Աղիքային ցուպիկ (E. coli)

Աղիքային ցուպիկը բակտերիա է, որի շտամերի մեծամասնությունը ախտածին չէ, սակայն որոշ շճատիպեր կարող են առաջացնել թեթևից մինչև ծանր սննդային թունավորումներ և վարակային այլ ախտահարումներ:

Երբեմն աղիքային ցուպիկի առաջացրած հիվանդությունն անվանում են «էշերիխիոզ» կամ «էշերիխիա»:

Պատշաճ հիգիենան կարող է զգալիորեն նվազեցնել այս վարակը «վերցնելու» կամ տարածելու հավանականությունը:

Ի՞նչ է աղիքային ցուպիկը

Աղիքային ցուպիկը (Escherichia coli կամ կարճ՝ E. coli) բակտերիաների մի խումբ է, որոնք հայտնաբերվում են գրեթե բոլոր մարդկանց և կենդանիների մարսողական խողովակում:

Աղիքային ցուպիկը նման է բակտերիալ դիզենտերիայի հարուցիչ «շիգելա» բակտերիային և վերջինիս նման կարող է առաջացնել վեգետատիվ ձևեր և ցիստեր, սակայն սպիտակուց լուծող ֆերմենտ չի արտադրում, ուստի և չի կարողանում թափանցել աղիքի պատի մեջ։

Կան E. coli-ի բազմաթիվ տարբեր շտամներ: Դրանց մեծ մասն ախտածին չէ և որևէ հիվանդություն չի հարուցում կամ էլ առաջացնում է հարաբերականորեն կարճատև թեթև ընթացքով փորլուծություն: Սակայն կան E. coli-ի փոքրաթիվ շտամներ (օրինակ՝ E. coli O157:H7), որոնք պատճառում են ստամոքսի սուր կծկանքներ, արյունոտ փորլուծություն և փսխումներ:

Դուք կարող եք E. coli-ով վարակվել ախտոտված ջրից կամ սննդամթերքներից, մասնավորապես, հում բանջարեղեններից և տավարի կիսաեփ ֆարշից (աղացած, ծեծած կամ կտրտած փափուկ միս): Առողջ չափահասները սովորաբար E. coli O157:H7 վարակից ապաքինվում են մինչև մի շաբաթվա ընթացքում: Մանկահասակ երեխաների և մեծ տարիքով չափահասների մոտ բարձրանում է երիկամային անբավարարության կյանքին սպառնացող ձևերի զարգացման ռիսկը։

E. coli վարակի ախտորոշման հաստատումը պահանջում է կղանքի մանրէաբանական հետազոտություն: Բուժումը կախված է այն բանից, թե ձեր օրգանիզմի ո՞ր շրջանն է վարակված և ինչպիսի՞ ախտանիշներով է հիվանդությունն ընթանում:

Դուք կարող եք նվազեցնել E. coli վարակի հավանականությունը՝ խուսափելով «ռիսկային» սննդամթերքներից և պահպանելով պատշաճ հիգիենա: Մշտապես լվացեք ձեռքերը զուգարանից օգտվելուց կամ նորածնի (կամ խնամվող հիվանդի) տակդիրները փոխելուց առաջ և հետո:

Հոդվածը վերանայվել է՝ 30-03-2021