Գիրություն. բուժում

Գիրություն. բուժում
Անգլերեն անվանումը՝ Obesity Treatments

Գիրությունը ոչ միայն բարձրացնում է լուրջ քրոնիկ հիվանդությունների զարգացման ռիսկը, այլև ինքնին հանդիսանում է առողջական խնդիր։

Եթե դուք ունեք գիրություն, ապա ճիշտ կլինի, որ մարմնի կարգավորման քայլերը նախապես հստակեցնեք ձեր բժշկի կամ բժիշկ-դիետոլոգի հետ։ Փորձեք նրանց հետ զրույցի ընթացքում անդրադառնալ հետևյալ հարցերին՝

  • ինչպիսի՞ սննդակարգը կարող է ձեզ համար լինել ամենահաջողը
  • ի՞նչ չափի ծանրաբեռնվածության և ի՞նչ տեսակի ֆիզիկական վարժանքները կարող են ձեզ համար լինել առավելագույնս օգտակար և անվտանգ
  • կարիք ունե՞ք արդյոք դուք անցնելու որոշ հետազոտություններ, որոնք թույլ կտան գնահատել ձեր գիրության հետ կապված առողջական խնդիրների առկայությունը և դրանց ծանրության աստիճանը
  • կարիք կա՞ արդյոք բուժելու այդ խնդիրները
  • կարիք կա՞ արդյոք բուժելու ուղեկցող հիվանդությունները (օրինակ՝ պոլիկիստոզային ձվարանային համախտանիշ):

Բժիշկը կարող է նաև ձեզ ուղեգրել այլ մասնագետների խորհրդատվության (օրինակ՝ հոգեբան, հոգեթերապևտ կամ դիետոլոգ):

Ապրելակերպի փոփոխություններ

Գիրության բուժման համար գոյություն չունի որևէ «մոգական» միջոց։ Մարմնի կշռի կարգավորումը երկարատև գործընթաց է, որը պահանջում է նվիրվածություն և դժվարություններին դիմակայելու կամք։

Եթե ցանկանում եք ձերբազատվել ավելորդ կիլոգրամներից, ապա դուք պետք է զուգակցեք կիլոկալորիաները կարգավորող սննդակարգը կանոնավոր վարժանքների հետ։

Վարժանքներ

Մարմնի կշռի կարգավորումը անշուշտ բերում է առողջական կարևոր օգուտների։ Ձեր նպատակը պետք է լինի առողջ սննդակարգը և ֆիզիկական բավարար ակտիվությունը ձեր առօրյա կյանքի բաղկացուցիչ մասը դարձնելը, այլ ոչ թե արհեստականորեն և երբեմն դժկամությամբ որոշ կանոններին «ստիպված» հետևելը։ Ֆիզիկական ակտիվությունը կարող է կազմված լինել ոչ միայն կրկնվող և հոգնեցուցիչ վարժանքներից, այլև կանոնավոր արագ քայլքից, զբոսանքից, լողից, հեծանվավարությունից և այլ ակտիվ զբաղմունքներից։

Սննդակարգ

Հավելյալ կիլոգրամներից ազատվելու համար մարդկանց մեծ մասը կարիք ունի կրճատելու սննդի միջոցով ընդունվող կալորիաները։ Սա երկարատև և համբերություն պահանջող ճանապարհ է, որի էությունը անառողջ սննդատեսակները առողջով փոխարինելն է, որի արդյունքում սննդակարգն ի վերջո դառնում է առավելագույնս հավասարակշռված։ Հիշեք, որ սա ներառում է նաև ալկոհոլի օգտագործման սահմանափակումը։

Դեղեր

Կան դեղատոմսով դուրս գրվող կամ ազատ վաճառվող որոշ դեղեր, որոնք ունեն նիհարեցնող ազդեցություն։ Դրանք կարող են ազդել տարբեր մեխանիզմներով։ Օրինակ, կան դեղեր, որոնք ընկճում են ախորժակը և կան հաբեր, որոնք կրճատում են մարսողության ընթացքում ներծծվող ճարպերի քանակը։

Նույնիսկ եթե բժիշկը ձեզ խորհուրդ է տալիս ընդունել նմանատիպ դեղերից մեկ-երկուսը, ապա շատ կարևոր է, որ դեղաբուժումը զուգակցվի սննդակարգի առողջացման և ֆիզիկական ակտիվությունը բարձրացնելու հետ։

Պետք է նաև հիշել, որ նիհարեցնող դեղերը դրսևորում են որոշ կողմնակի ազդեցություններ և չեն կարող օգտագործվել բոլոր նրանց կողմից, ովքեր ցանկանում են նիհարել։

Վիրահատություն

Գիրության վիրահատական բուժումը կամ բարիատրիկ վիրաբուժությունը կարող է օգնել ծանր ճարպակալմամբ որոշ մարդկանց, որ նրանք ստամոքսի վիրահատական ձևափոխման հաշվին կորցնեն հավելյալ կիլոգրամներ։ Բարիատրիկ վիրահատությունը սովորաբար առաջարկվում է այն դեպքերում, երբ մարդն ունի խիստ բարձր մարմնի կշռի ցուցանիշ (ՄԶՑ), չի կարողանում այլ միջոցներով կարգավորել մարմնի զանգվածը, գիրությունը առաջացնում է սրտանոթային կամ այլ վտանգավոր շեղումներ կամ կտրուկ խանգարում է առօրյա գործառույթներին։

Հոդվածը վերանայվել է՝ 26-05-2019