Գրադարան

Ծայրամասային նեյրոպաթիա․ ախտանիշներ

Ծայրամասային նեյրոպաթիա․ ախտանիշներ

Time Read 2 րոպե

Ծայրամասային (պերիֆերիկ) համակարգի յուրաքանչյուր նյարդ ունի որոշակի առանձնահատուկ գործառույթ:

Ուստի, ախտանիշները կախված են ախտահարված նյարդերի տեսակից: Նյարդերը բաժանվում են հետևյալ տեսակների՝

  • զգացողական (սենսոր) նյարդեր, որոնք մաշկից և այլ օրգաններից ստանում են զգացողություններ, ինչպիսիք են ջերմաստիճանը, ցավը, տատանումը (վիբրացիա) կամ հպումը (դիպչելը)
  • շարժիչ (մոտոր) նյարդեր, որոնք հսկում են մկանային շարժումները
  • ավտոնոմ (վեգետատիվ) նյարդեր, որոնք հսկում են տարբեր գործառույթներ, ինչպիսիք են արյան ճնշումը, քրտնարտադրությունը, սրտի ռիթմը, մարսողությունը և միզապարկի գործունեությունը:

Ծայրամասային նեյրոպաթիայի ախտանիշները կարող են ներառել հետևյալը՝

  • ձեր դաստակների կամ ոտնաթաթերի աստիճանաբար սկսվող թմրածություն, ծակծկոցներ կամ ծակոցներ
  • սուր, ծակող, բաբախող (պուլսացվող) կամ այրող ցավ
  • հպման նկատմամբ խիստ զգայունություն (գերզգայունություն)
  • ցավ այնպիսի գործողությունների ժամանակ, որոնք չպետք է ցավ պատճառեին, օրինակ՝ ոտքերի ցավ, երբ դրանք քիչ լարվում են կամ նույնիսկ, երբ ենթարկվում են վերմակի ծանրության ազդեցությանը
  • հավասարակշռության և կորդինացիայի խախտումներ և վայր ընկնելը
  • մկանային թուլություն
  • այնպիսի զգացողություն, որ կարծես ձեռնոց կամ գուլպա եք կրում
  • շարժում կատարելու անկարողություն, եթե ախտահարվել են շարժիչ նյարդերը:

Եթե ախտահարվում են ավտոնոմ նյարդերը, ախտանիշները կարող են ներառել հետևյալը՝

  • ջերմության (տաք միջավայրի) անտանելիություն կամ անհանդուրժողականություն
  • առատ քրտնարտադրություն կամ հակառակը՝ քրտնելու անկարողություն
  • աղիների, միզապարկի գործունեության կամ մարսողական խնդիրներ
  • արյան ճնշման կտրուկ անկում, որն առաջացնում է գլխապտույտ կամ ուշագնացության զգացում:

Ծայրամասային նեյրոպաթիան կարող է ներառել մեկ նյարդը, որը կոչվում է մոնոնեյրոպաթիա: Եթե այն ազդում է տարբեր շրջանների երկու կամ ավելի շատ նյարդերի վրա, կոչվում է բազմակի մոնոնեյրոպաթիա, իսկ եթե ազդում է բազմաթիվ նյարդերի վրա, կոչվում է պոլինեյրոպաթիա: Կարպալ թունելի համախտանիշը մոնոնեյրոպաթիայի մի օրինակ է: Այնուամենայնիվ, ծայրամասային նեյրոպաթիայով մարդկանց մեծ մասն ունի պոլինեյրոպաթիա:

Ե՞րբ դիմել բժշկին

Անմիջապես դիմեք բժշկական օգնության, եթե նկատում եք անսովոր ծակծկոցներ, թուլություն կամ ցավ ձեր դաստակներում կամ ոտնաթաթերում: Վաղ ախտորոշումը և բուժումը ձեզ լավագույն հնարավորությունն են տալիս, որ վերահսկեք ձեր ախտանիշները և կանխեք ծայրամասային նյարդերի հետագա վնասումը:

Հոդվածը տեղադրվել է՝ 18-12-2023 վերանայվել է՝ 18-12-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով