Հիստերէկտոմիան մեծ վիրահատություն է, որի նպատակը ձեր արգանդը հեռացնելն է:
Արգանդի ամբողջական հեռացման ժամանակ, որը կոչվում է «տոտալ հիստերէկտոմիա», արգանդի ստորին մասը` պարանոցը, որը հարում է հեշտոցին, նույնպես հեռացվում է:
Բժիշկը ձեզ կարող է առաջարկել հիստերէկտոմիա, եթե դուք ունք արգանդի քաղցկեղ կամ այնպիսի ախտանիշներն, ինչպիսին է առատ արյունահոսությունը, այլ բուժումներով չեն բարելավվում:
Հիստերէկտոմիայի տեսակները
Արգանդի հեռացման վիրահատությունը կարող է լինել՝
- որովայնային (աբդոմինալ), երբ ձեր արգանդը հեռացվում է որովյանի ստորին մասում կատարված կտրվածքով
- հեշտոցային (վագինալ), երբ ձեր արգանդը հեռացվում է հեշտոցի միջով
- լապարոսկոպիկ, երբ որովայնի պատի փոքր կտրվածքներով ներմուծվում են հատուկ խողովակաձև գործիքներ և արգանդը հեռացվում է դրանց օգնությամբ:
Դուք պետք է բժշկի հետ քննարկեք, թե այս մեթոդներից որն է ձեր դեպքում ամենահարմարն ու ցուցվածը:
Արգանդը հեռացնելուց հետո դուք այլև չեք կարող հղիանալ, ուստի համոզվեք, որ վիրահատությունից հետո դուք այլևս չեք ցանկանալու հղի դառնալ:
Ինչո՞ւ պետք է ես կրեմ այս վիրահատությունը
Բժիշկը կարող է ձեզ առաջարկել հիստերէկտոմիա, եթե դուք ունեք՝
- արգանդի, արգանդի պարանոցի, արգանդի լորձաթաղանթի (էնդոմետրիում) կամ ձվարանի քաղցկեղ
- արգանդի ոչ քաղցկեղային ուռուցքներ (օրինակ՝ միոմատոզ արգանդ)
- էնդոմետրիոզ, երբ ձեր արգանդի լորձաթաղանթը սկսում է աճել արգանդից դուրս
- անկանոն, առատ կամ խիստ երկարացած դաշտաններ
- քրոնիկ կոնքային ցավ (երբ բոլոր հնարավոր պատճառները բացառվում են):
Քանի դեռ ձեզ մոտ քաղցկեղ չեն հայտնաբերել, բժիշկը հավանաբար նախ կառաջարկի այլ բուժումներ, օրինակ՝ դեղեր կամ ավելի փոքր վիրահատական միջամտություններ:
Կախված ձեր առողջական խնդրից, բժիշկը կարող է նաև խորհուրդ տալ, որ արգանդի հետ միասին հեռացվեն վզիկը, ձվարանները և ֆալոպյան փողերը:
Հիստերէկտոմիայից վերականգնումը
Հիստերէկտոմիան ունի ռիսկեր, օրինակ՝ առատ արյունահոսություն և վարակ, որը դուք պետք է քննարկեք վիրահատող բժշկի հետ: Դուք կարող են նաև վիրահատությունից հետո զգալ ընդհանուր անզգայացման որոշ կողմնակի կամ մնացորդային ազդեցություններ:
Դուք հավանաբար հիվանդանոցում կանցկացնենք առնվազն 2, միջինը՝ մինչև 7 օր:
Այս ընթացքում և հիվանդանոցից դուրս գրվելուց հետո մեկ-երկու շաբաթվա ընթացքում կարող է գրանցվել հեշտոցային արյունահոսություն և արտադրություն:
Որոշ կանանց համար հիստերէկտոմիան հուզական առումով դժվար հաղթարահվող վիճակ է, քանի որ նրանք թախծում են կանացի կարևոր օրգանը կորցնելու վերաբերյալ: Մյուսներն արգանդի կորուստն ավելի հեշտությամբ են տանում, առավել ևս, երբ զգում են նախկին գանգատների վերացումը կամ մեղմացումը:
Հիստերէկտոմիայից հետո մի քանի շաբաթվա ընթացքում դուք պետք է խուսափեք որևէ ծանր գործ կատարելուց, նաև` ավտոմեքենա վարելուց: Խորհուրդ է տրվում նաև 6 շաբաթվա ընթացքում զերծ մնալ սեռական հարաբերությունից: Հոգնեցնող կարող է լինել նաև երկար ժամանակ ոտքի վրա մնալը:
Դուք պետք է շտապ կապ հաստատեք ձեր բժշկի հետ, եթե ունեք ցավերի սաստկացում, սրտխառնոց, փսխում կամ դաշտանից ավելի առատ արյունահոսություն:
Լրացուցիչ տեղեկատվություն
Վիրահատական միջամտությունների մասին
Այցելե՛ք Մեդեքսի վիրահատական միջամտությունների համապատասխան էջերը, որ լրացուցիչ ընդհանուր բնույթի տեղեկություններ ստանաք վիրահատությունների վերաբերյալ, այդ թվում՝
Հոդվածը հրապարակվել է՝ 29-05-2020
Վերջին վերանայում՝ 06-04-2024