Բարձր արյան ճնշում. ինքնօգնություն

Բարձր արյան ճնշում. ինքնօգնություն

Զարկերակային գերճնշումը կամ հիպերտենզիան այնպիսի խնդիր չէ, որը կարելի է մեկ անգամ բուժել և հետո անտեսել:

Հիպերտենզիան լուրջ հիվանդություն է, որը դուք պետք է կառավարեք ձեր ողջ կյանքի ընթացքում:

Ձեր զարկերակային ճնշումը ճիշտ վերահսկելու համար հետևեք այս կանոններին:

  • Պատշաճ կերպով ընդունե՛ք ձեզ նշանակած դեղերը. եթե կողմնակի ազդեցությունները կամ դեղերի գները առաջացնում են որոշակի խնդիրներ, երբեք ինքնուրույն մի՛ դադարեցրեք դրանց ընդունումը: Զրուցեք բժշկի հետ այլ հնարավորությունների կամ տարբերակների մասին:
  • Պարբերաբար այցելե՛ք ձեր բժշկին. զարկերակային գերճնշման ճիշտ վերահսկումը պահանջում է ձեր բժշկի հետ համատեղ նպատակասլաց ջանքեր: Ոչ դուք միայնակ, ոչ էլ բժիշկը միայնակ կարող է արդյունավետ բուժել ձեր հիվանդությունը: Հակառակը, բժշկի հետ միասին դուք կարող եք ընտրել ձեր բարձր ճնշման ու դրա բարդությունների վերահսկման լավագույն տարբերակը:
  • Սկսե՛ք ապրել առողջ. անցեք առողջ սննդակարգի, ձերբազատվեք ծխախոտից (եթե ծխում եք), չափավորեք ալկոհոլի օգտագործումը (եթե օգտագործում եք), կարգավորեք ձեր մարմնի քաշը և, իհարկե, դարձեք ֆիզիկապես ակտիվ:
  • Կառավարե՛ք սթրեսը. ձեզ ազատեք լրացուցիչ գործերից, ազատվեք բացասական մտքերից, պահպանեք լավ փոխհարաբերություններ և մնացեք համբերատար ու լավատես:

Որոշ մարդկանց համար ապրելակերպի առողջացման փոփոխությունները կարող են դժվար թվալ, հատկապես, եթե չեն տեսնում կամ զգում բարձր արյան ճնշման որևէ ախտանիշ: Եթե ձեզ շարժառիթ է պետք, հիշեք չկարգավորված բարձր արյան ճնշման հետ կապված ռիսկերն ու հետևանքները: Ձեզ կարող են մեծապես օգնել ու աջակցել նաև ընտանիքի անդամները և ընկերները:

Այլընտրանքային միջոցներ

Թեև սննդակարգն ու վարժանքերը բարձրացած արյան ճնշումը նվազեցնելու լավագույն մոտեցումներն են, որոշ հավելումներ նույնպես կարող են օգտակար լինել: Այնուամենայնիվ, դրանց հնարավոր օգուտներն ապացուցող բժշկագիտական տվյալները քիչ են:

Նման հավելումներից են՝

  • բջջանք, օրինակ՝ ջղախոտ (եզան լեզու) և ցորենի թեփ
  • միներալներ, օրինակ՝ մագնեզիում, կալցիում և կալիում
  • ֆոլաթթու
  • նիտրիտի մոնօքսիդը բարձրացնող կամ անոթները լայնացնող հավելումներ կամ արտադրանքներ, օրինակ՝ կակաո, կոէնզիմ Q10, L-արգինին և սխտոր
  • Օմեգա-3 ճարպաթթուներ, որոնք առկա են յուղոտ ձկներում, ձկան յուղով հարուստ հավելումներ և կտավատի սերմ:

Հետազոտողները նաև ուսումնասիրում են, թե արդյոք վիտամին D-ն նվազեցնում է արյան ճնշումը, քանի որ առկա տվյալները հակասական են:

Լավագույն տարբերակն այս հավելումները որպես մթերք ձեր սննդակարգում ավելացնելն է, սակայն կարող եք նաև ընդունել հավելումների հաբեր կամ պատիճներ: Զրուցեք այս թեմայով ձեր բժշկի հետ, քանի որ որոշ հավելումներ կարող են փոխազդել դեղերի հետ՝ առաջացնելով վնասակար կողմնակի ազդեցություններ (օրինակ՝ արյունահոսության ռիսկի բարձրացում):

Դուք կարող եք նաև փորձել ձեր մարմինը և ուղեղը «թուլացնող» մեթոդներ, օրինակ՝ խոր շնչառություն կամ գիտակցվածություն, որոնք օգնում են թուլացնել սթրեսի անբարենպաստ ազդեցությունը և ժամանակավորապես նվազեցնել զարկերակային ճնշումը:

Հոդվածը վերանայվել է՝ 31-03-2021