Գիրություն

Գիրություն
ՀՄԴ-10 ծածկագիր E66. Ճարպակալում

Գիրությունը տերմին է, որը կիրառվում է նկարագրելու ինչ-որ մեկին, ով ունի մարմնի ճարպերի բարձր աստիճան։

Ելնելով վերջին բնորոշումից, «գիրության» փոխարեն նաև օգտագործվում է «ճարպակալում» հասկացությունը։

Քիչ չափով ավելցուկային քաշը թերևս չի բերի առողջական խնդիրների, սակայն հավելյալ մի քանի կիլոգրամները կարող են առաջացնել ձեր առօրյան խաթարող հետևանքներ։

Որևէ անհատի մարմնի զանգվածի գնահատման ամենատարածված մեթոդը նրա մարմնի զանգվածի գործակիցը (ՄԶԳ, անգլերեն՝ BMI) հաշվարկելն է՝ որպես մարմնի զանգվածի (կիլոգրամներով) և հասակի (մետրով) քառակուսու հարաբերություն։

Եթե ձեր ՄԶԳ-ը՝

  • 25-ից մինչև 29 է, ուրեմն ունեք մարմնի ավելցուկային քաշ
  • 30-ից 40 է, ուրեմն ունեք գիրություն
  • 40 է կամ ավելի բարձր է, ուրեմն խիստ գեր եք։

Մեկ այլ օգտակար մեթոդ է մարմնի իրանի՝ կոնքից վերև շրջնագծի չափումը։ Եթե տղամարդկանց մոտ այս չափը գերազանցում է 94 սմ-ը, իսկ կանանց մոտ՝ 80 սմ-ը, ապա առկա է գիրության հետ կապված առողջական խնդիրների զարգացման բարձր ռիսկ։ Այս անձինք ավելի մեծ հավանականությամբ կհիվանդանան 2-րդ տիպի դիաբետով, սրտանոթային հիվանդություններով և քաղցկեղի որոշ տեսակներով, քան նորմալ («առողջ») մարմնի զանգված ունեցողները։

Գեր երեխաները բարձր տարիքում մեծ հավանականությամբ կարող են պահպանել իրենց մարմնի ավելցուկային քաշը, ուստի շատ կարևոր է, որ ծնողները երեխաների դեռևս մանկական տարիքում դառնան ճիշտ՝ առողջ ապրելակերպով ապրող մարդու դրական օրինակ։

Եթե կարծում եք, որ ունեք մարմնի ավելորդ կշիռ կամ գեր եք

Եթե դուք ունեք ավելցուկային քաշ կամ գեր եք, այցելեք ձեր բժշկին, որ պարզեք, թե առողջական ինչպիսի խնդիրների ռիսկ եք կրում և ինչպես անվտանգ եղանակով կարելի է ձերբազատվել հավելյալ կիլոգրամներից։

Բժշկի հետ ձեր զրույցը կարող է ներառել հետևյալը.

  • գիրության ամենահավանական պատճառներ. օրինակ, ընդունո՞ւմ եք որոշ դեղեր կամ ունե՞ք արդյոք մարմնի քաշի ավելացման բերող առողջական խնդիրներ
  • ապրելակերպ, մասնավորապես՝ սննդակարգ, ֆիզիկական ակտիվության աստիճան, ինչպես նաև ծխախոտի օգտագործում, ալկոհոլային խմիչքների օգտագործման բնույթ և այլն
  • ինչպե՞ս եք վերաբերվում ձեր գիրությանը, օրինակ, արդյոք դա վհատեցնո՞ւմ է ձեզ և բերո՞ւմ է դեպրեսիայի
  • ի՞նչ չափով եք մոտիվացված՝ ազատվելու ձեր մարմնի հավելյալ կիլոգրամներից
  • գիրության և այլ վիճակների առումով ձեր ընտանեկան անամնեզ (օրինակ՝ դիաբետի պատմությունը)։

Իհարկե, ձեր բժիշկը կհաշվարկի ձեր ՄԶՑ-ը, կչափի ձեր զարկերակային ճնշումը, ձեր իրանի շրջանագիծը և ամենայն հավանականությամբ կնշանակի արյան մեջ գլյուկոզի և լիպիդների (խոլեսթերին) մակարդակների չափման լաբորատոր հետազոտություններ։

Հոդվածը վերանայվել է՝ 01-05-2021