Հեպատիտ C

Հեպատիտ C-ն վիրուսային վարակ է, որն առաջացնում է լյարդի բորբոքում և երբեմն կարող է բերել լյարդի ծանր ախտահարման։

Հեպատիտ C վիրուսը (HCV) տարածվում է վարակված արյան միջոցով։

Հեպատիտ C վարակը կարող է լինել՝

  • սուր, որը կարճատև հիվանդություն է և դրսևորվում է վարակվելուց 6-7 շաբաթ հետո
  • քրոնիկ, որը տասնամյակներ կամ ողջ կյանքի ընթացքում շարունակվող հիվանդություն է և կարող է բարդանալ լյարդի ծանր ախտահարմամբ:

Սուր հեպատիտ C-ով մարդկանց 75-85%-ի մոտ հիվանդությունը քրոնիկանում է։ Մյուսներն առանց որևէ բուժման կարող են առողջանալ։ Դուք կարող եք ունենալ քրոնիկ հեպատիտ C և չներկայացնել որևէ գանգատ կամ ախտանիշ։

Եթե արյան հետազոտությամբ հեպատիտ C-ն հաստատվում է և բժիշկը գտնում է, որ ձեզ ցուցված է բուժում, ապա նշանակում է հակավիրուսային դեղեր։ Սուր հեպատիտ C-ի բուժումը կարող է օգնել, որ նվազի հիվանդության քրոնիկացման հավանականությունը։

Մինչև վերջերս հեպատիտ C-ի բուժումը պահանջում էր ամենշաբաթյա ներարկումներ և ներքին ընդունման դեղամիջոցներ, որոնք բազմաթիվ վարակված մարդիկ չէին կարող ստանալ այլ առողջական խնդիրների և անընդունելի կողմնակի ազդեցությունների պատճառով: Այսօր քրոնիկ հեպատիտ C-ն դարձել է բուժելի 2-6 ամսվա ընթացքում ամենօրյա ներքին ընդունման դեղամիջոցներով (հաբեր):

Հեպատիտ C-ով մարդկանց գրեթե կեսը տեղյակ չէ, որ ունի այս վարակը, քանի որ չի նշում որևէ ախտանիշ: Վարակի նման «համր» ընթացքը կարող է շարունակվել տասնամյակներ: Ուստի ԱՄՆ-ում 18-79 տարեկան բոլոր չափահասներին խորհուրդ է տրվում անցնել հեպատիտ C-ի սքրինինգային հետազոտություն: Ամենամեծ ռիսկի ենթարկվում են 1945-ից մինչև 1965-ը ծնված մարդկիկ, քանի որ տարիքային այս միջակայքում հեպատիտ C-ով վարակված լինելու ռիսկը հնգակի բարձր է:

Պաշտպանված սեռական հարաբերությունները և արյուն-արյուն շփման բացառումը կարող են զգալի կերպով կանխարգելել հեպատիտ C վիրուսի տարածումը։

Հոդվածը վերանայվել է՝ 17-05-2021