Ձեր բժիշկը կհարցնի ձեր հիվանդության պատմության մասին (անամնեզ), կուսումնասիրի ձեր ընդունած դեղերը, կանցկացնի բուժզննում և կարող է նշանակել հետազոտություններ՝ որոշելու, թե ինչն է ձեր փորլուծության պատճառը:
Հնարավոր հետազոտությունները կարող են ներառել հետևյալը:
- Արյան թեստ. արյան ընդհանուր քննությունը, էլեկտրոլիտների չափումը և երիկամների գործունեության թեստերը կարող են օգնել ձեր բժշկին, որ գնահատի ձեր փորլուծության և ջրազրկման ծանրության աստիճանը:
- Կղանքի թեստ. ձեր բժիշկը նաև կարող է խորհուրդ տալ կղանքի թեստ՝ ստուգելու բակտերիայի կամ մակաբույծի առկայությունը, որոնք կարող են առաջացնել փորլուծությամբ ընթացքող վարակ:
- Ջրածնային շնչառական թեստ. այս թեստը կարող է օգնել ձեր բժշկին որոշելու, թե արդյոք ունեք լակտոզի (կաթնաշաքար) անհանդուրժողականություն: Մեծ քանակով լակտոզ պարունակող հեղուկ խմելուց հետո ձեր բժիշկը կանոնավոր ընդմիջումներով չափում է ձեր արտաշնչված օդում ջրածնի քանակը: Արտաշնչված օդում ջրածնի չափից դուրս բարձր մակարդակը վկայում է, որ դուք լիովին չեք մարսում և յուրացնում կաթնաշաքարը:
- Ճկուն սիգմոիդոսկոպիա կամ կոլոնոսկոպիա. սրանք էնդոսկոպիկ հետազոտություններ են, որոնց միջոցով ներսից զննվում են ուղիղ և հաստ աղիքները: Սարքը հագեցած է նաև գործիքով, որը թույլ է տալիս բժշկին ձեր հաստ աղիքից հյուսվածքից վերցնել փոքր նմուշ (բիոպսիա): Ճկուն սիգմոիդոսկոպիան թույլ է տալիս տեսնել հաստ աղիքի ստորին հատվածը, մինչդեռ կոլոնոսկոպիայի դեպքում բժիշկը զննում է ձեր ամբողջ հաստ աղիքը:
- Վերին էնդոսկոպիա. բժիշկներն օգտագործում են երկար, բարակ խողովակ (գաստրոդուոդենոսկոպ), որի ծայրին տեղադրված է տեսախցիկ՝ ստուգելու ձեր ստամոքսը և բարակ աղու վերին հատվածը՝ տասներկումատնյա աղին: Նրանք կարող են լաբորատոր անալիզի համար մարսողական խողովակի լորձաթաղանթից վերցնել հյուսվածքի նմուշ (բիոպսիա):
Հոդվածը հրապարակվել է՝ 10-05-2021
Վերջին վերանայում՝ 23-04-2024