Կանխարգելում - Գիրություն

Անկախ այն հանգամանքից, թե ունեք գիրանալու վտանք, ավելորդ կիլոգրամներ կամ նորմալ քաշ, միշտ էլ կարող եք ձեռնարկել քայլեր՝ կանխարգելելու քաշի անառողջ ավելացումը և դրա հետ կապված առողջական խնդիրները:

Զարմանալի չէ, որ քաշի ավելացման և գիրության կանխարգելման և քաշի նվազեցման մեթոդները համընկնում են՝ ամենօրյա ֆիզիկական վարժանքներ, առողջ վարքագծեր և երկարաժամկետ վերահսկում, թե ինչ եք ուտում և խմում: Երկարատև կայուն արդյունքներին հասնելու համար առողջ ապրելակերպը պետք է դառնա ձեր կյանքի բաղկացուցիչ մասը, այլ ոչ թե արհեստականորեն պարտադրված բան։

• Զբաղվեք կանոնավոր վարժանքներով. քաշի ավելացումը կանխելուն կարող է օգնել շաբաթական 150-300 րոպե չափավոր բեռնվածության ֆիզիկական վարժանքները: Սա կարող է ներառել շարժում պահանջող ամենատարբեր զբաղմունքներ, այդ թվում՝ արագ քայլք, վազք և լող:
• Հետևեք առողջ սննդակարգի ծրագրին. ընտրեք ցածր կալորիա ունեցող, սակայն՝ սննդարար մթերքներ, ինչպիսիք են մրգերը, բանջարեղեններ և ամբողջահատիկավորները: Խուսափեք հագեցած ճարպից և սահմանափակեք քաղցրահամ ըմպելիքները, քաղցրավենիքները և ալկոհոլը: Օրվա մեջ սնվեք կանոնավոր 3 անգամ՝ քչացնելով նախաուտեստները: Հազվադեպ կարող եք քիչ քանակությամբ փորձել «գիրացնող» սննդատեսակներ: Պարզապես ձեր սննդակարգում գերակշռող դարձրեք այնպիսի մթերքները, որոնք նպաստում են առողջ քաշին և ընդհանուր առողջական բարվոք վիճակին:
• Խուսափեք այն գործոններից, որոնք բերում են սննդի անկառավարելի օգտագործման. հիշեք, թե որ իրավիճակներում եք ակամա սնունդ ընդունում: Փորձեք պահել օրագիր և գրի առնել, թե ինչ եք ուտում, ինչքան, երբ, ինչպես եք հասկանում, որ քաղցած եք և այլ մանրամասներ: Թերթելով ձեր իսկ գրառումները, կարող եք հայտնաբերել աննկատելի գործոններ, որոնք նպաստում են սննդի անվերահսկելի ընդունմանը: Հաջորդ քայլով փորձեք խուսափել նմանատիպ «անառողջ» գործոններից: Սա կօգնի, որ ձեր սնվելն աստիճանաբար դառնա ավելի նպատակասլաց, այլ ոչ թե՝ ակամա գործողություն:
• Պարբերաբար ստուգեք ձեր քաշը. այն մարդիկ, ովքեր շաբաթական առնվազն մեկ անգամ հսկում են իրենց մարմնի քաշը, ավելի հաջող կերպով են կարողանում պայքարել ավելորդ կիլոգրամների դեմ: Սա նաև ձեր ձեռնարկած քայլերի արդյունավետությունը ստուգելու և գնահատելու միջոց է:
• Եղեք համբերատար. հիշեք, որ նիհարելը մեկ օրվա կամ մեկ շաբաթվա գործ չէ, այլ երկարատև, գուցե՝ ամբողջ կյանքի ընթացքում շարունակվող ջանքեր: Պահպանեք նիհարելու կանոնները նաև ոչ աշխատանքային օրերին, ինչպես նաև արձակուրդների ընթացքում:

Չափահաս տարիքում զարգացած գիրությունը կարող է լինել մանկական գիրության հեռավոր հետևանք։ Սա նշանակում է, որ գիրության կանխարգելումը տարիքային սահմանափակում չունի։