Փորլուծություն. ինքնօգնություն

Փորլուծություն. ինքնօգնություն

Փորլուծությունը սովորաբար արագորեն առանց բուժման անհետանում է:

Մինչև ձեր փորլուծության լավացումը դուք կարող եք տնային պայմաններում ձեռնարկել քայլեր՝ ուղղված ձեր գանգատների և ախտանիշների հաղթահարմանը և մեղմացմանը:

  • Առոտորեն խմե՛ք առատ թափանցիկ հեղուկներ, այդ թվում՝ ջուր, արգանակներ (բուլյոն) և նոսրացված հյութեր (օրինակ՝ 1 բաժին հյութ՝ նոսրացրած 4 բաժին ջրով): Օրգանիզմի հեղուկների վերականգնումը շատ կարևոր է, քանի որ լուծելիս կորցնում եք մեծ քանակի ջուր և աղեր (էլեկտրոլիտներ): Դուք նաև կարող եք դեղատնից գնել և օգտագործել ռեհիդրատացիոն հեղուկներ, որոնք ունեն ձեր օրգանիզմին անհրաժեշտ ջրի, շաքարի և աղերի ճիշտ հաշվարկված համամասնություն (հետևեք այդ լուծույթների պատրաստման, օգտագործման և պահպանման հրահանքներին): Խուսափեք կոֆեինից և ալկոհոլից, ինչպես նաև քաղցրահամ ըմպելիքներից: Խուսափեք նաև մարզական կամ էներգետիկ ըմպելիքներից, որոնց մեջ առկա շաքարի մեծ քանակությունը չի օգնում ձեր կորցրած հեղուկների վերականգնմանը։
  • Աստիճանաբար ավելացրեք կիսապինդ և ցածր բջջանքով սննդամթերքներ, երբ ձեր աղիների գործունեությունը սկսում է նորմալանալ: Փորձեք անգազ հանքային ջրով կրեկերներ, տոստ, ձու, բրինձ կամ հավ: Յոգուրտը կարող է օգնել փորլուծության մեղմացմանը, քանի որ փոխարինում է այն բակտերիաները, որոնք հաստ աղիներին անհրաժեշտ են նորմալ գործելու համար:
  • Խուսափեք որոշ մթերքներից, օրինակ, մի քանի օր զերծ մնացեք կաթնամթերքներից (պարունակում են փորլուծություն առաջացնող կաթնաշաքար (լակտոզ)), ճարպոտ սննդից, բջջանքի մեծ պարունակությամբ մթերքներից կամ խիստ համեմված ուտեստներից։
  • Հարցրե՛ք ձեր բժշկին փորլուծության դեմ դեղամիջոցների օգտագործման մասին. դեղատոմս չպահանջող փորլուծության դեմ դեղամիջոցները (օրինակ՝ Լոպերամիդ և Բիսմութի ենթասալիցիլատ) կարող են օգնել ջրիկ փորլուծության հաճախականության մեղմացմանը և թուլացնել սուր ախտանիշները: Այնուամենայնիվ, պետք է նկատի ունենալ, որ որոշ հիվանդությունների և բակտերիալ կամ մակաբուծային վարակների ժամանակ այս դեղերը կարող են վատթարացնել ընթացքը, քանի որ դեղերը կարող են խանգարել օրգանիզմին, որ ազատվի փորլուծություն առաջացնող պատճառից: Միևնույն ժամանակ, այս դեղերն անվտանգ չեն երեխաների համար:
  • Ձեր բժշկի հետ քննարկեք պրոբիոտիկներ ստանալու հարցը. այս միկրոօրգանիզմները կարող են օգնել աղիքային ֆլորայի վերականգնմանը՝ խթանելով լավ բակտերիաների աճը: Պրոբիոտիկները մատչելի են պատիճներով կամ հեղուկ դեղաձևով և նաև կարող են ավելացնել որոշ սննդամթերքներին, օրինակ՝ որոշ յոգուրտներին: Այնուամենայնիվ, առկա է լրացուցիչ հետազոտությունների կարիք, որ ավելի լավ ուսումնասիրվի, թե բակտերիաների որ շտամերն են առավել օգտակար կամ ինչ դեղաչափերով են դրանք դառնում արդյունավետ:

Եթե կրծքով կերակրող մայր եք, ապա պետք է շարունակել կրծքով կերակրումը և համոզվել, որ ստանում եք այնքան հեղուկներ, որոնք ապահովում են ջրազրկման կանխարգելումը: Պահպանեք պատշաճ հիգիենա և զրուցեք այս թեմայի շուրջ ձեր բժշկի հետ:

Փորլուծությունը կարող է ազդել բեղմնականխման հաբերի վրա (ինչպես համակցված, այնպես էլ «մինի-հաբերի»): Փորլուծությանը հաջորդող վերջին 1 շաբաթվա ընթացքում բեղմնականխման ազդեցությունը թուլանում է, ուստի պետք է ձեռնարկել լրացուցիչ միջոցառումներ, օրինակ՝ պահպանակների օգտագործում:

Իմացե՛ք ավելին նորածինների և մանկահասակ երեխաների մոտ փորլուծության բուժման և խնամքի մասին:

Հոդվածը վերանայվել է՝ 09-05-2021