետ կարող է կապված լինել տվյրա շրջան ճանապարհորդելը:

Հոդվածը վերանայվել է՝ 02-06-2020