Առողջական խնդիրներ
Ցավ ծնկան շրջանում (ծնկացավ)
2 րոպե
Ծնկացավը հաճախակի հանդիպող առողջական խնդիր է, որը կարող է առաջանալ հանկարծակի կամ ժամանակի ընթացքում:
Կան ծնկացավի տարբեր պատճառներ, որից ելնելով ընտրվում է բուժման տարբերակը:
Ծնկացավի պատճառները
Ձեր ծնկները կարող են ցավել տարբեր պատճառներից:
Վնասվածքի հետ կապված ծնկացավի պատճառներից են՝
- ծնկան կառուցվածքների վնասում՝ ոսկրեր, մկաններ, աճառներ, կապաններ, ջլեր, մահիկներ (մենիսկներ)
- բուրսիտ, որը ծնկան շարժումները սահունացնող, հեղուկով լցված ձուսպապարկի բորբոքումն է:
Հոդաբորբի հետ հապված (արթրիտ) ծնկացավի հիմնական պատճառներն են՝
- օստեոարթրիտ
- ռևմատոիդ արթրիտ
- պոդագրա
- հատուկ արթրիտներ (ծնկան վարակներ):
Ծնկացավի այլ պատճառներից են՝
- պատելոֆեմորալ ցավային համախտանիշ
- ցավ, որը սկսվում է ազդրերից կամ գոտկատեղից (իշիաս):
Ծնկացավի ռիսկի գործոնները
Ավելի հավանական է, որ դուք կունենաք ծնկացավ, քան մյուս մարդիկ, եթե՝
- ձեզ մոտ առկա է ավելցուկային կշիռ կամ գիրություն
- ձեր ոտքի մկանները թույլ են զարգացած
- դուք զբաղվում եք որոշ մարզաձևերով, օրինակ՝ լեռնադահուկային սպորտ կամ բասկետբոլ
- դուք նախկինում վնասել եք ձեր ծունկը
- դուք ունեք ոտքերի ծռություն կամ անատոմիական այլ շեղումներ:
Ծնկացավի ախտանիշները
Ծնկացավի ժամանակ ցավերից բացի դուք կարող եք նշել նաև այլ գանգատներ՝
- ծնկան հոդի շրջանի այտուցվածություն, կարմրություն կամ մաշկի տեղային տաքություն
- ծնկան շուրջն արյունազեղումներ
- ձեր ծունկը «ետ է մնում» քայլքից
- ծնկան հոդում շարժումների սահմանափակում կամ հոդի անշարժացում
- ծնկան հոդում շարժումներ կատարելիս արտասովոր ձայներ (կրեպիտացիա)
- ծնկան հոդում ոտքն ուղղելու անհնարինություն:
Եթե դուք անհանգստացած եք ձեր ծնկացավով, այցելեք ձեր բժշկին կամ վնասվածքաբանին:
Եթե դուք ունեք ջերմության բարձրացում և ձեր ծունկը կարմրած և «տաքությունից վառվում» է, շտապ կապ հաստատեք ձեր բժշկի հետ կամ այցելեք մոտակա անհետաձգելի բուժօգնության բաժանմունք:
Ծնկացավի պատճառների ախտորոշումը
Բժիշկը կզրուցի ձեզ հետ և կզննի ձեր ծունկը: Ախտորոշումը ճշտելու համար նա կարող է ձեզ ուղեգրել որոշ հետազոտությունների՝
- արյան թեստեր
- ծնկան հոդի ռենտգեն, սոնոգրաֆիկ կամ ՄՌՏ հետազոտություններ
- ծնկան հոդի ասպիրացիա, երբ ձեր ծնկան հոդից ասեղով վերցվում է քիչ քանակությամբ հեղուկ:
Ծնկացավի բուժումները
Կախված պատճառից, ծնկացավի բուժումը կարող է ներառել՝
- ցավազրկողներ և հակաբորբոքային դեղեր
- ծնկահոդն օժանդակող միջոցներ՝ պահիչներ և այլն
- օրթոպեդիկ կոշիկներ՝ քայլքը կարգավորելու համար
- հոգեբանական աջակցություն
- վիրահատություն:
Եթե վնասել եք ձեր ծունկը, դուք պետք է դիմեք ձեր բժշկին կամ անմիջապես վնասվածքաբանին:
Հոդվածը տեղադրվել է՝ 11-05-2018 վերանայվել է՝ 24-01-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
