Բարդություններ - Հիպերտենզիա

Բարձր արյան ճնշման պայմաններում զարկերակների պատի վրա ավելցուկային ճնշումը կարող է վնասել արյունատար անոթները և օրգանները:

Որքան բարձր է արյան ճնշումը և որքան երկար ժամանակի ընթացքում է այն մնում բուժումից դուրս, այդքան ավելի մեծ է այդ վնասը:

Չկարգավորված բարձր արյան ճնշումը կարող է առաջացնել հետևյալ բարդությունները:

• Սրտամկանի ինֆարկտ կամ ինսուլտ. բարձր արյան ճնշման հետևանքով զարկերակների պատի հաստացումը և պնդացումը կամ այլ գործոնները կարող են հանգեցնել սրտամկանի ինֆարկտի, ինսուլտի և այլ բարդությունների:
• Անևրիզմա. բարձրացած արյան ճնշումը կարող է առաջացնել արյունատար անոթների թուլացման և պարկաձև արտափքման՝ ձևավորելով անևրիզմա: Անևրիզմայի պատռումը կարող է դառնալ կյանքին սպառնացող:
• Սրտային անբավարարություն. բարձր արյան ճնշման պայմաններում սիրտն աշխատում է ավելի մեծ ծանրաբեռնվածությամբ, որ կարողանա արտամղել արյունը: Նման լարվածության պատճառով սրտի արտամղող խոռոչը սկսում է հաստանալ` բերելով ձախ փորոքի գերաճի (հիպերտրոֆիա): Ի վերջո, սիրտը չի կարողանում արտամղել օրգանիզմի պահանջներին համապատասխանող բավարար արյուն և զարգանում է սրտային անբավարարություն:
• Երիկամային խնդիրներ. բարձր արյան ճնշումը կարող է առաջացնել երիկամների արյունատար անոթների նեղացում կամ թուլացում: Սա կարող է հանգեցնել երիկամների վնասման:
• Աչքի խնդիրներ. բարձրացած արյան ճնշումը կարող է առաջացնել աչքերում արյունատար անոթների հաստացում, նեղացում կամ պատռում:
• Մետաբոլիկ համախտանիշ. այս համախտանիշը խմբավորում է օրգանիզմի նյութափոխանակության մի շարք խանգարումներ: Այն ներառում է շաքարի (գլյուկոզի) անկանոն տրոհումը: Մետաբոլիկ համախտանիշը նաև ներառում է իրանի շրջանագծի մեծացումը (որովայնային գիրություն), բարձր տրիգլիցերիդները, արյան «լավ» խոլեստերինի (բարձր խտության լիպոպրոտեիդների (ԲԽԼ) խոլեստերին) նվազեցումը, բարձր արյան ճնշումը և արյան շաքարի բարձր մակարդակները: Թվարկված խնդիրները բարձրացնում են դիաբետի (շաքարախտ), սրտային հիվանդության և ինսուլտի զարգացման ռիսկերը:
• Հիշողության կամ ընկալման խնդիրներ. չկառավարվող բարձր արյան ճնշումը կարող է ազդել մտածելու, հիշելու և սովորելու ունակությունների վրա:
• Դեմենցիա. նեղացած կամ խցանված զարկերակները կարող են կրճատել գլխուղեղի արյան հոսքը: Սա կարող է առաջացնել թուլամտության (դեմենցիա) մի տեսակի, որը կոչվում է անոթային (վասկուլյար) դեմենցիա: Գլխուղեղի արյան հոսքն ընդհատող ինսուլտը ևս կարող է առաջացնել վասկուլյար դեմենցիա: