Բուժում - Ատոպիկ դերմատիտ

Ատոպիկ դերմատիտի կամ էկզեմայի բուժումը կարող է սկսվել մաշկի կանոնավոր խոնավացմամբ և ինքնօգնության այլ միջոցներով:

Եթե ​​դրանք չօգնեն, ձեր բժիշկը կարող է առաջարկել դեղորայքային քսուքներ, որոնք մեղմացնում են քորը և օգնում են մաշկի լավացմանը: Դեղամիջոցները երբեմն զուգակցվում են այլ՝ ոչ դեղորայքային բուժման հետ:

Ատոպիկ դերմատիտը կարող է մշտական ​​լինել: Այն կառավարելու համար ձեզ կարող է անհրաժեշտ լինել ամիսների կամ տարիների ընթացքում տարբեր տեսակի բուժումների փորձարկում: Եվ, նույնիսկ եթե բուժումը հաջող է, որոշ ժամանակ անց ախտանիշները կարող են վերադառնալ (բռնկվել):

Դեղորայքային բուժում

• Դեղամիջոցներ, որոնք կիրառվում են մաշկի վրա. գոյություն ունեն մի շարք տարբերակներ, որոնք կարող են օգնել քորի թեթևացմանը և մաշկի վերականգնմանը: Բուժական արտադրանքները հասանելի են տարբեր խտություններով և նրբաքսուքների (կրեմներ), գելերի և քսուքների տեսքով: Խոսեք ձեր բժշկի հետ առկա տարբերակների և ձեր նախասիրությունների մասին: Ինչ էլ որ ընտրեք, հետևեք ձեր բժշկի հրահանգներին և կիրառեք դրանք նախքան մաշկը խոնավացնող միջոցներ օգտագործելը: Մաշկային կորտիկոստերոիդային արտադրանքի չափից ավելի օգտագործումը կարող է առաջացնել կողմնակի բարդություններ, օրինակ՝ մաշկի բարակում:
• Վարակի դեմ դեղամիջոցներ. բժիշկը ձեզ կարող է նշանակել հակաբիոտիկային դեղահաբեր՝ ուղղված վարակի վերացմանը:
• Հաբեր, որոնք վերահսկում են բորբոքումը. ավելի ծանր էկզեմայի դեպքում բժիշկը կարող է նշանակել դեղահաբեր, որոնք օգնում են ձեր ախտանիշների կառավարմանը: Տարբերակները կարող են ներառել՝ Ցիկլոսպորին, Մետոտրեքսատ, Պրեդնիզոն, Միկոֆենոլատ և Ազաթիոպրին: Այս հաբերն արդյունավետ են, բայց չեն կարող օգտագործվել երկարաժամկետ՝ հնարավոր լուրջ կողմնակի ազդեցությունների պատճառով:
• Ծանր էկզեմայի բուժման այլ տարբերակներ. ներարկային կենսաբանական դեղամիջոցները (մոնոկլոնալ հակամարմիններ), որոնցից են Դուպիլումաբը (Դուպիքսենտ) և Տրալոկինումաբը (Ադբրի) կարող են առաջարկվել էզեմայի միջին և ծանր ընթացով այն մարդկանց, ում մոտ այլ բուժումները բավարար արդյունք չեն ապահովում: Հետազոտությունները ցույց են տալիս, որ այս դեղամիջոցներով բուժումն անվտանգ և արդյունավետ է ատոպիկ դերմատիտի ախտանիշները թեթևացնելու համար: Դուպիլումաբը նախատեսված է 6 տարեկանից բարձր մարդկանց համար, իսկ Տրալոկինումաբը՝ միայն չափահասների համար:

Ոչ դեղորայքային բուժումներ (թերապիաներ)

• Թաց վիրակապեր (թրջոցներ). ծանր էկզեմայի արդյունավետ, ինտենսիվ բուժումը ներառում է մաշկի ախտահարված շրջանը կորտիկոստերոիդային քսուքով պատելը և այդ դաշտը թաց վիրակապով ծածկելը, որի վրա դրված է չոր շերտ: Երբեմն դա արվում է հիվանդանոցում՝ տարածուն ախտահարումների դեպքում, քանի որ այս գործն աշխատատար է և պահանջում է բուժքույրական հմտություններ: Դուք նաև կարող եք խնդրել ձեր բժշկին սովորեցնել, թե ինչպես տանն անվտանգ օգտագործել այս մեթոդը:
• Լուսաբուժում (ֆոտոթերապիա). այս բուժումը կիրառվում է այն մարդկանց համար, ովքեր չեն լավանում տեղային բուժումներով կամ բուժումից շատ չանցած ունենում են ախտանիշների բռնկում: Լուսաբուժման ամենապարզ ձևը մաշկի ախտահարված շրջանը բնական արևի լույսի ազդեցության տակ կարճատև պահելն է: Այլ ձևերն օգտագործում են արհեստական ​​ուլտրամանուշակագույն A (UVA) և նեղ փնջային B (UVB) ճառագայթներ՝ առանձին կամ դեղամիջոցների հետ միասին: Երկարաժամկետ լուսաբուժումը թեև արդյունավետ է, սակայն կարող է հանգեցնել վնասակար հետևանքների, այդ թվում՝ մաշկի վաղաժամ ծերացման, մաշկի գույնի փոփոխության (հիպերպիգմենտացիա) և մաշկի քաղցկեղի առաջացման ռիսկի բարձրացման: Այս պատճառներով ֆոտոթերապիան ավելի քիչ է օգտագործվում փոքր երեխաների համար և չի նշանակվում նորածիններին: Խոսեք ձեր բժշկի հետ լուսաբուժման դրական և բացասական կողմերի մասին:
• Խորհրդատվություն. եթե ​​վրդովված կամ հիասթափված եք ձեր մաշկի վիճակից, հոգեթերապևտի կամ այլ խորհրդատուի հետ խոսելը կարող է օգնել:
• Ռելաքսացիա, վարքագծերի ձևափոխում և կենսաբանական հետադարձ կապ (բիոֆիդբեք). այս մոտեցումները կարող են օգնել այն մարդկանց, ում մոտ զարգացել է սովորույթային քոր։

Նորածինների էկզեմայի բուժումը

Նորածինների էկզեմայի բուժումը ներառում է՝

• մաշկի գրգռիչների հայտնաբերում և դրանցից խուսափում
• սենյակի բարձր ջերմաստիճանից խուսափում
• գոլ ջրով լոգանք և նրբաքսուքի կամ քսուկի օգտագործում, քանի դեռ մաշկը խոնավ է:

Այցելեք ձեր երեխայի բժշկին, եթե այս քայլերը չեն բարելավում երեխայի ցանը կամ ախտահարված մաշկը վարակված տեսք ունի: Ձեր երեխային կարող է անհրաժեշտ լինել ավելի ուժեղ ազդող դեղամիջոցներ՝ ցանը մեղմացնելու կամ վարակը բուժելու համար: Բժիշկը նաև կարող է խորհուրդ տալ, որ երեխային տաք բերանային (օրալ) հակահիստամինային դեղամիջոց, որը կօգնի քորի մեղմացմանը և կառաջացնի քնկոտություն` գիշերային քորն ու անհանգստությունը տանելի դարձնելու համար: