Բարձր արյան ճնշում. ախտանիշներ

Բարձր արյան ճնշում. ախտանիշներ

Զարկերակային հիպերտենզիայով կամ գերճնշմամբ բազմաթիվ մարդիկ կարող է որևէ գանգատ կամ ախտանիշ չնշել, նույնիսկ եթե ճնշման ցուցանիշները վտանգավոր բարձր ցուցանիշների են հասել:

Արյան բարձր ճնշմամբ քիչ մարդիկ կարող են գանգատվել գլխացավերից, գլխապտույտից, օդի պակասի զգացումից և հևոցից կամ քթային արյունահոսությունից, սակայն այս ախտանիշները յուրահատուկ չեն և սովորաբար չեն զարգանում, քանի դեռ հիպերտենզիան չի հասնում ծանր կամ կյանքին սպառնացող փուլերին:

Հազվադեպ, հատկապես արյան ճնշման վտանգավոր բարձր թվերի հասնելու դեպքում կարող են ի հայտ գալ նաև կրծքավանդակի ձախ կեսի ցավեր կամ ինսուլտին բնորոշ որոշ ախտանիշներ։

Ե՞րբ այցելել բժշկին

Որպես կանոն, ձեր զարկերակային ճնշումը չափվում է բժշկին այցելելիս՝ լինի դա պլանային կամ որևէ այլ առիթով: Բազմաթիվ մարդիկ տանն ունեն ճնշում չափող սարք (տոնոմետր) և օգտվում են դրանից:

Արյան ճնշումը պետք է չափվի երկու բազուկների վրա. սա թույլ է տալիս ստուգել ձեռքերի միջև տարբերությունը: Կարևոր է օգտագործել ճիշտ չափի մանժետ (թևքածալ): Զարկերակային ճնշումը ճիշտ չափելու տեխնիկայի մասին զրուցեք նաև ձեր բժշկի կամ բուժքրոջ հետ: Նրանք կարող են նաև ձեզ ներկայացնել, թե ինչ է առողջ արյան ճնշումը, ինչպես պահպանել այն նորմալ միջակայքում և անհրաժեշտության դեպքում ինչպես նվազեցնել այն:

Եթե ձեզ մոտ ախտորոշվել է բարձր արյան ճնշում կամ ունեք սրտանոթային հիվանդությունների այլ ռիսկի գործոններ, բժիշկը կարող է առաջարկել, որ ձեր ճնշումը չափվի հաճախակի:

Պլանային այցերից բացի կապ հաստատեք ձեր բժշկի հետ, եթե կարծում եք, որ ունեք զարկերակային ճնշման հետ կապված որևէ խնդիր կամ սրտանոթային հիվանդության զարգացման բարձր ռիսկ, որը պետք է կառավարել:

Հոդվածը վերանայվել է՝ 09-05-2021