Բարդություններ - Ատոպիկ դերմատիտ

Ատոպիկ դերմատիտի կամ էկզեմայի բարդությունները կարող են ներառել հետևյալը:

• Ասթմա և ալերգիկ ռինիտ (հարբուխ). ատոպիկ դերմատիտով բազմաթիվ մարդկանց մոտ զարգանում է ասթմա և ալերգիկ ռինիտ: Դա կարող է տեղի ունենալ ատոպիկ դերմատիտի զարգացումից առաջ կամ հետո:
• Սննդային ալերգիաներ. ատոպիկ դերմատիտ ունեցող մարդկանց մոտ հաճախ առաջանում է սննդային ալերգիա: Այս վիճակի հիմնական ախտանիշներից մեկը եղնջացանն է:
• Քրոնիկ քոր և մաշկի թեփոտում. մաշկի քոր եկող բծից կարող է սկսվել նեյրոդերմիտ կոչվող մաշկային հիվանդությունը (lichen simplex chronicus): Դուք քորում եք այդ շրջանը, որը միայն ժամանակավոր թեթևացում է տալիս։ Իրականում քորելը ավելի է սաստկացնում մաշկի քորը, քանի որ ակտիվացնում է ձեր մաշկի նյարդաթելերը: Ժամանակի ընթացքում քորելու սովորույթը կարող է առաջացնել քերծվածքներ: Այս վիճակը կարող է հանգեցնել ախտահարված մաշկի գունաթափման, հաստացման և կաշվենման կոշտացման:
• Մաշկային բծեր, որոնք շրջակա շրջաններից ավելի մուգ կամ բաց են. ցանի լավացումից հետո ի հայտ եկող այս բարդությունը կոչվում է հետբորբոքային գերգունակավորում կամ թերգունակավորում (հիպերպիգմենտացիա կամ հիպոպիգմենտացիա)։ Այն ավելի տարածված է շագանակագույն կամ սև մաշկ ունեցող մարդկանց շրջանում: Մաշկի գունափոխման վերացման համար կարող է պահանջվել մի քանի ամիս:
• Մաշկային վարակներ. տանջալի քորի պատճառած կրկնվող քերծվածքները, որոնք վնասում են մաշկը, կարող են առաջացնել բաց վերքեր և ճաքեր: Դրանք մեծացնում են բակտերիաներից և վիրուսներից մաշկի վարակման ռիսկը: Այս մաշկային վարակները կարող են տարածվել և դառնալ ընդհուպ մինչև կյանքին սպառնացող:
• Ձեռքերի բորբոքային դերմատիտ. սա հատկապես զարգանում է այն մարդկանց մոտ, ում ձեռքերը հաճախ թաց են և աշխատավայրում ենթարկվում են կոպիտ օճառների, լվացող միջոցների և ախտահանիչների ազդեցությանը:
• Ալերգիկ կոնտակտային դերմատիտ. այս վիճակը տարածված է ատոպիկ դերմատիտ ունեցող մարդկանց մոտ: Ալերգիկ կոնտակտային դերմատիտը քոր հարուցող ցան է, որն առաջանում է այն նյութերի դիպչելուց, որոնց նկատմամբ ալերգիկ եք: Ցանի գույնը տատանվում է՝ կախված ձեր մաշկի գույնից։
• Քնի հետ կապված խնդիրներ. ատոպիկ դերմատիտի քորը կարող է խանգարել քունը:
• Հոգեկան առողջության խնդիրներ. ատոպիկ դերմատիտը կապված է դեպրեսիայի և անհանգստության հետ: Սա կարող է պայմանավորված ինել ատոպիկ դերմատիտով տառապող մարդկանց շրջանում տարածված մշտական ​​քորով և քնի խանգարմամբ: