Գրադարան
Առատ դաշտան. բուժում
3 րոպե
Մենոռագիայի հատուկ բուժումը հիմնված է մի շարք գործոնների վրա:
Դրանցից են՝
- ձեր ընդհանուր առողջության և հիվանդության պատմությունը
- վիճակի պատճառը և ծանրությունը
- ձեր տանելիությունը առանձնահատուկ դեղամիջոցների, միջատությունների կամ ոչ դեղորայքային բուժումների (թերապիաների) նկատմամբ
- այն բանի հավանականությունը, որ ձեր դաշտանները շուտով ավելի քիչ առատ կլինեն
- երեխա ունենալու վերաբերյալ ձեր ապագա ծրագրերը
- վիճակի ազդեցությունը ձեր ապրելակերպի վրա
- ձեր կարծիքը կամ անձնական նախապատվությունը:
Դեղորայքային բուժում
Մենոռագիայի դեղորայքային բուժումը կարող է ներառել հետևյալը:
- Ոչ ստերոիդ հակաբորբոքային դեղեր (ՈՍՀԲԴ). ՈՍՀԲԴ-ը, ինչպիսիք են Իբուպրոֆենը (Ադվիլ, Մոտրին IB և այլն) կամ Նապրոքսենը (Ալեվե), օգնում են դաշտանային արյան կորստի նվազեցմանը: ՈՍՀԲԴ-ներն ունեն լրացուցիչ առավելություն՝ թեթևացնելով դաշտանային ցավոտ կծկանքները (դիսմենորիա):
- Տրանեքսամաթթու. տրանեքսամաթթուն (Լիստեդա) օգնում է դաշտանային արյան կորստի նվազեցմանը և անհրաժեշտ է ընդունել միայն արյունահոսության պահին:
- Բերանով ընդունման (օրալ) հակաբեղմնավորիչներ. բեղմնականխման ազդեցությունից բացի այս դեղամիջոցները կարող են օգնել դաշտանային ցիկլերի կարգավորմանը և նվազեցնել առատ կամ երկարաձգված դաշտանային արյունահոսության դրվագները:
- Բերանով ընդունման (օրալ) պրոգեստերոն. պրոգեստերոն հորմոնը կարող է օգնել հորմոնային անհավասարակշռության շտկմանը և նվազեցնել մենորագիան:
- Հորմոնային ներարգանդային պարույր (Լիլետտա, Միրենա). այս ներարգանդային պարույրները ազատում են Լևոնորգեստրել կոչվող պրոգեստինի մի տեսակ, որը բարակեցնում է արգանդի լորձաթաղանթը և թուլացնում դաշտանային արյունահոսությունն ու ցավը:
Եթե ունեք հորմոնային դեղամիջոցներ ընդունելու հետ կապված մենոռագիա, ձեր բժիշկը կարող է բուժել վիճակը՝ փոխելով կամ դադարեցնելով ձեր դեղորայքը:
Եթե մենոռագիայի պատճառով ձեզ մոտ զարգացել է սակավարյունություն (անեմիա), բժիշկը կարող է ձեզ խորհուրդ տալ, որ կանոնավոր կերպով ընդունեք երկաթի հավելումներ: Եթե ձեր արյան երկաթի մակարդակը ցածր է, սակայն դեռևս չունեք անեմիայի գանգատներ, բժիշկը կարող է առաջարկել, որ օգտագործեք երկաթի հավելումներ, այլ ոչ թե սպասեք մինչև անեմիայի զարգանա:
Միջամտություններ
Ձեզ կարող է անհրաժեշտ լինել մենոռագիայի վիրաբուժական բուժում, եթե դեղորայքային բուժումն անարդյունավետ է:
- Լայնացում և կյուրետաժ. այս միջամտության ընթացքում ձեր բժիշկը բացում է (լայնացնում է) ձեր արգանդի վզիկը, այնուհետև քերում կամ արտածծում է ձեր արգանդի լորձաթաղանթային հյուսվածքը, որ նվազի դաշտանային արյունահոսությունը: Թեև այս միջամտությունը տարածված է և հաճախ հաջողությամբ բուժում է սուր կամ ակտիվ արյունահոսությունը, ձեզ կարող են անհրաժեշտ լինել լրացուցիչ լայնացման և կյուրետաժի միջամտություններ, եթե մենոռագիան կրկնվի:
- Արգանդի զարկերակի էմբոլիզացիա. եթե կանանց մոտ մենոռագիայի պատճառը ֆիբրոիդն է (արգանդի միոմա), այս միջամտությունը կարող է փոքրացնել միոմատոզ հանգույցները՝ խցանելով արգանդի զարկերակները և կտրելով այդ հանգույցների արյան մատակարարումը: Արգանդի զարկերակի էմբոլիզացիայի ժամանակ վիրաբույժն ազդրի մեծ զարկերակի մեջ (ազդրային զարկերակ) տեղադրում է կաթետեր, որն ուղղորդում է դեպի արգանդային զարկերակներ, որից հետո ներարկում է նյութեր (էմբոլիզացիոն մասնիկներ), որոնք նվազեցնում են արյան հոսքը դեպի ֆիբրոդ՝ «չորացնելով» այն:
- Ֆոկուսացված գերձայնային վիրահատություն. արգանդի զարկերակների էմբոլիզացիայի նման, այս միջամտությունը բուժում է արգանդի միոմաների (ֆիբրոդների) հետևանքով առաջացած արյունահոսությունը՝ դրանց փոքրացման միջոցով: Այս միջամտությունը ֆիբրոդ հյուսվածքը ոչնչացնելու համար օգտագործում է գերձայնային ալիքներ: Կտրվածքներ չեն պահանջվում:
- Միոմէկտոմիա. այս միջամտությունը ներառում է արգանդի ֆիբրոիդների (միոմաների) վիրահատական հեռացումը: Կախված ֆիբրոդների չափից, քանակից ու տեղակայումից, ձեև վիրաբույժը կարող է ընտրել միոմէկտոմիա՝ օգտագործելով բաց վիրահատություն (որովայնային միոմէկտոմիա), որովայնի մի քանի փոքր կտրվածքների միջոցով (լապարոսկոպիկ միոմէկտոմիա) կամ հեշտոցի և արգանդի վզիկի միջոցով (հիստերոսկոպիկ միոմէկտոմիա):
- Էնդոմետրիալ աբլացիա. սա ձեր արգանդի լորձաթաղանթի (էնդոմետրիում) ոչնչացման միջամտություն է (աբլացիա): Աբլացիան կարող է լինել լազերով, ռադիոհաճախականությամբ կամ ջերմային այրմամբ: Էնդոմետրիալ աբլացիայից հետո կանանց մեծամասնության մոտ դաշտանային արյունահոսությունը դառնում է շատ ավելի թեթև: Այնուամենայնիվ, էնդոմետրիալ աբլյացիայից հետո հղիությունը կարող է ընթանալ բազմաթիվ հարակից բարդություններով, ուստի, եթե անցել եք էնդոմետրիալ աբլացիա, խորհուրդ է տրվում օգտագործել հուսալի կամ մշտական հակաբեղմնավորիչ միջոցներ մինչև դաշտանադադարը:
- Էնդոմետրիալ ռեզեկցիա. այս վիրահատական միջամտությունն օգտագործում է էլեկտրավիրաբուժական մետաղալարային օղակ, որի օգնությամբ հեռացվում է արգանդի լորձաթաղանթը: Ինչպես էնդոմետրիալ աբլացիան, այնպես էլ էնդոմետրիալ ռեզեկցիան օգուտ են բերում այն կանանց, ովքեր ունեն խիստ առատ դաշտանային արյունահոսություն: Այս միջամտությունից հետո հղիությունը խորհուրդ չի տրվում:
- Հիստերէկտոմիա. հիստերէկտոմիան՝ արգանդի մարմնի և վզիկի հեռացման վիրահատությունը, անդառնալի միջամտություն է, որն առաջացնում է անպտղություն (ստերիլություն) և դաշտանային ցիկլերի դադարում: Հիստերէկտոմիան կատարվում է անզգայացման պայմաններում և պահանջում է հոսպիտալացում: Ձվարանների լրացուցիչ հեռացումը (բիլատերալ օոֆորէկտոմիա) կարող է առաջացնել վաղաժամ դաշտանադադար:
Այս վիրաբուժական միջամտություններից շատերը կատարվում են ամբուլատոր պայմաններում: Չնայած հնարավոր ընդհանուր անզգայացմանը, հավանական է, որ նույն օրն ավելի ուշ կարողանաք տուն վերադառնալ: Որովայնային միոմէկտոմիան կամ հիստերէկտոմիան սովորաբար պահանջում է հիվանդանոցային հսկողություն:
Երբ մենոռագիան մեկ այլ հիվանդության ախտանիշ է, ինչպես է վահանաձև գեղձի հիվանդության դեպքում, հիմնական հիվանդության բուժումը սովորաբար մեղմացնում է դաշտանները:
Հոդվածը տեղադրվել է՝ 13-04-2021 վերանայվել է՝ 14-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
