Գրադարան

Աղիների բորբոքային հիվանդություն. ախտորոշում

Աղիների բորբոքային հիվանդություն. ախտորոշում

Time Read 2 րոպե

Աղիների բորբոքային հիվանդության (ԱԲՀ) ախտորոշումը հաստատելու համար ձեզ անհրաժեշտ կլինի որոշակի հետազոտությունների, միջոցառումների կամ միջամտությունների համադրություն:

Լաբորատոր թեստեր

  • Անեմիայի կամ վարակի հայտնաբերման թեստեր. ձեր բժիշկը կարող է առաջարկել արյան թեստեր՝ սակավարյունության (անեմիայի) առկայությունը ստուգելու համար` մի վիճակ, որի դեպքում ձեր արյունը չի պարունակում բավարար քանակի արյան կարմիր բջիջներ (էրիթրոցիտներ), որոնք ձեր հյուսվածքներ են հասնցում համարժեք թթվածին: Այլ դեպքերում բժիշկն արյան թեստով կարող է ստուգել ձեզ մոտ բակտերիաներից կամ վիրուսներից հարուցված վարակի նշանների առկայությունը:
  • Կղանքի թեստեր. ձեզ կարող է անհրաժեշտ լինել կղանքի նմուշ տրամադրել, որ ստուգվի ձեր կղանքում թաքնված (թաքնված) արյան կամ այնպիսի օրգանիզմների առկայությունը, ինչպիսիք են մակաբույծները:

Էնդոսկոպիկ միջամտություններ

  • Կոլոնոսկոպիա. այս հետազոտությունը թույլ է տալիս ձեր բժշկին դիտել (զննել) ձեր ամբողջ հաստ աղիքը՝ օգտագործելով բարակ, ճկուն և ազատ ծայրին լույս և տեսախցիկ ունեցող խողովակ: Կոլոնոսկոպիայի ընթացքում լաբորատոր թեստի համար կարող են վերցվել հյուսվածքային փոքր նմուշներ (բիոպսիա): Բիոպսիան օգնում է ԱԲՀ-ը բորբոքման այլ ձևերից տարբերակելուն:
  • Ճկուն սիգմոիդոսկոպիա. սա նույնպես էնդոսկոպիկ հետազոտություն է՝ դիտելու (զննելու) ձեր ձեր հաստ աղիքի վերջին հատվածը՝ ուղիղ և սիգմայաձև աղիքները: Եթե ​​ձեր հաստ աղիքը խիստ բորբոքված է, բժիշկը կարող է ամբողջական կոլոնոսկոպիայի փոխարեն նշանակել այս հետազոտությունը:
  • Վերին էնդոսկոպիա. այս միջոցառման ժամանակ ձեր բժիշկն օգտագործում է բարակ, ճկուն և ազատ ծայրին լույս և տեսախցիկ ունեցող խողովակ (էզոֆագոգաստրոդուոդենոսկոպ)՝ ձեր կերակրափողը, ստամոքսը և բարակ աղու սկզբնական հատվածը (տասներկումատնյա աղիք) դիտելու (զննելու) համար: Թեև այս շրջանները հազվադեպ են կապված են Կրոնի հիվանդության հետ, հետազոտությունը կարող է առաջարկվել, եթե ունեք սրտխառնոց և փսխում, ուտելու հետ կապված դժվարություն կամ որովայնի վերին շրջանի ցավեր:
  • Պարկուճային (կապսուլային) էնդոսկոպիա. այս հետազոտությունը երբեմն օգտագործվում է ձեր բարակ աղին ընդգրկող Կրոնի հիվանդությունն ախտորոշելու համար: Դուք կուլ եք տալիս փոքր պարկուճ, որի մեջ կա տեսախցիկ: Պատկերները փոխանցվում են գրանցող սարքին, որը կրում եք ձեր գոտու վրա, որից հետո պարկուճն առանց ցավի, կղանքով դուրս է գալիս ձեր օրգանիզմից: Կրոնի հիվանդության ախտորոշումը հաստատելու համար ձեզ դեռ կարող է անհրաժեշտ լինել էնդոսկոպիա՝ բիոպսիայով: Չի կարելի անցկացնել պարկուճային էնդոսկոպիա, եթե կասկածվում է աղիքային խցանում (անանցանելիություն):
  • Բալոն-օժանդակող էնտերոսկոպիա. այս հետազոտության համար օգտագործվում է էնդոսկոպ մի սարքի հետ միասին, որը կոչվում է արտախողովակ (overtube): Սա թույլ է տալիս տեխնիկին դիտել-զննել բարակ աղու ավելի հեռավոր հատվածները, որտեղ ստանդարտ էնդոսկոպները չեն հասնում: Այս տեխնիկան օգտակար է, երբ պարկուճային էնդոսկոպիան ցույց է տալիս շեղումներ, սակայն ախտորոշումը դեռ հարցականի տակ է:

Պատկերային միջոցառումներ

  • Ռենտգեն հետազոտություն. եթե ​​ունեք ծանր ախտանիշներ, ձեր բժիշկը կարող է նշանակել որովայնի ստանդարտ ռենտգեն՝ բացառելու լուրջ բարդությունները, ինչպիսիք են մեգակոլոնը կամ թափածակված (պերֆորացված) հաստ աղիքը:
  • Համակարգչային տոմոգրաֆիկ (ԿՏ) սքանավորում. ձեզ կարող է նշանակվել ԿՏ սքանավորում՝ հատուկ ռենտգեն մեթոդ, որն ավելի շատ մանրամասներ է տրամադրում, քան սովորական ռենտգենը: Այս հետազոտությունը թույլ է տալիս գնահատել ամբողջ հաստ աղիքը, ինչպես նաև աղիքից դուրս գտնվող հյուսվածքները: ԿՏ էնտերոգրաֆիան ԿՏ-ի հատուկ տեսակ է, որն ապահովում է բարակ աղու ավելի լավ պատկերներ: Բժշկական կենտրոնների մեծ մասում այս թեստը փոխարինել է բարիումային ռենտգենին։
  • Մագնիսա-ռեզոնանսային տոմոգրաֆիա (ՄՌՏ). ՄՌՏ սքաներն օգտագործում է մագնիսական դաշտ և ռադիոալիքներ՝ ներքին օրգանների և հյուսվածքների մանրամասն պատկերներ (շերտագրոր) ստեղծելու համար: ՄՌՏ-ն հատկապես օգտակար է հետանցքի շրջանի (կոնքի ՄՌՏ) կամ բարակ աղու (ՄՌ էնտերոգրաֆիա) շրջանում առկա խուղակ գնահատելու համար: Ի տարբերություն ԿՏ-ի, ՄՌՏ-ի ժամանակ դուք չեք ենթարկվում ճառագայթման ազդեցությանը:

Հոդվածը տեղադրվել է՝ 01-02-2024 վերանայվել է՝ 02-02-2024

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով