Բարդություններ - Գլոմերուլոնեֆրիտ

Գլոմերուլոնեֆրիտն ազդում է նեֆրոնների կողմից արյան հոսքը արդյունավետ քամազատելու կամ զտելու ունակության վրա (ֆիլտրացիա):

Սա հանգեցնում է՝

• արյան մեջ թափոնային նյութերի կամ թույների (տոքսինների) կուտակման
• անհրաժեշտ միներալների և սննդանյութերի վատ կարգավորման
• արյան կարմիր բջիջների (էրիթրոցիտների) կորստի
• արյան սպիտակուցների (պրոտեինի) կորստի:

Գլոմերուլոնեֆրիտի հնարավոր բարդությունները ներառում են հետևյալը:

• Սուր երիկամային անբավարարություն. սուր երիկամային անբավարարությունը երիկամների գործառույթի հանկարծակի, արագ անկումն է, որը հաճախ կապված է գլոմերուլոնեֆրիտի վարակային պատճառի հետ: Թափոնային նյութերի և հեղուկների կուտակումները կարող են վտանգ ներկայացնել կյանքին, եթե անհապաղ չհեռացվեն արհեստական ​​զտիչ սարքով (դիալիզ): Վերականգնումից հետո երիկամները հաճախ վերականգնում են սովորական գործառույթը:
• Քրոնիկ երիկամային հիվանդություն. մշտական ​​բորբոքումը հանգեցնում է երկարատև վնասների և երիկամների գործունեության անդառնալի նվազման: Քրոնիկ երիկամային հիվանդությունը սովորաբար սահմանվում է որպես երիկամների վնասում կամ երեք կամ ավելի ամիս տևող գործունեության նվազում: Քրոնիկ երիկամային հիվանդությունը կարող է անցնել երիկամների հիվանդության վերջնական փուլ, որը պահանջում է դիալիզ կամ երիկամի փոխպատվաստում:
• Բարձր արյան ճնշում (երկրորդային հիպերտենզիա). բորբոքումից կամ սպիից երիկամային կծիկների վնասումը կարող է հանգեցնել արյան ճնշման վտանգավոր բարձրացման:
• Նեֆրոտիկ համախտանիշ. նեֆրոտիկ համախտանիշը մի վիճակ է, երբ մեզի մեջ արյան սպիտակուցը չափազանց շատ է, իսկ արյան մեջ՝ շատ քիչ: Այս սպիտակուցները դեր են խաղում հեղուկների և խոլեստերինի մակարդակը կարգավորելու գործում: Արյան սպիտակուցների կորուստը հանգեցնում է խոլեստերինի բարձր մակարդակի, բարձր արյան ճնշման և դեմքի, ձեռքերի, ոտնաթաթերի և որովայնի այտուցների: Երբեմն նեֆրոտիկ սինդրոմը երիկամների արյունատար անոթում կարող է առաջացնել արյան մակարդուկ (թրոմբ):

Իմացե՛ք ավելին նեֆրոտիկ համախտանիշի մասին: