Ախտորոշում - Պանկրեատիկ քաղցկեղ

Եթե բժիշկը ձեզ մոտ կասկածում է ենթաստամոքսային գեղձի կամ պանկրեատիկ քաղցկեղ, կարող է ձեզ առաջարկել հետևյալ հետազոտություններից մեկը կամ մի քանիսը:

• Պատկերային հետազոտություններ. այս հետազոտություններն օգնում են ձեր բժիշկներին դիտել ձեր ներքին օրգանները, ներառյալ՝ ենթաստամոքսային գեղձը: Ենթաստամոքսային գեղձի քաղցկեղի ախտորոշման համար օգտագործվող մեթոդներից են գերձայնային հետազոտությունը (սոնոգրաֆիա), համակարգչային տոմոգրաֆիկ (ԿՏ) սքանավորումը, մագնիսա-ռեզոնանսային տոմոգրաֆիան (ՄՌՏ) և, երբեմն, պոզիտրոնային էմիսիոն տոմոգրաֆիան (ՊԷՏ):
• Էնդոսկոպիկ գերձայնային հետազոտություն (էնդոսկոպիկ սոնոգրաֆիա). էնդոսկոպիկ գերձայնը (ԷԳՁ, EUS) օգտագործում է գերձայնային տվիչ՝ ձեր ենթաստամոքսային գեղձի պատկերները որովայնի ներսից ստանալու համար: Տվիչը բարակ, ճկուն խողովակի միջով (էնդոսկոպ) ձեր կերակրափողով անցկացվում է դեպի ստամոքս:
• Լաբորատոր թեստի համար հյուսվածքային նմուշի հեռացում (բիոպսիա). բիոպսիան միջամտություն է, որի ժամանակ մանրադիտակային հետազոտության համար նմուշառվում է հյուսվածքային փոքր նմուշ: Առավել հաճախ հյուսվածքը նմուշառվում է էնդոսկոպիկ գերձայնային միջոցառման ընթացքում՝ էնդոսկոպի խողովակով ներմուծված հատուկ գործիքով: Բիոպսիայի ամենահազվադեպ կիրառվող տարբերակը բարակ ասեղային ասպիրացիան է, երբ բժիշկը որովայնի պատով ասեղը մտցնում է մինչև ենթաստամոքսային գեղձ և ներարկիչով ետ քաշում հյուսվածքային նմուշ:
• Արյան թեստեր. բժիշկը կարող է ստուգել ձեր արյունը ենթաստամոքսային գեղձի քաղցկեղի բջիջների կողմից արտազատվող հատուկ սպիտակուցների (ուռուցքային մարկերների) ստուգման համար: Ենթաստամոքսային գեղձի քաղցկեղի ախտորոշման և վերահսկման համար օգտագործվող ուռուցքային մարկերի թեստը կոչվում է CA19-9: Դա կարող է օգտակար լինել՝ հասկանալու, թե քաղցկեղն ինչպես է արձագանքում բուժմանը: Սակայն թեստը միշտ չէ, որ վստահելի է, քանի որ ենթաստամոքսային գեղձի քաղցկեղով հիվանդ որոշ մարդկանց մոտ CA19-9-ի մակարդակը բարձրացած չէ, ինչը թեստը դարձնում է նվազ օգտակար:

Եթե բժիշկը հաստատել է ձեզ մոտ ենթաստամոքսային գեղձի քաղցկեղի ախտորոշումը, ապա կփորձի որոշել քաղցկեղի աստիճանը (փուլը): Օգտագործելով պատկերային հետազոտություններից ստացված տեղեկությունները, ձեր բժիշկը կսահմանի ենթաստամոքսային գեղձի քաղցկեղի փուլերից մեկը, որն օգնում է որոշելու, թե որ բուժումներն են, որ կարող են առավել հավանական օգուտ բերել ձեզ:

Ենթաստամոքսային գեղձի քաղցկեղի փուլերը նշվում են հռոմեական թվանշաններով՝ 0-ից մինչև IV: Ամենացածր փուլերը ցույց են տալիս, որ քաղցկեղը դեռևս մնում է ենթաստամոքսային գեղձի սահմաններում: IV փուլը նշանակում է, որ քաղցկեղը տարածվել է մարմնի այլ շրջաններ (հեռավոր մետաստազներ):

Քաղցկեղի փուլավորման համակարգը շարունակում է զարգանալ և ավելի բարդ է դառնում, քանի որ քաղցկեղի ախտորոշման և բուժման մեթոդները մշտապես բարելավվում են:

Հարցրեք ձեր բժշկին ենթաստամոքսային գեղձի քաղցկեղի ախտորոշման իր փորձի մասին: Եթե կասկածներ ունեք, դիմեք այլ բժշկի՝ երկրորդ կարծիք ստանալու համար։