Ուշ փուլերում և տարածվող ենթաստամոքսային գեղձի կամ պանկրեատիկ քաղցկեղը կարող է առաջացնել տարբեր բարդություններ:
- Քաշի կորուստ. ենթաստամոքսային գեղձի քաղցկեղով մարդկանց շրջանում մի շարք գործոններ կարող են առաջացնել մարմնի քաշի կորուստ: Քաշի կորուստը կարող է կապված լինել նրա հետ, որ քաղցկեղը սպառում է օրգանիզմի էներգիան: Քաղցկեղի բուժման հետևանքով առաջացած սրտխառնոցն ու փսխումը կամ ստամոքսը ֆիզիկապես ճնշող ուռուցքը կարող է դժվարացնել սննդի ընդունումը: Կամ ձեր օրգանիզմը կարող է դժվարությամբ յուրացնել սննդանյութերը, քանի որ ձեր ենթաստամոքսային գեղձը բավարար քանակությամբ մարսողական հյութեր չի արտադրում:
- Դեղնուկ. ենթաստամոքսային գեղձի քաղցկեղը, որը փակում է լեղածորանը, կարող է դեղնուկի պատճառ դառնալ: Ախտանիշներից են դեղին մաշկը և աչքերի սկլերան, մգացած մեզը և գունզրկված կղանքը: Դեղնուկը սովորաբար առաջանում է առանց որովայնի ցավի: Ձեր բժիշկը կարող է խորհուրդ տալ, որ պլաստմասե կամ մետաղական խողովակ (ստենտ) տեղադրվի լեղուղու լուսանցքի մեջ՝ այն բաց պահելու համար: Դա արվում է էնդոսկոպիկ ռետրոգրադ խոլանգիոպանկրեատոգրաֆիա (ԷՌԽՊ, ERCP) կոչվող միջամտությամբ: ԷՌԽՊ-ի ժամանակ էնդոսկոպն անցնում է ձեր կոկորդով, ստամոքսի միջով դեպի բարակ աղու վերին հատված՝ տասներկումատնյա աղի: Այնուհետև գունանյութ (կոնտրաստ) է ներարկվում ենթաստամոքսային գեղձի և լեղուղիների մեջ բարակ խողովակի (կաթետերի) միջոցով, որն անցկացվում է էնդոսկոպի միջով: Վերջում, կատարվում է ծորանների պատկերային հետազոտություն:
- Ցավ. աճող կամ մեծացող ուռուցքը կարող է ճնշել որովայնի նյարդերը՝ առաջացնելով ցավ, որոշ դեպքերում՝ բավականին ուժեղ: Ցավազրկող դեղամիջոցները կարող են օգնել, որ ավելի հարմարավետ զգաք: Բուժումները, ինչպիսիք են ճառագայթումը և քիմիոթերապիան, կարող են օգնել ուռուցքի աճի դանդաղեցմանը և ցավերի որոշակի մեղմացմանը: Ծանր դեպքերում, ձեր բժիշկը կարող է խորհուրդ տալ ալկոհոլի ներարկում այն նյարդերի մեջ, որոնք վերահսկում են որովայնի ցավը (պարանոցային հյուսակի բլոկադա): Այս միջամտությունն արգելափակում է նյարդերից դեպի գլխուղեղ հաղորդվող ցավային ազդանշանները:
- Աղիների խցանում (անանցանելիություն). ենթաստամոքսային գեղձի քաղցկեղը, որն աճում կամ ճնշում է բարակ աղու սկզբնական հատվածի՝ տասներկումատնյա աղու վրա, կարող է խոչընդոտել սննդախյուսի հոսքը դեպի աղիներ: Ձեր բժիշկը կարող է խորհուրդ տալ, որ ձեր բարակ աղիքում տեղադրվի խողովակ (ստենտ)՝ այն բաց պահելու համար: Որոշ իրավիճակներում կարող է օգնել վիրահատությունը, երբ տեղադրվում է սնուցման ժամանակավոր խողովակ կամ ստամոքսը կցվում է աղիների այն ստորին կետին, որը խցանված չէ քաղցկեղով:
Հոդվածը հրապարակվել է՝ 07-06-2021
Վերջին վերանայում՝ 23-04-2024