Գիրություն. բուժում

Գիրություն. բուժում

Գիրությունը ոչ միայն բարձրացնում է լուրջ քրոնիկ հիվանդությունների զարգացման ռիսկը, այլև ինքնին հանդիսանում է առողջական խնդիր։

Գիրության բուժման նպատակը առողջ քաշին հասնելը և այդ քաշը պահպանելն է: Սա բարելավում է ձեր ընդհանուր առողջությունը և նվազեցնում գիրության հետ կապված բարդությունների զարգացման ռիսկը: Բուժմանը կարող են ներգրավվել տարբեր նեղ մասնագետներ, օրինակ՝ դիետոլոգ, վարքաբանական խորհրդատու կամ գիրության մասնագետ, որոնք կօգնեն սննդակարգում համապատասխան փոփոխություն կատարելու և ակտիվ ֆիզիկական ապրելակերպ զարգացնելու հարցերում:

Նախնական բուժման խնդիրը սովորաբար մարմնի քաշի չափավոր՝ ընդհանուր քաշի 5-10%-ոց նվազեցումն է: Սա նշանակում է, որ եթե ձեր մարմնի զանգվածը 91 կգ է և ՄԶԳ-ի չափմամբ համարվում եք գեր, ուրեմն կարիք ունեք կորցնելու ավելցուկային 4,5-9 կգ, որից հետո ձեր առողջական վիճակը կսկսի բարելավվել: Ընդ որում, որքան շատ հավելյալ կիլոգրամներ կորցնեք, այդքան ավելի մեծ օգուտ կստանաք:

Մարմնի քաշը նվազեցնող բոլոր ծրագրերը պահանջում են, որ փոփոխեք ձեր սնվելու սովորույթը և բարձրացնեք ֆիզիկական ակտիվությունը: Ձեր նպատակը պետք է լինի առողջ սննդակարգը և բավարար ֆիզիկական ակտիվությունը ձեր առօրյա կյանքի բաղկացուցիչ մասը դարձնելը, այլ ոչ թե արհեստականորեն և երբեմն դժկամությամբ որոշ կանոններին «ստիպված» հետևելը։

Բուժման տարբերակները կախված են ձեր գիրության աստիճանից, ընդհանուր առողջական վիճակից, ինչպես նաև ձեր ցանկությունից ու ձգտումից:

Ապրելակերպի փոփոխություններ

Գիրության բուժման համար գոյություն չունի որևէ «մոգական» միջոց։ Քաշի կարգավորումը երկարատև հետևողական գործընթաց է, որը պահանջում է համբերություն և դժվարություններին դիմակայելու կամք։

Ընդհանուր առմամբ, եթե ցանկանում եք ձերբազատվել ավելորդ կիլոգրամներից, պետք է կալորիաները կարգավորող սննդակարգը զուգակցեք կանոնավոր վարժանքների հետ։

Սննդակարգի փոփոխություններ

Ավելցուկային կիլոգրամներից ազատվելու համար մարդկանց մեծ մասը կարիք ունի կրճատելու սննդի միջոցով ընդունվող կալորիաները։ Սա երկարատև և հետևողական ուղի է, որի էությունը անառողջ սննդատեսակները առողջով փոխարինելն է, որի արդյունքում սննդակարգն ի վերջո դառնում է հնարավորինս հավասարակշռված։ Հիշեք, որ սա նաև ներառում է ալկոհոլի օգտագործման սահմանափակումը։

Իրականում գոյություն չունի լավագույն նիհարեցնող սննդակարգ: Պարզապես կատարեք այնպիսի ընտրություն, որը ներառում է առողջ սննդամթերքներ, որոնք կարծում եք, որ արդյունավետ կլինեն: Գիրությունը բուժելիս սննդակարգի փոփոխությունները կարող են ներառել՝

  • կալորիաները կրճատում (կանանց համար՝ մինչև 1200-1500 կալորիա և տղամարդկանց համար՝ մինչև 1500-1800 կալորիա)
  • քիչ կալորիաներով հագեցում (մրգերի և բանջարեղենների մեծ քանակները «լցնում են» ստամոքսը՝ պարունակելով ավելի քիչ կալորիա)
  • ավել առողջ մթերքներ ընտրում (անցում բուսական սննդամթերքներին՝ մրգեր, բանջարեղեններ և ամբողջահատիկավորներ, լոբազգիներ, ձկնեղեն, կերակրի աղի և շաքարի սահմանափակում և այլն)
  • որոշ սննդամթերքների կտրուկ սահմանափակում (ածխաջրերով կամ հագեցած ճարպերով հարուստ սննդատեսակներ, ալկոհոլ և այլն)
  • ճաշերի փոխարինում ցածր կալորիական նախաուտեստներով:

Իմացե՛ք ավելին առողջ սննդակարգի միջոցով քաշի կորստի առանձնահատկությունների մասին:

Վարժանքներ

Ֆիզիկական ակտիվությունը կարող է ներառել ոչ միայն կրկնվող և հոգնեցուցիչ վարժանքները, այլև ձեր նախընտրելի ֆիզիկական զբաղնունքները, օրինակ՝ կանոնավոր արագ քայլք, զբոսանք, լող, հեծանվավարություն և այլն։

Իմացե՛ք ավելին ֆիզիկական ակտիվացման միջոցով քաշի կորստի առանձնահատկությունների մասին:

Դեղամիջոցներ

Բժիշկը կարող է ձեզ նշանակել նիհարեցնող դեղեր, եթե սննդակարգով և վարժանքներով չի հաջողվում նվազեցնել ձեր քաշը, և դուք ունեք 30 և ավելի բարձր ՄԶԳ կամ 27-ից բարձր ՄԶԳ և գիրության որևէ բարդություն, օրինակ՝ դիաբետ, բարձր արյան ճնշում կամ քնի ապնոէ:

Կան դեղատոմսով դուրս գրվող կամ ազատ վաճառվող որոշ դեղամիջոցներ, որոնք ունեն նիհարեցնող ազդեցություն։ Դրանք կարող են ազդել տարբեր մեխանիզմներով։ Օրինակ, կան դեղամիջոցներ, որոնք ընկճում են ախորժակը և կան այլ դեղամիջոցներ, որոնք նվազեցնում են աղիներից ներծծվող ճարպերի քանակը։

ԱՄՆ-ի Դեղերի և սննդի գործակալության կողմից հաստատված նիհարեցնող դեղերից են՝

  • Օրլիստատ (Ալլի, Քսենիկալ)
  • Ֆենտերմին և Տոպիրամատ (Քսիմիա)
  • Բուպրոպիոն և Նալտրեքսոն (Կոնտրավե)
  • Լիրիգլուտիդ (Սաքսենդա, Վիկտոզա):

Նույնիսկ եթե բժիշկը խորհուրդ է տալիս ընդունել նմանատիպ դեղամիջոցներից մեկ-երկուսը, շատ կարևոր է, որ դեղաբուժումը զուգակցվի սննդակարգի առողջացման և ֆիզիկական ակտիվության բարձրացման հետ։

Նկատի ունեցեք, որ նիհարեցնող դեղամիջոցները դրսևորում են որոշ կողմնակի ազդեցություններ և չեն կարող օգտագործվել բոլոր նրանց կողմից, ովքեր ցանկանում են նիհարել։

Վիրահատություն

Գիրության վիրահատական բուժումը կամ բարիատրիկ վիրաբուժությունը կարող է օգնել ծանր ճարպակալմամբ որոշ մարդկանց, որ նրանք ստամոքսի վիրահատական ձևափոխման հաշվին կորցնեն ավելցուկային կիլոգրամներ։ Բարիատրիկ վիրահատությունը սովորաբար առաջարկվում է այն դեպքերում, երբ մարդն ունի խիստ բարձր մարմնի զանգվածի ցուցանիշ (ՄԶՑ), չի կարողանում այլ միջոցներով կարգավորել մարմնի քաշը, գիրությունն առաջացնում է սրտանոթային կամ այլ վտանգավոր խանգարումներ կամ բացասաբար է ազդում առօրյա գործառույթների վրա։

Իմացե՛ք ավելին բարիատրիկ վիրաբուժության մասին:

Հոդվածը վերանայվել է՝ 28-04-2021