Ախտորոշում - Հելիկոբակտեր

Կան H. pylori վարակը հայտնաբերող մի քանի թեստեր և միջոցառումներ:

Թեստավորումն անհրաժեշտ է H. pylori բակտերիան հայտնաբերելու համար: Բուժումից հետո կրկնակի հետազոտությունը կարևոր է համոզվելու համար, որ H. pylori-ն անհետացել է: Թեստերը կարող են կատարվել կղանքի նմուշի միջոցով, շնչառության թեստի և վերին էնդոսկոպիկ հետազոտության միջոցով:

Կղանքի թեստեր

• Կղանքի հակածնային (անտիգենային) թեստ. սա H. pylori–ի հայտնաբերման ամենահաճախ օգտագործվող կղանքի թեստն է: Թեստը հիմնված է կղանքի մեջ H. pylori բակտերիայի հետ կապված սպիտակուցների (հակածինների) հայտնաբերման վրա:
• Կղանքի ՊՇՌ (PCR) թեստ. լաբորատոր թեստը, որը կոչվում է կղանքի պոլիմերազային շղթայական ռեակցիայի (ՊՇՌ, PCR) թեստ, կարող է հայտնաբերել կղանքի մեջ H. pylori բակտերիաներ: Թեստը նաև կարող է բացահայտել այն մուտացիաները, որոնք կարող են կայուն լինել H. pylori-ի բուժման մեջ օգտագործվող հակաբիոտիկների նկատմամբ: Այնուամենայնիվ, այս թեստն ավելի թանկարժեք է, քան անտիգենային թեստը և կարող է հասանելի չլինել բոլոր բժշկական կենտրոններում:

Շնչառական թեստ

Շնչառական թեստի ընթացքում, որը կոչվում է միզանյութի (ուրեա) շնչառական թեստ, դուք կուլ եք տալիս հաբ, հեղուկ կամ փոշի, որը պարունակում է ռադիոակտիվ նշված ածխածնի մոլեկուլներ: Եթե ունեք H. pylori վարակ, ձեր ստամոքսի H. pylori բակտերիաների հետ շփվելիս ածխածինն արտազատվում է:

Ածխածինն օրգանիզմից հեռանում է արտաշնչելիս: Թոքերով հեռացող ածխածինը չափելու համար ձեզ խնդրում են, որ փչեք տոպրակի մեջ: Հատուկ սարքը հայտնաբերում է ածխածնի մոլեկուլները։ Այս թեստը կարող է օգտագործվել չափահասների և 6 տարեկանից բարձր երեխաների համար, ովքեր կարող են հաջողությամբ մասնակցել հետազոտությանը:

Էնդոսկոպիկ թեստ (գաստրոդուոդենոսկոպիա)

Ձեր բժիշկը կարող է առաջարկել էնդոսկոպիկ հետազոտություն, որը հայտնի է որպես վերին էնդոսկոպիա: Բժիշկը կարող է կատարել այս թեստը՝ ստուգելու այն նշանները, որոնք կարող են առաջանալ պեպտիկ խոցի կամ գաստրիտի պատճառով, որոնք իրենց հերթին կարող են պայմանավորված լինել H. pylori վարակով:

Այս քննության համար ձեզ կտրվեն դեղամիջոցներ, որոնք կօգնեն ձեզ թուլանալ և ավելի հեշտությամբ տանել հետազոտության հետ կապված անհարմարությունը: Քննության ընթացքում բժիշկն ազատ ծայրին փոքրիկ տեսախցիկ ունեցող երկար, ճկուն խողովակը (էնդոսկոպ) ձեր կոկորդով և կերակրափողով ներմուծում է մինչև ձեր ստամոքս և բարակ աղու սկզբնական հատված (տասներկումատնյա աղի): Այս գործիքը թույլ է տալիս ձեր բժշկին տեսնել ձեր վերին մարսողական խողովակի խնդիրները: Բժիշկը նաև կարող է վերցնել հյուսվածքային նմուշներ (բիոպսիա), որոնք լաբորատորիայում հետազոտվում են H. pylori բակտերիաներ գտնելու համար:

Այս հետազոտությունն ավելի ինվազիվ է, քան շնչառական կամ կղանքի թեստը, ուստի սովորաբար առաջարկվում է H. pylori վարակի հետ մեկտեղ մարսողական այլ խնդիրներն ախտորոշելու համար: Բժիշկները նաև կարող են օգտագործել էնդոսկոպիկ հետազոտություն՝ ճշգրիտ որոշելու, թե որ հակաբիոտիկը կարող է լավագույնս ազդել H. pylori վարակի վրա, հատկապես, եթե առաջին փորձված հակաբիոտիկները ձեզ չեն ազատել վարակից:

Վերին էնդոսկոպիան կարող է կրկնվել բուժումից հետո՝ կախված նրանից, թե ինչ է հայտնաբերվել առաջին էնդոսկոպիայի ժամանակ կամ եթե H. pylori վարակի բուժումից հետո ախտանիշները շարունակվում են:

Կարևոր նկատառումներ

Հակաբիոտիկները կարող են նվազեցնել թեստի ճշգրտությանը: Ընդհանուր առմամբ, կրկնակի թեստը կատարվում է միայն հակաբիոտիկների ընդունումը չորս շաբաթով դադարեցնելուց հետո, եթե դա հնարավոր է:

Թթուն ճնշող դեղամիջոցները, որոնք հայտնի են որպես պրոտոնային պոմպի արգելակիչներ (ինհիբիտորներ) և Բիսմութի սուբսալիցիլատը (Պեպտո-Բիսմոլ) նույնպես կարող են նվազեցնել այս հետազոտությունների ճշգրտությունը: Նույն կերպ թեստի արդյունքի վրա կարող են ազդել հիստամինային (H2) պաշարիչները: Կախված նրանից, թե ինչ դեղամիջոցներ եք ընդունում, դուք պետք է հնարավորության դեպքում դադարեցնեք դրանք թեստից առնվազն երկու շաբաթ առաջ: Ձեր բժիշկը ձեզ հատուկ հրահանգներ կտա ձեր դեղերի օգտագործման վերաբերյալ:

Նույն թեստերը, որոնք օգտագործվում են ախտորոշման համար, կարող են նաև առաջարկվել՝ պարզելու, թե արդյոք բուժումից հետո H. pylori վարակն անհետացել է: Եթե նախկինում ձեզ մոտ ախտորոշվել է H. pylori վարակ, հակաբիոտիկային բուժումն ավարտելուց հետո սովորաբար կսպասեք առնվազն չորս շաբաթ՝ նույն թեստերը կրկնելու համար: