Բուժում - Լյուիի դեմենցիա

Լյուիի մարմնիկներով դեմենցիան բուժում չունի, սակայն ախտանիշներից շատերը կարող են բարելավվել թիրախային բուժումներով:

Դեղորայքային բուժում

• Խոլինէսթերազի արգելակիչներ (ինհիբիտորներ). Ալցհեյմերի հիվանդության ժամանակ նշանակվող այս դեղամիջոցներն ազդում են՝ բարձրացնելով գլխուղեղում քիմիական միջնորդանյութերի մակարդակը, որոնք հայտնի են որպես նեյրոմեդիատորներ: Ենթադրվում է, որ այս քիմիական նյութերը կարևոր են հիշողության, մտածողության և դատողության համար: Այս խմբի դեղամիջոցներից են Ռիվաստիգմինը (Էքսելոն), Դոնեպեզիլը (Արիսեպտ, Ադլարիտի) և Գալանտամինը (Ռազադին ER): Դեղորայքը կարող է օգնել զգոնության և մտածողության բարելավմանը, ինչպես նաև մեղմացնել ցնորքները և այլ վարքագծային ախտանիշները: Հնարավոր կողմնակի ազդեցություններից են ստամոքսի խանգարումը, մկանային ցավերը և ավելի հաճախ միզելը: Դեղերը նաև կարող են մեծացնել սրտի որոշակի առիթմիաների ռիսկը: Չափավոր կամ ծանր դեմենցիայով որոշ մարդկանց համար խոլինէսթերազի ինհիբիտորին կարող է ավելացվել N-մեթիլ-d-ասպարտատային (NMDA) ընկալիչի ներհակորդ (անտագոնիստ), որը կոչվում է Մեմանտին (Նամենդա):
• Պարկինսոնի հիվանդության դեղամիջոցներ. Կարբիդոպա-Լևոդոպան (Սինեմետ, Դուոպա և այլն) և համանման դեղամիջոցները կարող են օգնել մկանային կարկամության (ռիգիտություն) և շարժումների դանդաղացման մեղմացմանը: Այնուամենայնիվ, այս դեղամիջոցները նաև կարող են ավելացնել շփոթվածությունը, ցնորքները և զառանցանքները:
• Այլ ախտանիշների բուժման դեղամիջոցներ. բժիշկը նաև կարող է նշանակել լրացուցիչ դեղամիջոցներ՝ ուղղված այլ ախտանիշների նվազեցմանը, ինչպիսիք են քնի խանգարումները կամ շարժողական խնդիրները:

Որոշակի դեղամիջոցներ կարող են վատթարացնել հիշողությունը։ Մի՛ ընդունեք դիֆենհիդրամին պարունակող քնաբեր միջոցներ (Ադվիլ PM, Ալեվե PM): Նաև մի՛ ընդունեք այնպիսի դեղամիջոցներ, որոնք օգտագործվում են հրատապ (ուրգենտ) անմիզապահության բուժման համար, ինչպիսին է Օքսիբուտինինը (Դիտրոպան XL, Գելնիքվե, Օքսիտրոլ):

Սահմանափակեք հանգստացնող (սեդատիվ) և քնաբեր դեղերի օգտագործումը: Խոսեք բժիշկ-մասնագետի հետ այն մասին, թե արդյոք ձեր ընդունած դեղերից որևէ մեկը կարող է վատթարացնել ձեր հիշողությունը:

Հակափսիխոտիկ դեղամիջոցները կարող են առաջացնել արտահայտված շփոթվածություն, ծանր պարկինսոնիզմ, քնկոտություն և երբեմն մահ: Խիստ հազվադեպ, երկրորդ սերնդի որոշ հակափսիխոտիկ միջոցներ, ինչպիսիք են Քվետիապինը (Սերոքվել) կամ Կլոզապինը (Կլոզարիլ, Վերսակլոզ), կարող են նշանակվել կարճ ժամանակով և ցածր դեղաչափերով: Սակայն, դրանք առաջարկվում են միայն այն դեպքում, եթե օգուտները գերազանցում են ռիսկերը:

Ոչ դեղորայքային բուժումներ (թերապիաներ)

Հակափսիխոտիկ դեղամիջոցները կարող են վատթարացնել Լյուիի մարմնիկներով դեմենցիայի ախտանիշները: Ուստի, կարող է օգտակար լինել նախ փորձել այլ մոտեցումներ, ինչպիսիք ներկայացված են ստորև:

• Վարքագծի հանդուրժում. Լյուիի մարմնիկներով դեմենցիա ունեցող որոշ մարդկանց համար ցնորքներն անհանգստացնող չեն: Նման իրավիճակներում ցնորքի դեմ նշանակված դեղամիջոցի կողմնակի ազդեցությունները կարող են ավելի ռիսկային լինել, քան բուն ցնորքները:
• Միջավայրի ձևափոխում և հարմարեցում. խառնաշփոթի և աղմուկի նվազեցումը կարող է հեշտացնել դեմենցիայով տառապող մարդու առօրյան: Խնամողների արձագանքները երբեմն վատթարացնում են նրանց վարքագծերը: Խուսափեք դեմենցիայով տառապող մարդուն ուղղելուց և բարդ հարցեր տալուց: Առաջարկեք վստահություն և նրա մտահոգությունների հաստատում:
• Հստակ օրակարգի մշակում և առօրյա գործերի պարզեցում. առաջադրանքները կամ գործերը բաժանեք ավելի պարզ քայլերի և կենտրոնացեք ոչ թե ձախողումների, այլ հաջողությունների վրա: Օրվա և առօրյա գործերի հստակ կառուցվածքը կարող են այդ մարդկանց համար ավելի քիչ շփոթեցնող լինել: