Ախտորոշում - Միտրալ պրոլապս

Միտրալ փականի պրոլապսն ախտորոշելու համար ձեր բժիշկը սովորաբար ֆիզիկական քննություն է անցկացնում (բուժզննում) և ստետոսկոպի միջոցով լսում է ձեր սիրտը:

Եթե ունեք միտրալ փականի պրոլապս, ստետոսկոպի միջոցով կարող է կտտոցների ձայն լսվել: Եթե արյունը հետ է հոսում միտրալ փականի միջով, նաև կարող են լսվել ոչ նորմալ հնչյուններ (սրտի աղմուկ):

Հետազոտություններ

Միտրալ փականի պրոլապսն ախտորոշելու համար սովորաբար նշանակվում են հետևյալ հետազոտություններից մեկը կամ մի քանիսը:

• Էխոսրտագրություն (սրտի էխո). այս հետազոտությունն օգտագործում է ձայնային ալիքներ՝ շարժման մեջ գտնվող սրտի պատկերների շարք ստեղծելու համար: Ստամդարտ էխոսրտագրությունը, որնը նաև կոչվում է տրանսթորացիկ էխոսրտագրություն, կարող է հաստատել միտրալ փականի պրոլապսի ախտորոշումը և որոշել վերջինիս ծանրության աստիճանը: Երբեմն, միտրալ փականն ավելի մանրակրկիտ դիտելու համար անհրաժեշտ է ավելի մանրամասն էխոսրտագրություն, որը կոչվում է տրանսէզոֆագեալ էխոսրտագրություն: Այս դեպքում տվիչը (տրանսդյուսեր) ներմուծվում է բերանից դեպի կերակրափող:
• Կրծքավանդակի ռենտգեն. կրծքավանդակի ռենտգենը ցույց է տալիս սրտի և թոքերի վիճակը: Այս հետազոտությունը կարող է օգնել մեծացած սրտի ախտորոշմանը:
• Էլեկտրասրտագրություն (ԷՍԳ). այս արագ և անցավ հետազոտությունը չափում է սրտի էլեկտրական ակտիվությունը։ ԷՍԳ-ն կարող է հայտնաբերել սրտի անկանոն ռիթմերը (առիթմիաները), որոնք կապված միտրալ փականի հիվանդության հետ:
• Վարժանքային կամ սթրես թեստեր. այս հետազոտությունները հաճախ ներառում են վազքուղու (տրեդմիլի) վրա քայլելը կամ անշարժ հեծանիվ վարելը, քանի դեռ սիրտը ստուգվում է ԷՍԳ-ով կամ ԷխոՍԳ-ով: Սթրես թեստերն օգնում են պարզել, թե ինչպես է սիրտն արձագանքում ֆիզիկական ծանրաբեռնվածությանը և արդյոք վարժանքի ընթացքում զարգանում են միտրալ փականի պրոլապսի ախտանիշներ: Եթե չեք կարող վարժանք կատարել, ձեզ կարող են տալ դեղամիջոց, որը խթանում է սրտի աշխատանքն այնպես, ինչպես լինում է ֆիզիկական ծանրաբեռնվածության ժամանակ:
• Սրտային կաթետերիզացիա. սրտային կաթետերիզացումը հաճախ չի օգտագործվում միտրալ փականի հիվանդությունն ախտորոշելու համար, սակայն կարող է նշանակվել, եթե այլ հետազոտություններով ախտորոշումը չի հաստատվում: Բժիշկը ձեռքի կամ աճուկի արյունատար անոթի լուսանցքով բարակ խողովակը, որը կոչվում է կաթետեր, ուղղորդում է դեպի սրտի զարկերակ: Կաթետերով ներմուծվում է կոնտրաստային նյութ, որը թույլ է տալիս ռենտգեն պատկերմամբ ստանալ սրտի զարկերակների ավելի հստակ ուրվագծեր: