Գրադարան

Փորլուծություն. կանխարգելում

Փորլուծություն. կանխարգելում

Time Read 2 րոպե

Փորլուծության կանխարգելման լավագույն ճանապարհը չհիվանդանալն է, որին զգալիորեն օգնում է անձնական հիգիենայի կանոնները պահպանելը:

Վարակային փորլուծության կանխարգելումը

Լվացեք ձեռքերը՝ վարակիչ փորլուծության տարածումը կանխելու համար։ Ձեռքերի պատշաճ լվացումն ապահովելու համար հետևեք այս խորհուրդներին:

  • Հաճախակի լվացվեք. լվացեք ձեռքերը կերակուր պատրաստելուց առաջ և հետո։ Լվացեք ձեռքերը չեփած մսին դիպչելուց, զուգարանից օգտվելուց, երեխայի կամ չափահասի տակդիրը փոխելուց, փռշտալուց կամ հազալուց հետո։
  • Օճառը փրփրացրեք առնվազն 20 վայրկյան. ձեր ձեռքերն օճառելուց հետո ձեռքերը միմյանց շփեք առնվազն 20 վայրկյան։
  • Օգտագործեք ձեռքերի ախտահանող միջոց, երբ հնարավոր չէ լվացվել. օգտագործեք ալկոհոլային հիմքով ձեռքերի ախտահանիչ միջոց, երբ չեք կարող հասնել լվացարանին: Համոզվեք, որ մաքրել եք ձեր երկու ձեռքերի առջևի և հետևի երեսները: Օգտագործեք այնպիսի միջոց, որը պարունակում է առնվազն 60% ալկոհոլ:

Պատվաստում

Դուք կարող եք օգնել ձեր նորածնին պաշտպանել ռոտավիրուսից, որը երեխաների մոտ վիրուսային լուծի ամենատարածված պատճառն է: Դրա համար անհրաժեշտ է պատվաստել ձեր երեխային երկու հաստատված պատվաստանյութերից մեկնումեկով: Հարցրեք ձեր երեխայի բժշկին երեխային պատվաստելու մասին:

Ճանապարհորդների փորլուծության կանխարգելումը

Փորլուծությունը սովորաբար տարածված է այն մարդկանց մոտ, ովքեր ճանապարհորդում են անբավարար սանիտարական պայմաններ ունեցող և աղտոտված սննդի բարձր հավանականությամբ երկրներ: Ձեր ռիսկը նվազեցնելու համար հետևեք այս խորհուրդներին:

Սանիտարահիգիենիկ ոչ համարժեք պայմաններ ունեցող և վարակված մթերքների բարձր հավանականությամբ երկրներ մեկնած անձանց մոտ հաճախ ի հայտ է տալիս փորլուծություն: Նման իրավիճակներում ձեր ռիսկը նվազեցնելու համար հետևեք այս խորհուրդներին:

  • Ուշադրություն դարձրեք, թե ինչ եք ուտում. կերեք տաք, լավ եփած ուտելիքներ: Օգտվեք միայն լավ եփված կերակուրներից և հրաժարվեք հում մրգերից ու բանջարեղեններից, ինչպես նաև կիսաեփ մսային արտադրանքներից կամ կաթնամթերքից:
  • Ուշադրություն դարձրեք, թե ինչ եք խմում. խմեք շշալցված ջուր, հանքային ջուր, գարեջուր կամ գինի, որը մատուցվում է իր սկզբնական տարայի մեջ: Խուսափեք ծորակի ջրից և սառցե խորանարդներից: Օգտագործեք շշալցված ջուր նույնիսկ ատամները լվանալու համար։ Ցնցուղ ընդունելիս փակ պահեք ձեր բերանը։ Եռացրած ջրով պատրաստված ըմպելիքները, ինչպիսիք են սուրճն ու թեյը, հավանաբար անվտանգ են: Հիշեք, որ ալկոհոլը և կոֆեինը կարող են խորացնել փորլուծությունը և ջրազրկումը:
  • Հարցրեք ձեր բժշկին հակաբիոտիկների մասին. եթե երկար ժամանակով ուղևորվում եք դեպի զարգացող երկիր, նախքան մեկնելը հարցրեք ձեր բժշկին հակաբիոտիկների մասին, հատկապես, եթե թուլացած իմունային համակարգ ունեք:
  • Ստուգեք ճանապարհորդության նախազգուշացումները. օգտվեք համացանցից, ճանապարհորդների համար նախատեսված ուղեցույցներից և այլ հուսալի աղբյուրներից, որ ճշտեք, թե ինչպիսի ռիսկերի հետ կարող է կապված լինել ձեր նախատեսած տարածաշրջան ճանապարհորդելը: Անհրաժեշտության դեպքում հարցրեք ձեր բժշկին այդ տարածաշրջանում տարածված հիվանդությունների և հնարավոր պատվաստումների մասին:

Հոդվածը տեղադրվել է՝ 02-06-2020 վերանայվել է՝ 13-03-2024

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով