Գրադարան
Գլոմերուլոնեֆրիտ. բուժում
2 րոպե
Գլոմերուլոնեֆրիտի բուժումը և բուժման արդյունքները կախված են հիվանդության զարգացման պատճառից, ընթացքից (սուր կամ քրոնիկ), ինչպես նաև ախտանիշների տեսակից և ծանրության աստիճանից:
Սուր գլոմերուլոնեֆրիտի որոշ տեսակները և ստրեպտոկոկային ըմպանաբորբից (ֆարինգիտ) հետո զարգացող հետվարակային գլոմերուլոնեֆրիտը կարող են ինքնուրույն բարելավվել և չպահանջել որևէ բուժում:
Որպես կանոն, եթե հայտնի է գլոմերուլոնեֆրիտի պատճառը, օրինակ՝ բարձր արյան ճնշում (հիպերտենզիա), վարակ կամ որևէ աուտոիմուն հիվանդություն, հիմնական միջոցառումներն ուղղվում են տվյալ հիվանդության բուժմանը:
Ընդհանուր առմամբ, բուժման նպատակը երիկամները հետագա վնասումից պաշտպանելն է:
Ձեր բժիշկը կարող է առաջարկել հետևյալ մոտեցումները՝
- հատուկ սննդակարգ՝ կազմված աղերի, կալիումի և սպիտակուցի քիչ քանակություն պարունակող մթերքներից (օգտակար կարող է լինել նաև դիետոլոգի խորհուրդը)
- զարկերակային ճնշման հսկողություն, որը սովորաբար իրականացվում է անգիոտենզին փոխակերպող ֆերմենտի (ԱՓՖ) արգելակիչների (ինհիբիտորների) կամ անգիոտենզինային ընկալիչների պաշարիչների (բլոկատորների) միջոցով
- միզամուղներ, եթե առկա են այտուցներ (նեֆրոտիկ համախտանիշ):
Գլոմերուլոնեֆրիտի բազմաթիվ դեպքեր պահանջում են իմունային համակարգի ախտաբանական ակտիվության «զսպում», որպեսզի կանխարգելվի կամ մեղմացվի իմունային բջիջների կողմից սեփական երիկամներն ախտահարելու արատավոր մեխանիզմը: Սովորաբար մի քանի ամսվա ընթացում նշանակվում են կորտիկոստերոիդներ՝ մինչև երիկամները սկսեն վերականգնվել, սակայն նույն դեղերի փոքր դեղաչափերը կարող են օգտագործվել նաև ավելի երկար, նույնիսկ՝ տարիների ընթացքում:
Փոխկապված երիկամային անբավարարության բուժում
Սուր գլոմերուլոնեֆրիտի և սուր երիկամային անբավարարության ժամանակ դիալիզը կարող է օգնել ավելցուկային հեղուկները հեռացնելու և բարձր արյան ճնշումը կարգավորելուն: Նման դեպքերում հեմոդիալիզը կարող է լինել ժամանակավոր:
Եթե երիկամներն անդառնալի վնասված են և զարգացել է քրոնիկ երիկամային անբավարարություն, երկարատև բուժման միակ տարբերակը մնում է մշտական «երիկամային» դիալիզը և երիկամի փոխպատվաստումը: Եթե փոխպատվաստման տարբերակը բացառվում է, օրինակ՝ ծանր առողջական վիճակի պատճառով, ողջ կյանքի ընթացքում շարունակվող դիալիզը մնում է միակ հնարավորությունը:
Հոդվածը տեղադրվել է՝ 05-05-2020 վերանայվել է՝ 12-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
