Ձախ փորոքի հիպերտրոֆիա. ինքնօգնություն

Ձախ փորոքի հիպերտրոֆիա. ինքնօգնություն

Ապրելակերպի փոփոխությունները կարող են օգնել ձեր արյան ճնշման նվազեցմանը, բարելավել ձեր սրտի առողջությունը և մեղմացնել ձախփորոքային գերաճի նշանները, եթե դրանք առաջացնել են բարձր արյան ճնշման պատճառով:

Բժիշկը ձեզ հավանաբար խորհուրդ կտա սրտի առողջական վիճակը կարգավորող ձեր առօրյա կյանքի «շտկումներ», որոնցից ամենակարևորները ներկայացվում են ստորև:

  • Դադարեցրե՛ք ծխելը. եթե ծխող եք, ապա զրուցեք ձեր բժշկի հետ ծխախոտից ազատվելու արդյունավետ միջոցների մասին և թույլ մի՛ տվեք, որ ձեր ներկայությամբ ծխեն:
  • Կարգավորե՛ք քաշը. ձախ փորոքի գերաճ հաճախ ախտորոշվում է այն մարդկանց մոտ, ովքեր, անկախ արյան ճնշումից, գեր են: Քաշը նվազեցնելը կարող է որոշ չափով ետ զարգացնել ձախ փորոքի գերաճը: Պահպանելով առողջ քաշ կամ, եթե գեր եք, նվազեցնելով այն, դուք նաև կարող եք օգնել ձեր արյան ճնշման վերահսկմանը:
  • Անցե՛ք սրտի առողջության համար օգտակար սննդակարգի. ձեր սնունդը դարձրե՛ք մրգերով, բանջարեղեններով, ամբողջահատիկ ցորենից կամ ալյուրից ստացված մթերքներով, ցածր յուղայնության կաթնամթերքներով և «լավ» (չհագեցած) ճարպերով, օրինակ՝ ձիթապտղի ձեթով հարուստ: Կրճատե՛ք ձեր սննդակարգից ռաֆինացված շաքարների, նատրիումի (կերակրի աղի) և «վատ» (հագեցած) ճարպերի չափաբաժինը:
  • Սահմանափակե՛ք կերակրի աղի օգտագործումը. կերակրի կամ սեղանի աղի մեծ քանակով օգտագործումը կարող է բարձրացնել ձեր արյան ճնշումը: Ընտրե՛ք ոչ աղի կամ անալի մթերքներ, իսկ ճաշի ժամին մի՛ ավելացրեք սեղանի աղ:
  • Եթե շարունակում եք ալկոհոլ օգտագործել, ապա միայն՝ չափավոր. ալկոհոլը կարող է բարձրացնել ձեր արյան ճնշումը, հատկապես, եթե օգտագործվում է մեծ քանակներով:
  • Զբաղվե՛ք կանոնավոր ֆիզիկական վարժանքներով. նպատակ դրե՛ք շաբաթվա մեջ առնվազն 150 րոպե տրամադրել չափավոր ծանրաբեռնվածության ֆիզիկական ակտիվությանը: Օրինակ, օրական մոտ 30 րոպե փորձեք արագ քայլք շաբաթվա օրերի մեծ մասի համար: Նույնիսկ ավելի ցածր ծանրաբեռնվածության ֆիզիկական վարժանքները կարող են զգալի օգուտ տալ: Հարցրե՛ք բժշկից, թե պետք է արդյոք սահմանափակել որոշ մեծ ծանրաբեռնվածության վարժանքները, որոնք կարող են ժամանակավորապես բարձրացնել ձեր արյան ճնշումը:
  • Վերահսկե՛ք և կառավարե՛ք սթրեսը. գտեք ուղիներ՝ նվազեցնելու ձեր հուզական լարվածությունը, օրինակ՝ սթրեսը կրճատող «թուլացնող» (ռելաքսացիոն) մեթոդներ: Ֆիզիկական վարժանքները ևս կարող են «հանդարտեցնել» ձեր ուղեղը:

Հոդվածը վերանայվել է՝ 30-03-2021