Ախտանիշներ - Գիրություն

Գիրության ախտորոշման համար հաճախ օգտագործվում է մարմնի զանգվածի գործակիցը (ՄԶԳ, անգլերեն՝ BMI):

Ձեր ՄԶԳ-ն հաշվելու համար ձեր մարմնի քաշը (կիլոգրամներով) բաժանեք ձեր հասակի քառակուսու վրա (մետրերով): Կամ, ձեր քաշը՝ ֆունտներով բազմապատկեք 703-ով, որից հետո բաժանեք հասակի վրա՝ դյույմներով և այնուհետև կրկին բաժանեք հասակի վրա՝ դյույմներով:

• 18,5-ից ցածր ՄԶԳ-ն վկայում է պակասորդային քաշի մասին:
• Եթե ձեր ՄԶԳ-ն 18,5-24,9 միջակայքում է, ապա ունեք նորմալ (առողջ) մարմնի քաշ:
• Եթե ձեր ՄԶԳ-ն 25,0-29,9 միջակայքում է, ապա ունեք ավելցուկային քաշ:
• Եթե ձեր ՄԶԳ-ն 30,0 և ավելի բարձր է, ուրեմն ունեք գիրություն:

23 կամ ավելի բարձր ՄԶԳ ունեցող ասիացիները կարող են ունենալ առողջական խնդիրների բարձր ռիսկ:

Մարդկանց մեծամասնության համար ՄԶԳ-ն տալիս է ճարպային կուտակումների ողջամիտ գնահատականը: Այնուամենայնիվ, ՄԶԳ-ն ուղղակիորեն չի չափում մարմնի ճարպային կուտակումների չափաբաժինը, ուստի որոշ մարդկանց մոտ, ինչպիսիք են մկանեղ մարզիկները, ՄԶԳ-ն կարող է պատկանել գիրության դասերին, նույնիսկ եթե չունեն մարմնի ավելցուկային ճարպ:

Շատ բժիշկներ նաև չափում են մարդու իրանի շրջագիծը, որ կայացնեն բուժման որոշումներ: Քաշի հետ կապված առողջական խնդիրներն ավելի հաճախ հանդիպում են 40 դյույմից (102 սանտիմետրից) ավելի իրանի շրջագիծ ունեցող տղամարդկանց և 35 դյույմից (89 սանտիմետրից) ավելի իրանի շրջագիծ ունեցող կանանց մոտ:

Ե՞րբ դիմել բժշկին

Հարցրեք ձեր բժշկին գիրության բուժման մասին, եթե անհանգստացած եք ավելցուկային քաշով պայմանավորված առողջական խնդիրներով: Դուք և ձեր բժիշկը կարող եք գնահատել ձեր առողջական ռիսկը և քննարկել քաշի նվազեցման տարբերակները: