Նորովիրուսային վարակ

Նորովիրուսային վարակը կարող է առաջացնել հանկարծակի սկսվող ծանր փսխումներ և փորլուծություն:

Այն նաև հայտնի է որպես «ձմեռային փսխումներ», քանի որ հակում ունի իր տարածման գագաթնակետին հասնել ձմեռային ամիսներին, երբ մարդիկ ավելի հաճախ են մի տեղում հավաքվում: Մյուս տարածված անուններից են «ստամոքսի գրիպ» և «վիրուսային ստամոքս»:

Նորովիրուսային վարակը հարուցվում է նորովիրուսով՝ վիրուսի տեսակ, որն ունի բարձր վարակելիություն և հիմնականում տարածվում է պատրաստման ընթացքում կամ ախտոտված մակերևույթներով վարակված սննդամթերքներով կամ ջրով: Դուք նաև կարող եք վարակվել նորովիրուսով հիվանդ մարդու հետ անմիջական շփման պատճառով:

Փորլուծությունը, ստամոքսի շրջանի ցավը և փսխումները գլխավորապես սկսվում են նորովիրուսով վարակվելուց 12-48 ժամ հետո: Նորովիրուսի ախտանիշները սովորաբար տևում են 1-3 օր, և մարդկանց մեծ մասն առանց որևէ բուժման լիարժեքորեն լավանում է: Այնուամենայնիվ, որոշ դեպքերում փսխումներն ու փորլուծությունը կարող են առաջացնել բժշկական օգնություն պահանջող սուր և ծանր ջրազրկում: Նորովիրուսային վարակի նման բարդացած ընթացքը հատուկ է հատկապես նորածիններին, մեծ տարիքով և այլ քրոնիկ հիվանդություններ ունեցող մարդկանց:

Նորովիրուսային վարակն ավելի հաճախ տեղի է ունենում խիտ բնակեցված և սերտ շփումներ ենթադրող միջավայրերում, օրինակ՝ հիվանդանոցներ, խնամքի տներ, նախակրթարաններ, դպրոցներ և ճամփորդական նավեր, որտեղ բազմաթիվ մարդիկ օգտագործում են այլ մարդկանց պատրաստված սնունդը և մեկ վարակված մարդը կարող է հեշտությամբ վիրուսը տարածել և փոխանցել բազմաթիվ այլ մարդկանց:

Նորովիրուսային վարակն ախտորոշվում է ելնելով ախտանիշներից, իսկ բուժումը սովորաբար սահմանափակվում է հանգստով և ջրազրկման կանխարգելմամբ:

Վարակի կանխարգելումը հիմնված է անձնական հիգիենայի պատշաճ պահպանման վրա:

Հոդվածը վերանայվել է՝ 16-05-2021