Ախտորոշում - Մենոռագիա

Ձեր բժիշկը, ամենայն հավանականությամբ, կհարցնի ձեր հիվանդության պատմության և դաշտանային ցիկլերի մասին:

Ձեզնից կարող է պահանջվել պահել «արյունահոսության» և «առանց արյունահոսության» օրերի օրագիր, ներառյալ նշումներ այն մասին, թե որքան առատ է եղել ձեր դաշտանային արյունահոսությունը և որքան հիգիենիկ միջոցների կարիք եք ունեցել այն հսկելու համար:

Ձեր բժիշկը կկատարի բուժզննում և կարող է խորհուրդ տալ մեկ կամ մի քանի ախտորոշիչ թեստեր կամ միջամտություններ:

• Արյան թեստեր. ձեր արյան նմուշը կարող է հետազոտվել երկաթի պակասի (երկաթ-դեֆիցիտային անեմիա) և այլ վիճակների համար, ինչպիսիք են վահանաձև գեղձի խնդիրները կամ մակարդելիության խանգարումները:
• ՊԱՊ թեստ. այս թեստի ընթացքում նմուշառվում են ձեր արգանդի վզիկի բջիջները, որոնք հետազոտվում են վարակի, բորբոքման կամ այնպիսի փոփոխությունների համար, որոնք կարող են լինել քաղցկեղ կամ հանգեցնել քաղցկեղի:
• Արգանդի լորձաթաղանթի (էնդոմետրիումի) բիոպսիա. ձեր բժիշկը կարող է հյուսվածքի նմուշ վերցնել ձեր արգանդի ներսից՝ ախտաբանի կողմից հետազոտվելու համար:
• Գերձայնային հետազոտություն (սոնոգրաֆիա). այս պատկերային հետազոտությունն օգտագործում է ձայնային ալիքներ՝ ձեր արգանդի, ձվարանների և կոնքի օրգանների պատկերներ ստանալու համար:

Ձեր նախնական թեստերի արդյունքների հիման վրա բժիշկը կարող է խորհուրդ տալ լրացուցիչ հետազոտություններ:

• Սոնոհիստերոգրաֆիա. այս թեստի ընթացքում է բժիշկը ձեր հեշտոցի և արգանդի վզիկի միջով անցկացված խողովակով արգանդ է ներմուծում հեղուկ: Այնուհետև օգտագործվում է գերձայնային հետազոտություն՝ արգանդի լորձաթաղանթի հետ կապված խնդիրներ հայտնաբերելու համար:
• Հիստերոսկոպիա. այս հետազոտությունը ներառում է ձեր հեշտոցի և արգանդի վզիկի միջով բարակ, ազատ ծայրին լույս ունեցող գործիք ներմուծելը ձեր արգանդի մեջ, ինչը թույլ է տալիս ձեր բժշկին դիտել ձեր արգանդի ներսը:

Բժիշկները կարող են վստահ լինել մենոռագիայի ախտորոշման մեջ միայն այլ դաշտանային խանգարումները, հիվանդությունները կամ դեղամիջոցները որպես այս վիճակի հնարավոր պատճառներ կամ սրացումներ բացառելուց հետո: