Բարձր արյան ճնշում. դեղեր

Բարձր արյան ճնշում. դեղեր

Բարձր արյան ճնշումը նվազեցնող դեղերը նաև կոչվում են հակագերճնշումային (հակահիպերտենզիվ) դեղեր կամ, ինչպես ընդունված է պացիենտների շրջանում, ճնշման դեղեր:

  • Միզամուղներ (դիուրետիկներ). այս դեղերը խթանում են օրգանիզմից նատրիումի և ջրի հեռացումը: Դրանք հաճախ բարձր արյան ճնշման բուժման առաջին դեղամիջոցներն են: Կան միզամուղների տարբեր դասեր, ներառյալ՝ թիազիդային, կանթային և կալում խնայող: Այն, թե բժիշկն այս խմբերից որ դեղամիջոցը ձեզ կնշանակի, կախված է ձեր արյան ճնշման ցուցանիշներից և այլ առողջական խնդիրներից, օրինակ՝ երիկամային հիվանդության կամ սրտային անբավարարություն: Արյան ճնշումը նվազեցնելու համար ավելի հաճախ նշանակվում են Քլորթալիդոն, Հիդրոքլորթիազիդ (Միկրոզիդ) և այլն։ Միզամուղների տարածված կողմնակի ազդեցությունը խթանված միզարձակումն է: Շատ միզելը կարող է նվազեցնել արյան կալիումի մակարդակը: Կալիումի բավարար քանակներն անհրաժեշտ են սրտի ճիշտ կծկման համար: Եթե ունեք ցածր կալիում (հիպոկալեմիա), բժիշկը կարող է խորհուրդ տալ որևէ կալիում խնայող միզամուղ, որը պարունակում է Տրիամտերեն։
  • Անգիոտենզին փոխակերպող ֆերմենտի (ԱՓՖ) արգելակիչներ (ինհիբիտորներ). ԱՓՖ արգելակիչներն օգնում են արյունատար անոթների թուլացմանը: Դրանք արգելակում են արյունատար անոթները նեղացնող բնական քիմիական միացության արտադրությունը: Օրինակներից են՝ Լիզինոպրիլ (Պրինիվիլ, Զեստրիլ), Բենազեպրիլ (Լոտենզին), Կապտոպրիլ (Կապոտեն) և այլն:
  • Անգիոտենզին II ընկալիչների պաշարիչներ (բլոկատորներ). այս դեղերը նույնպես թուլացնում են արյունատար անոթները: Սակայն, դրանք ոչ թե արգելակում են արյունատար անոթները նեղացնող բնական քիմիական միացության արտադրությունը, այլ պաշարում դրա ազդեցությունը: Այս խումբը ներառում է՝ Կանդեսարտան (Ատականդ), Լոզարտան (Կոզաար) և այլն:
  • Կալցիումական անցուղիների պաշարիչներ (բլոկատորներ). այս դեղերն օգնում են արյունատար անոթների մկանների թուլացմանը: Դրանցից որոշները դանդաղեցնում են ձեր սրտի ռիթմը: Այս խմբի օրինակներից են՝ Ամլոդիպին (Նորվազք), Դիլթիազեմ (Կարդիզեմ, Տիազակ և այլն) և այլն: Կալցիումի բլոկատորները կարող են ավելի լավ ազդել մեծ տարիքով կամ սևամորթ մարդկանց շրջանում, քան առանձին վերցրած ԱՓՖ ինհիբիտորները: Նկատի ունեցեք, որ կալցիումի բլոկատոր ընդունելիս պետք է հրաժարվել գրեպֆրութից, քանի որ վերջինս բարձրացնում է արյան մեջ որոշ դեղերի մակարդակը, որը կարող է լինել վտանգավոր:

Այլ դեղեր, որոնք երբեմն օգտագործվում են բարձր արյան ճնշման բուժման մեջ

Եթե վերոնշյալ խմբի դեղերով կամ դրանց զուգակցումներով չի հաջողվում հասնել արյան ճնշման ցանկալի ցուցանիշներին, բժիշկը կարող է կատարել լրացուցիչ նշանակումներ:
  • Ալֆա պաշարիչներ (բլոկատորներ). այս խմբի դեղամիջոցները թուլացնում են արյունատար անոթներին ուղարկվող նյարդային ազդանիշները: Դրանք օգնում են արյունատար անոթները նեղացնող բնական քիմիական միացությունների ազդեցությունները: Оրինակներից են՝ Դոքսազոզին (Կարդուրա), Պրազոզին (Մինիպրես) և այլն։
  • Ալֆա բետա պաշարիչներ (բլոկատորներ). ալֆա բետա բլոկատորներն արգելակում են արյունատար անոթներին ուղարկվող նյարդային ազդանիշները և դանդաղեցնում սրտազարկը: Դրանք կրճատում են անոթներ արտամղվող արյան քանակը: Oրինակներից են՝ Կարվեդիլոլ (Կորեգ) և Լաբետալոլ (Տրանդատե)։
  • Բետա պաշարիչներ (բլոկատորներ). այս դեղամիջոցները նվազեցնում են սրտի բեռնվածությունը և լայնացնում արյունատար անոթները: Սա օգնում է սրտի ռիթմի դանդաղեցմանը և կծկողական ուժի թուլացմանը: Оրինակներից են՝ Ատենոլոլ (Տենորմին), Մետոպրոլոլ (Լոպրասոր և այլն) և այլն: Բետա բլոկատորները սովորաբար առանձին չեն նշանակվում, սակայն կարող են զուգակցվել արյան ճնշման այլ դեղերի հետ:
  • Ալդոստերոնի ներհակորդներ (անտագոնիստներ). այս դեղերը կարող են օգտագործվել կայուն հիպերտենզիայի բուժման մեջ: Դրանք արգելակում են օրգանիզմում կերակրի աղի և ջրի պահպանմանը և կուտակմանը։ Оրինակներից են՝ Սպիրոնոլակտոն (Ալդակտոն) և Էպլերենոն (Ինսպրա):
  • Ռենինի արգելակիչներ (ինհիբիտորներ). Ալիսկիրենը (Տեկտունա) դանդաղեցնում է ռենինի արտադրությունը՝ երիկամներում արտադրվող ֆերմենտ, որը մեկնարկում արյան ճնշումը բարձրացնող քիմիական փուլերի շղթան: Ալիսկիրենը չի կարելի զուգակցել ԱՓՖ ինհիբիտորների կամ ԱԸՊ հետ լուրջ բարդությունների, այդ թվում՝ ինսուլտի ռիսկի բարձրացման պատճառով:
  • Անոթալայնիչներ (վազոդիլատատորներ). այս դեղերն արգելակում են զարկերակների պատի մկանների կծկանքը, որի շնորհիվ կանխարգելվում է դրանց նեղացումը: Օրինակներից են՝ Հիդրալազին և Մինօքսիդիլ:
  • Կենտրոնական ազդեցության նյութեր. այս դեղերը կանխարգելում են սրտի ռիթմի բարձրացման և անոթների նեղացման բերող գլխուղեղից դեպի նյարդային համակարգ հաղորդվող ազդանիշները։ Օրինակներից են՝ Կլոնիդին (Կատապրես, Կապվայ), Գուանֆացին (Ինտունիվ) և Մեթիլդոպա:

Հոդվածը վերանայվել է՝ 26-01-2023