Հեպատիտ C. ախտորոշում

2 րոպե

Հեպատիտ C-ի սքրինինգի, ախտորոշման և լյարդի վնասման չափը գնահատելու համար օգտագործվում են տարբեր մեթոդներ:

Հեպատիտ C-ի սքրինինգ

ԱՄՆ-ի Կանխարգելիչ ծառայությունների աշխատանքային խումբը խորհուրդ է տալիս, որ 18-ից 79 տարեկան բոլոր չափահասներն անցնեն հեպատիտ C-ի (HCV) սքրինինգ, նույնիսկ նրանք, ովքեր չունեն ախտանիշներ կամ հայտնի լյարդային հիվանդություն: HCV-ի սքրինինգը հատկապես կարևոր է, եթե դուք գտնվում եք ազդեցության բարձր ռիսկի տակ, այդ թվում՝

• յուրաքանչյուր ոք, ով երբևէ ներարկել կամ ներշնչել է ապօրինի թմրամիջոցներ
• յուրաքանչյուր ոք, ով ունի շեղված լյարդի գործունեության թեստի արդյունքներ՝ առանց բացահայտված պատճառի
• հեպատիտ C-ով հիվանդ մայրերից ծնված երեխաներ
• բուժհիմնարկների և շտապ օգնության աշխատողներ, ովքեր ենթարկվել են արյան կամ պատահական ասեղի ծակոցի
• հեմոֆիլիա ունեցող մարդիկ, ովքեր մինչև 1987-ը բուժում էին մակարդման գործոններով
• մարդիկ, ովքեր անցել են երկարատև հեմոդիալիզի բուժում
• մարդիկ, ովքեր արյան փոխներարկում կամ օրգանների փոխպատվաստում են ստացել մինչև 1992-ը
• հեպատիտ C-ով վարակված յուրաքանչյուրի սեռական զուգընկերները
• ՄԻԱՎ վարակով մարդիկ
• յուրաքանչյուր ոք, ով ծնվել է 1945-ից 1965 թվականներին
• ցանկացած ոք, ով եղել է բանտում:

Այլ արյան թեստեր

Եթե նախնական արյան թեստի արդյունքը ցույց է տալիս, որ ունեք հեպատիտ C, լրացուցիչ արյան թեստերը կարող են՝

• չափել ձեր արյան մեջ հեպատիտ C վիրուսի քանակը (վիրուսային բեռնվածություն կամ տիտր)
• նույնականացնել վիրուսի գենոտիպը:

Լյարդի վնասումը գնահատող թեստեր

Բժիշկները սովորաբար օգտագործում են հետևյալ թեստերից մեկը կամ մի քանիսը քրոնիկ հեպատիտ C-ի դեպքում լյարդի վնասի չափը գնահատելու համար:

• Մագնիսական ռեզոնանսային էլաստոգրաֆիա (MRE). լյարդի բիոպսիայի ոչ ինվազիվ այլընտրանք (տե՛ս ստորև) MRE-ը համատեղում է մագնիսական ռեզոնանսային տոմոգրաֆիայի (ՄՌՏ) տեխնոլոգիան ձայնային ալիքների հետ՝ ստեղծելով տեսողական քարտեզ, որը ցույց է տալիս լյարդի պնդության աստիճանները: Լյարդի պնդացած հյուսվածքը վկայում է քրոնիկ հեպատիտ C-ի հետևանքով լյարդի սպիների (ֆիբրոզի) առկայության մասին:
• Անցումային (տրանզիենտ) էլաստոգրաֆիա. սա մեկ այլ ոչ ինվազիվ թեստ է՝ գերձայնային հետազոտության մի տեսակ է, որը փոխանցում է ձայնային տատանումները լյարդ և չափում լյարդի հյուսվածքով դրանց ցրման արագությունը՝ գնահատելու դրա պնդացման աստիճանը:
• Լյարդի բիոպսիա. սովորաբար այս հետազոտությունը կատարվում է գերձայնային ուղղորդման միջոցով, որը ներառում է որովայնի պատի միջով բարակ ասեղ ներմուծումը՝ լաբորատոր թեստի համար լյարդային հյուսվածքի փոքր նմուշ հեռացնելու համար:
• Արյան թեստեր. արյան մի շարք թեստեր կարող են ցույց տալ ձեր լյարդի ֆիբրոզի չափը: