Բուժում - Հիպերտենզիա

Ապրելակերպի փոփոխությունը կարող է օգնել բարձր արյան ճնշման վերահսկմանը և կառավարմանը:

Բժիշկը կարող է խորհուրդ տալ ապրելակերպի հետևյալ փոփոխությունները՝

• քիչ աղի պարունակող «առողջ սրտի» սննդակարգ
• կանոնավոր ֆիզիկական վարժանքներ
• առողջ քաշի պահպանում կամ քաշի նվազեցում
• ալկոհոլի սահմանափակում
• ծխախոտից հրաժարում
• օրական 7-9 ժամյա քուն:

Երբեմն միայն ապրելակերպի փոփոխությունները բարձր արյան ճնշման բուժման համար բավարար չեն: Եթե դրանք չեն օգնում, բժիշկը կարող է խորհուրդ տալ ձեր արյան ճնշումը նվազեցնող դեղեր:

Դեղեր

Հիպերտենզիայի բուժման մեջ օգտագործվող դեղի տեսակը կախված է ձեր ընդհանուր առողջական վիճակից և արյան ճնշման բարձրացման աստիճանից: Հաճախ երկու և ավելի տեսակի դեղամիջոցների զուգակցումն ավելի արդյունավետ է, քան միայն մեկ դեղով բուժումը (մոնոթերապիա): Ձեզ համար ամենաարդյունավետ դեղի կամ դեղերի լավագույն զուգակցման ընտրությունը կարող է պահանջել որոշակի ժամանակ:

Երբ ստանում եք արյան ճնշման դեղ կամ դեղեր, կարևոր է իմանալ ձեր ցանկալի (թիրախային) արյան ճնշման մակարդակը: Դուք պետք է ձգտեք հասնելու 130/80 մմ ս.ս.-ից ցածր ցուցանիշներին, եթե՝

• առողջ չափահաս եք և ձեր տարիքը 65 և ավելի բարձր է
• մինչև 65 տարեկան առողջ չափահաս եք և ունեք մոտակա 10 տարվա ընթացքում սրտանոթային հիվանդության զարգացման 10% և ավելի բարձր ռիսկ
• ունեք քրոնիկ երիկամային հիվանդություն, դիաբետ կամ սրտի իշեմիկ հիվանդություն:

Հարցրեք բժշկին, թե արյան ճնշման որ թվերն են հանդիսանալու ձեր բուժման նպատակը:

Զարկերակային գերճնշման բուժման համար բժիշկը կարող է նշանակել դեղերի հետևյալ տեսակներից մեկնումեկը կամ երկու կամ ավելի տեսակների զուգակցումներ՝

• միզամուղներ
• անգիոտենզին փոխակերպող ֆերմենտի (ԱՓՖ) արգելակիչներ (ԱՓՖ ինհիբիտորներ)
• անգիոտենզին II ընկալիչների պաշարիչներ (բլոկատորներ)
• կալցիումական անցուղիների պաշարիչներ (կալցիումի անտագոնիստներ)։

Որոշ դեպքերում, եթե այս խմբերի դեղերը բավարար արդյունք չեն ապահովում, բժիշկը կարող է ավելացնել լրացուցիչ դեղամիջոցներ:

Իմացե՛ք ավելին զարկերակային գերճնշման բուժման դեղերի մասին:

Կայուն հիպերտենզիայի բուժումը

Դուք կարող եք ունենալ կայուն (ռեզիստենտ) հիպերտենզիա, եթե՝

• ընդունում եք առնվազն 3 տարբեր արյան ճնշման դեղեր, այդ թվում՝ միզամուղ, սակայն ձեր արյան ճնշումը մնում է կայուն բարձր
• բարձր արյան ճնշումը հսկելու համար ընդունում եք 4 տարբեր դեղեր (նման դեպքերում բժիշկը պետք է ստուգի բարձր արյան ճնշման երկրորդային պատճառները):

Ռեզիստենտ հիպերտենզիայի առկայությունը բնավ չի նշանակում, որ ձեր արյան ճնշումը երբեք չի նվազի: Եթե դուք և ձեր բժիշկը միասին կարողանաք գտնել պատճառը, հնարավոր է ավելի արդյունավետ բուժման մեկնարկ:

Ռեզիստենտ հիպերտենզիայի բուժումը կարող է ներառել բազմաթիվ փուլեր, այդ թվում՝

• արյան ճնշման դեղերի փոփոխում, որ գտնեք լավագույն համակացումը և դեղաչափերը
• օգտագործվող բոլոր, այդ թվում՝ առանց դեղատոմսի նշանակվող դեղերի վերանայում
• արյան ճնշման չափում տանը («սպիտակ խալաթի» հիպերտենզիան բացառելու համար)
• ապրելակերպի առողջացում՝ առողջ սնունդ, քաշի կարգավորում և այլն:

Բարձր արյան ճնշումը հղիության ընթացքում

Եթե հղի եք և ունեք բարձր արյան ճնշում, քննարկեք բժշկի հետ, թե ինչպես ճիշտ կառավարել ձեր արյան ճնշումը:

Իմացե՛ք ավելին հղիության ընթացքում հիպերտենզիայի մասին: