Ախտորոշում - Սննդային թունավորում

Ախտորոշումը հիմնված է ֆիզիկական քննության (բուժզննում) և այն գործոնների գնահատման վրա, որոնք կարող են առաջացնել փսխում, փորլուծություն կամ այլ ախտանիշներ:

Ձեր բժշկի հարցերը կներառեն՝

• ձեր գանգատները
• վերջերս կերած կամ խմած սնունդը կամ հեղուկները
• ձեզ հետ նույն սնունդն օգտագործած մարդկանց ախտանիշները
• ձեր ընդունած դեղերում վերջերս կատարված փոփոխությունները
• վերջերս կատարված ճանապարհորդությունները կամ ուղևորությունները:

Ձեր բժիշկը կզզնի ձեզ՝ բացառելու ձեր հիվանդության այլ պատճառները և ստուգելու ջրազրկման նշանները:

Ձեր բժիշկը կարող է նշանակել որոշ հետազոտություններ, այդ թվում՝

• կղանքի նմուշի թեստեր՝ բակտերիաների, վիրուսների, մակաբույծների կամ տոքսինների հայտնաբերման համար
• արյան թեստեր՝ հիվանդության պատճառը հայտնաբերելու, այլ վիճակները բացառելու կամ բարդությունները հայտնաբերելու համար:

Երբ որևէ մեկ այլ մարդ կամ ընտանիքի անդամները նույնպես ունեն սննդային թունավորում, դժվար է իմանալ, թե որ սննդամթերքն է աղտոտված եղել: Աղտոտված սնունդն ուտելուց մինչև հիվանդության սկիզբը կարող են ժամեր կամ օրեր անցնել: Այդ ընթացքում դուք կարող եք մեկ կամ մի քանի անգամ սնունդ ստանալ կամ հեղուկներ խմել: Սա դժվարացնում է որոշել, թե որ կոնկրետ սնունդն է հանդիսացել ձեր հիվանդության պատճառը:

Մեծ բռնկումների ժամանակ հանրային առողջապահության պաշտոնյաները կարող են գտնել այն ընդհանուր սնունդը, որից օգտվել են բազմաթիվ մարդիկ: