Բուժում - Պերիֆերիկ նեյրոպաթիա

Ծայրամասային կամ պերիֆերիկ նեյրոպաթիայի բուժման նպատակներն են ձեր նեյրոպաթիայի պատճառ հանդիսացող վիճակի վերահսկումը և ախտանիշների բարելավումը:

Եթե ձեր լաբորատոր և այլ հետազոտությունները չեն հայտնաբերում նեյրոպաթիայի հնարավոր որևէ պատճառ, ձեր բժիշկը կարող է խորհուրդ տալ, որ ուշադիր սպասեք՝ տեսնելու, թե արդյոք ժամանակի ընթացքում ձեր նեյրոպաթիան մնում է նույնը, վատթարանում կամ ինքնուրույն բարելավվում է:

Դեղորայքային բուժում

Բժիշկը կարող է նշանակել որոշակի դեղամիջոցներ ծայրամասային նեյրոպաթիայի հետ կապված վիճակների բուժման համար: Կան նաև դեղամիջոցներ, որոնք օգտագործվում են ծայրամասային նեյրոպաթիայի ախտանիշները, հատկապես ցավը բարելավելու համար:

• Ցավազրկողներ. սովորական ցավազրկողները, ինչպիսիք են ոչ ստերոիդ հակաբորբոքային դեղամիջոցները, կարող են բարելավել թեթև ախտանիշները:
• Հակացնցումային դեղամիջոցներ (անտիկոնվուլսանտներ). Գաբապենտինը (Գրալիսե, Նեյրոնտին, Հորիզանտ) և Պրեգաբալինը (Լիրիկա), որոնք ստեղծվել են էպիլեպսիայի բուժման համար, հաճախ բարելավում են նեյրոպաթիկ ցավը: Կողմնակի ազդեցություններից են քնկոտությունը և գլխապտույտը:
• Տեղական բուժումներ. Լիդոկաինի նրբաքսուքով (կրեմ) կարելի է օծել մաշկի ցավոտ շրջանները: Լիդոկաինի սպեղանին մեկ այլ միջոց է, որը փակցնում եք մաշկին՝ ցավը մեղմացնելու համար: Կողմնակի ազդեցություններից են քնկոտությունը, գլխապտույտը և տվյալ շրջանի թմրածությունը:
• Հակադեպրեսանտներ (անտիդեպրեսանտներ). որոշ տրիցիկլիկ հակադեպրեսանտներ, ինչպիսիք են Ամիտրիպտիլինը և Նորտրիպտիլինը (Պամելոր), կարող են օգնել նեյրոպաթիկ ցավի մեղմացմանը: Այս դեղամիջոցներն ազդում են գլխուղեղի և ողնուղեղի այն քիմիական գործընթացների վրա, որոնք ձեզ մասնակցում են ցավի ընկալմանը: Սերոտոնինի և նորէպինեֆրինի ետադարձ զավթման արգելակիչ հանդիսացող Դուլոքսետինը (Ցիմբալտա) և երկարաժամկետ արձակման հակադեպրեսանտներից Վենլաֆաքսինը (Էֆֆաքսոր XR) և Դեսվենլաֆաքսինը (Պրիստիք) նույնպես կարող են բարելավել ծայրամասային նեյրոպաթիկ ցավը, որն առաջանում է շաքարային դիաբետի պատճառով: Հակադեպրեսանտների կողմնակի ազդեցություններից են բերանի չորությունը, սրտխառնոցը, քնկոտությունը, գլխապտույտը, ախորժակի փոփոխությունը, քաշի ավելացումը և փորկապությունը:

Ոչ դեղորայքային բուժումներ (թերապիաներ)

Տարբեր թերապիաներ, միջոցառումներ կամ միջամտություններ կարող են օգնել ծայրամասային նեյրոպաթիայի ախտանիշների բարելավմանը:

• Սկրեմբլեր-թերապիա. այս բուժումն օգտագործում է էլեկտրական ազդանշաններ՝ գլխուղեղին ոչ ցավային հաղորդագրություններ ուղարկելու համար: Վերջիններս փոխարինում են ցավային հաղորդագրություններին, որոնք գլխուղեղ ուղարկվում են ցավազգաց նյարդերի միջոցով: Բուժման նպատակն է «շեղել» գլխուղեղը ցավային զգացողություններից:
• Ողնուղեղի խթանում (ստիմուլյացիա). թերապիայի այս տեսակն ազդում է մարմնի մեջ դրված սարքերի միջոցով, որոնք կոչվում են նեյրոստիմուլյատորներ: Դրանք ցածր մակարդակի էլեկտրական ազդանշաններ են ուղարկում, որոնք կարող են արգելափակել ցավի ազդանշանների փոխանցումը դեպի գլխուղեղ:
• Արյան պլազմայի փոխարինում, ստերոիդներ և ներերակային իմունագլոբուլին. այս բուժումները հաճախ նշանակվում են, եթե նեյրոպաթիայի պատճառը բորբոքումը կամ աուտոիմուն խանգարումներն են, որոնք առաջացնում են մկանային թուլություն, թմրածություն կամ հավասարակշռության խանգարումներ: Դրանք չեն օգտագործվում բուն ցավը բուժելու համար:
• Ֆիզիոթերապիա. եթե ունեք մկանային թուլություն կամ հավասարակշռության հետ կապված խնդիրներ, ֆիզիոթերապիան կարող է օգնել բարելավել ձեր շարժվելու ունակությունը: Ձեզ նաև կարող են անհրաժեշտ լինել ձեռքերի կամ ոտքերի բրեկետներ, ձեռնափայտ, քայլակ կամ անվասայլակ:
• Վիրահատություն. նյարդերի վրա ճնշումից առաջացած նեյրոպաթիաները, օրինակ՝ ուռուցքներից, կարող են պահանջել վիրահատություն: