Գրադարան

Լապարոսկոպիկ հիստերէկտոմիա

Time Read 4 րոպե

Այս էջում ձեզ կներկայացվի լապարոսկոպիկ հիստերէկտոմիայի վերաբերյալ հանրամատչելի տեղեկատվություն: Եթե ունեք հարցեր, ապա դիմեք ձեր բժշկին կամ համապատասխան մասնագետին:

Ի՞նչ է հիստերէկտոմիան

Հիստերէկտոմիան ձեր արգանդի հեռացման վիրահատություն է: Արգանդի վզիկը (պարանոց) սովորաբար նույնպես հեռացվում է: Ձեր ֆալոպյան փողերը և ձվարանները նույնպես կարող են նույն վիրահատությամբ միաժամանակ հեռացվել:

Որո՞նք են վիրահատության օգուտները

Հիստերէկտոմիայի ավելի հաճախ հանդիպող պատճառներից են (ցուցումներ)՝

  • առատ կամ ցավոտ դաշտաններ (մենոռագիա և դիսմենառեա), որոնք այլ բուժումներով չեն վերահսկվում
  • ֆիբրոիդ (արգանդի միոմա), երբ ձեր արգանդի մկանների մի մասը գերաճում է:

Հիստերէկտոմիան կարող է բուժել կամ բարելավել ձեր ախտանիշները: Վիրահատությունից հետո դուք այլևս դաշտան չեք ունենա:

Կա՞ արդյոք հիստերէկտոմիային որևէ այլընտրանք

  • Ձեր ախտանիշները գուցե բարելավվեն կոնքի հատակի մկաններն ամրապնդող (Կեգելի) վարժություններով:
  • Առատ դաշտանները կարող են բուժվել տարբեր ոչ հորմոնային և հորմոնային օրալ (ներքին ընդունման կամ խմելու ձևով) դեղերով: Այլ այլընտրանքներից են ներարգանդային համակարգերը՝ սինթետիկ պրոգեստերոն (պրոգեստին) պարունակող և արգանդի խոռոչում տեղադրվող միջոցներ կամ «կոնսերվատիվ վիրահատություն», երբ հեռացվում է միայն արգանդի լորձաթաղանթը:
  • Կախված արգանդի ֆիբրոիդների (միոմաների) չափսերից և տեղակայումից, ձեզ կարող են նշանակել դեղամիջոցներ՝ ուղղված ախտանիշների կառավարմանը: Այլ բուժումներից են միայն ֆիբրոիդների հեռացումը (միոմէկտոմիա) կամ արգանդային զարկերակի էմբոլիզացիան, որի նպատակը ֆիբրոիդների արյունամատակարարումը կրճատելն է (որն էլ բերում է դրանց աճի դադարեցման):

Ի՞նչ է վիրահատությունը ներառում

Վիրահատությունը սովորաբար կատարվում է ընդհանուր անզգայացման ներքո, սակայն ձեզ կարող են առաջարկել նաև անզգայացման այլ տեսակներ: Վիրահատությունը սովորաբար տևում է մոտ 90 րոպե:

Գինեկոլոգը կատարում է փոքր կտրվածք, սովորաբար՝ ձեր պորտի մոտակայքում, որպեսզի այդ բացվածքից ձեր որովայնքի խոռոչ ներմուծի հատուկ գործիք և ներփչի գազ՝ ածխածնի երկօքսիդ (ածխաթթու գազ): Լցվելով որովայնի խոռոչ, այս գազը գմբեթի նման որովայնի պատը բարձրացնում է ներքին օրգանների վրայից և ապահովում վիրահատական գողծողություն իրականացնելու համար բավականաչափ տեսանելիություն և տարածություն:

Այնուհետև գինեկոլոգը ձեր որովայնի պատին կատարում է մի քանի փոքր կտրվածքներ ևս, որոնցով ներմուծում է խողովակաձև հատուկ գործիքներ` լապարոսկոպներ: Լապարոսկոպը կազմված է ոսպնյակ ունեցող տելեսկոպիկ խողովակից, որը սովորաբար կցվում է տեսախցիկին: Ժամանակակից լապարոսկոպները հագեցված են թվային մատրիցաներով և ապահովում են պատկերի բարձր որակ: Խողովակը միացված է նաև օպտիկական մալուխին՝ լուսավորված «սառը» լույսի աղբյուրից (հալոգենային կամ քսենոնային լամպ)։ Այս մեթոդով գինեկոլոգը կարողանում է տեսնել ձեր ներքին օրգանները և կատարել նախատեսված վիրահատությունը:

Գինեկոլոգը որոշ գործիքներ է ներմուծում նաև ձեր հեշտոցի մեջ, որպեսզի օգնի արգանդի հեռացմանը: Վերջինս իրականացվում է՝ կտրվածքներ կատարելով արգանդի պարանոցի շուրջը՝ հեշտոցի վերևում: Նման եղանակով հեռացվում է արգանդը՝ թողնելով հեշտոցը (կոչվում է արգանդի վերհեշտոցային հեռացում):

Ինչպիսի՞ բարդություններ կարող են առաջանալ

Թվարկված բարդություններից որոշները կարող են լինել ծանր և անգամ բերել մահվան:

Որևէ վիրահատության ընդհանուր բարդությունները

  • ցավ
  • անառողջ լինելու զգացում
  • արյունահոսություն
  • վիրահատական շրջանի (վերքի) վարակ
  • վիրահատական սպիից հետվիրահատական ճողվածքի առաջացում
  • արյան մակարդուկներ (թրոմբոզ) ձեր ոտքերում
  • արյան մակարդուկներ (թրոմբոզ) ձեր թոքերում
  • մաշկի սպիական տգեղացում:

Այս վիրահատության առանձնահատուկ բարդությունները

Հիմնական վիրաբուժական բարդությունները

  • վիրահատական էմֆիզեմա
  • այլ կառուցվածքների վնասում, օրինակ՝ հաստ աղիներ, միզապարկ կամ արյունատար անոթներ
  • ճողվածքների զարգացում (լապարոսկոպիկ խողովակների ներմուծման համար կատարված կտրվածքների շրջակայքում)
  • վիրահատական ընթացիկ մեթոդի փոփոխություն և անցում որովայնային (աբդոմինալ) հիստերէկտոմիայի:

Հիստերէկտոմիայի բարդությունները

  • փոքր կոնքի օրգանների վարակ կամ աբսցես
  • արգանդին մոտ գտնվող կառուցվածքների վնասում
  • ախտաբանական հաղորդակցության զարգացում (խուղակ կամ ֆիստուլա)
  • որովայնի խոռոչում արյան կուտակում (հեմատոմա)
  • հեշտոցային մանժետի անբավարարություն:

Երկարաժամկետ խնդիրներ

  • արտանկման առաջացնում (պրոլափս)
  • արգանդի վզիկից շարունակվող արյունահասություն
  • ցավերի շարունակություն
  • սեռական հարաբերության դժվարություն կամ ցավոտություն
  • հյուսվածքների միմյանց միաձուլման խախտումներ (կպումներ)
  • հաճախամիզություն, միզելու անվերահսկելի ցանկություն կամ մեզի ինքնաբուխ արտահոսք, երբ ֆիզիկական գործ եք անում, ծիծաղում եք, հազում կամ փռշտում եք
  • կորուստի զգացում, քանի որ հիստերէկտոմիան ձեզ դարձնում է անպտղունակ
  • դաշտանադադար:

Ինչքա՞ն շուտ ես կվերականգնվեմ

Դուք ի վիճակի կլինեք տուն վերադառնալ, եթե գինեկոլոգը որոշի, որ ձեր առողջական վիճակը բավարար է. սա սովորաբար տեղի է ունենում վիրահատությունից մի քանի օր անց:

Տանը 2 շաբաթվա ընթացքում ձեզ համար ապահովեք հանգիստ պայմաններ, որից հետո շարունակեք հիվանդանոցում ձեզ ներկայացված վարժությունները:

Դուք կարող եք վերադառնալ ձեր աշխատանքին, երբ բժիշկը համոզվի, որ դրա համար բավարար լավ եք զգում (սովորաբար 4-6 շաբաթ անց՝ կախված ձեր աշխատանքի բնույթից): Ձեր զգացողությունները համեմատաբար նորմալանում են մոտ 2-3 ամիս անց:

Կանոնավոր վարժանքները պետք է, որ օգնեն ձեր նախկին ակտիվությունը հնարավորինս շուտ վերականգնելու գործին: Մինչև վարժանքներ սկսելը, զրուցեք ձեր բժշկի հետ:

Բազմաթիվ կանանց մոտ հետվիրահատական վերականգնումն անցնում է առանց բարդությունների, և նրանք վերադառնում են իրենց նախկին գործերին:

Ամփոփում

Հիստերէկտոմիան մեծ վիրահատություն է, որը սովորաբար խորհուրդ է տրվում, երբ ավելի հասարակ բուժումները բավարար արդյունքներ չեն տալիս: Ձեր ախտանիշները վիրահատությունից հետո պետք է բարելավվեն:

Լրացուցիչ տեղեկատվություն

Հիտերէկտոմիայի մասին

Այցելե՛ք Մեդեքսի հիստերէկտոմիայի էջը, որպեսզի ծանոթանաք այս վիրահատության տարբեր տեսակների մասին:

Վիրահատական միջամտությունների մասին

Այցելե՛ք Մեդեքսի վիրահատական միջամտությունների համապատասխան էջերը, որ լրացուցիչ ընդհանուր բնույթի տեղեկություններ ստանաք վիրահատությունների վերաբերյալ, այդ թվում՝

Հոդվածը տեղադրվել է՝ 29-05-2020 վերանայվել է՝ 07-11-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով