Գիրություն. ախտորոշում

Գիրություն. ախտորոշում

Իրականում, գիրությունը կարող է «ախտորոշվել» անզեն աչքով՝ որպես մարմնի որոշ շրջաններում ենթամաշկային ճարպային կուտակումների հայտնաբերում։

Սակայն, խնդիրը միայն ճարպակալման առկայության արձանագրումը չէ, այլև դրա չափը և բնույթը որոշելը, ինչպես նաև գիրացման բերող հնարավոր պատճառների հայտնաբերումը, որից ելնելով էլ բժշկի հետ միասին դուք կարող եք մշակել քաշի կարգավորման ձեր հետագա քայլերը։

Գիրությունն ախտորոշելիս բժիշկը կատարում է արտաքին զննում և խորհուրդ տալիս որոշ հետազոտություններ:

  • Առողջության պատմության գնահատում. բժիշկը հարցեր կտա՝ կապված ձեր քաշի վերջին տարիներին գրանցված փոփոխությունների, ավելորդ քաշից ազատվելու փորձերի, ֆիզիկական ակտիվության, սննդի ընդունման բնույթի և ախորժակի, այլ հիվանդությունների, անցյալում և տվյալ պահին օգտագործվող դեղամիջոցների, աշխատանքի բնույթի, սթրեսի մակարդակի և այլ ոլորտների հետ: Բժիշկը նաև կարող է հետաքրքրվել ձեր ընտանիքի անդամների առողջության պատմությամբ՝ ստուգելու որոշ հիվանդությունների նկատմամբ ձեր ժառանգական նախատրամադրվածությունը:
  • Ընդհանուր արտաքին զննում. սա ներառում է ձեր քաշի և հասակի չափումը, անոթազարկի շոշափումը, զարկերակային ճնշման և մարմնի ջերմաստիճանի չափումը, սրտի և թոքերի լսումը, որովայնի զննումը և այլն:
  • Մարմնի զանգվածի գործակցի (ՄԶԳ) հաշվարկ. բժիշկը նաև կչափի ձեր ՄԶԳ-ն, որը թույլ կտա գնահատել ավելցուկային քաշի չափը: ՄԶԳ-ն չափելու համար անհրաժեշտ է իմանալ երկու ցուցանիշ՝ ձեր հասակը և մարմնի զանգվածը։ Տեղադրեք այդ երկու ցուցանիշները ՄԶԳ-ի հաշվարկման մեր առցանց գործիքում և վայրկյանների ընթացքում կիմանաք ձեր ցուցանիշը։ Չափահասների մեծ մասի համար ՄԶԳ-ի 25-ից մինչև 29,9 արժեքերն ամենայն հավանականությամբ վկայում են ավելցուկային քաշի, իսկ 30-ից բարձր արժեքները՝ գիրության մասին (եթե ՄԶԳ-ն 40 կամ ավելի բարձր է, առկա է խիստ արտահայտված գիրություն): ՄԶԳ-ի 30-ից բարձր արժեքներն ավելի են բարձրացնում ձեր առողջական ռիսկերը: ՄԶԳ-ն պետք է չափվի տարեկան առնվազն մեկ անգամ, քանի որ այն օգնում է գնահատելու ձեր ընդհանուր առողջական ռիսկերը:
  • Իրանի շրջանագծի չափում. իրանի շուրջը կուտակվող ճարպը, որը երբեմն կոչվում է ընդերային (վիսցերալ) ճարպ և առաջացնում է որովայնային տիպի ճարպակալում, համեմատած կոնքազդրային տիպի ճարպակալման հետ, կարող է էլ ավելի բարձրացնել սրտային հիվանդության և 2-րդ տիպի դիաբետի ռիսկը: Այս քրոնիկ հիվանդությունների ռիսկը բարձրանում է, եթե տղամարդկանց մոտ իրանի շրջանագիծը 102 սմ կամ ավել է, իսկ կանանց մոտ՝ 89 սմ կամ ավել: ՄԶԳ-ի նման, իրանի շրջանագիծը պետք է չափվի տարեկան առնվազն մեկ անգամ:
  • Առողջական այլ խնդիրների ստուգում. եթե ունեք ձեզ հայտնի առողջական խնդիրներ, օրինակ՝ բարձր արյան ճնշում (հիպերտենզիա) և դիաբետ, բժիշկը նաև կգնահատի դրանք: Զարկերակային ճնշման չափումից և մշտադիտարկումից բացի նա կարող է խորհուրդ տալ, որ անցնեք սրտի որոշ հետազոտություններ, օրինակ՝ էլեկտրասրտագրություն (ԷՍԳ):
  • Արյան հետազոտություններ. նշանակվող թեստերը կախված են ձեր առողջական վիճակից, ռիսկի գործոններից և առկա գանգատներից: Բժիշկը կարող է առաջարկել արյան գլյուկոզի և լիպիդների (խոլեսթերինային ֆրակցիայի) հետազոտություն, ինչպես նաև լյարդի և (կամ) վահանաձև գեղձի գործունեությունը գնհատող թեստեր:

Այս ամբողջ տեղեկատվությունը կօգնի ձեզ և բժշկին, որ միասին որոշեք, թե ինչ աստիճանի քաշի կորուստ է ձեզ անհրաժեշտ և ինչպիսի առողջական ռիսկեր կամ խնդիրներ արդեն ունեք: Այս հարցերի պատասխանը թույլ է տալիս ընտրել ձեզ համար լավագույն բուժման տարբերակը:

Հոդվածը վերանայվել է՝ 09-05-2021