Գրադարան

37-ից մինչև 40 շաբաթական հղիություն

37-ից մինչև 40 շաբաթական հղիություն

Time Read 3 րոպե

Մինչև ծննվելը ձեր երեխայի գլուխը պետք է շարժվի ներքև՝ դեպի ձեր կոնք. սա նախանշում է ծննդաբերության սկիզբը, որին պետք է հաջորդեն կանոնավոր երկունքի ցավերը:

Ձեր երեխան

37-րդ շաբաթվա սկզբին ձեր հղիությունը կարող է համարվել ժամկետային:

Երեխայի աղիներն այժմ պարունակում է մեկոնիում (առաջնային կղանք)՝ կպչուն կանաչ նյութ, որը ձևավորելու է ձեր նորածնի՝ ծնվելուց հետո առաջին կղանքը: Մեկոնիումը կարող է պարունակել հղիության ավելի վաղ փուլերում երեխայի մարմինը ծածկող սաղմնային աղվամազեր: Եթե երեխան կղկղում է ծննդաբերության ընթացքում (որը երբեմն կարող է տեղի ունենալ), ապա պտղաջրերը կարող են պարունակել մեկոնիում: Նման դեպքում բուժքուրը կարող է ցանկանալ ավելի մանրակրկիտ կերպով վերահսկել ձեր նորածնին, ով կարող է լինել սթրեսի ենթարկված:

Վերջին ամիսներին, մինչև ծնվելը, երեխայի գլուխը շարժվում է ներքև՝ դեպի ձեր կոնքամուտք: Երբ երեխայի գլուխը հասնում է կոնքամուտք և հպվում կամ ֆիքսվում է այնտեղ, ձեր արգանդի հատակն իջնում է և դուք որոշ թեթևություն եք զգում: Ձեր ներքին օրգանների ճնշվածությունը թուլանում է, իսկ շնչելը՝ հեշտանում: Երբեմն երեխայի գլուխը կարող է իջնել ներքև միայն ծննդաբերության սկզբում:

Երեխայի քաշն այժմ 3-4 կիլոգրամ է:

Երեխայի մաշկը ծածկող աղվամազը գրեթե անհետացել է, թեև որոշ դեպքերում կարող են մնալ դրանց փոքր դաշտեր: Ձեր հորմոնների պատճառով երեխայի սեռական օրգանները ծնվելուց ունեն քիչ այտուցված տեսք, որոնք շատ չանցած վերականգնում են իրենց նորմալ ձևը:

Ձեր երեխան պատրաստ է ծնվելուն, և դուք կհանդիպեք նրան մոտակա մի քանի շաբաթվա մեջ:

Դուք

Երբ դուք մոտ 37 շաբաթական հղի եք և սա ձեր առաջին հղիությունն է, արգանդում երեխայի դեպի ներքև տեղաշարժումը դուք կզգաք որպես ձեր շնչառության թեթևացում, սակայն որովայնի ստորին հատվածում ճնշման ուժգնացում: Եթե սա ձեր առաջին հղիությունը չէ, ապա երեխան կարող է ներքև շարժվել միայն ծննդաբերության ժամանակ:

Կանանց մեծ մասի մոտ ծննդաբերությունը սկսկվում է 38-42 շաբաթական հղիության ընթացքում: Ձեր բժիշկը կբացատրի, թե ինչ հնարավոր մոտեցումն կան, եթե դուք անցնու է 41 շաբաթական հղիությունը:

Իմացե՛ք ավելին ժամկետանց հղիության մասին:

Նախապատրաստվեք ծննդաբերությանը

  • Ի՞նչ է տեղի ունենում ծննդաբերության ընթացքում. իմացեք այն նշանները, որոնք հուշում են ծննդաբերության մոտալուտ սկվելու մասին և նախապես ծանոթացեք, թե ինչ է տեղի ունենում ծննդաբերության երեք փուլերից յուրաքանչյուրի ժամանակ:
  • Ծննդաբերության ցավազրկում. նախապատրաստվեք՝ տեղեկանալով ծննդաբերության ընթացքը ծավազրկող բոլոր միջոցների մասին, որպեսզի կայացնեք ճիշտ որոշում:

Պատրաստ եղեք ծննդաբերությունը

  • Ե՞րբ գնալ ծննդատուն և ի՞նչ ակնկալել այնտեղ. ձեր բժշկից տեղեկացեք այն մասին, թե ո՞ր կծկանքների դեպքում է պետք գնալ ծննդատուն և ի՞նչ է ձեռնարկելու բուժանձնակազմն այնտեղ:
  • Ի՞նչ վերցնել ծննդատուն գնալիս. ձեր բժշկից տեղեկացեք այն մասին, թե ինչ պետք է ձեզ հետ տանել ծննդատուն՝ ինչպես ձեզ համար, այնպես էլ ձեր նորածնի համար:

Հարցեր, որոնց շուրջ արժի խորհել

  • Հետույքային առաջադրություն. սա մի վիճակ է, երբ առաջինը ծնվում է երեխայի հետույքը: Հետույքային առաջադրությունը կապված է ավելի շատ բարդությունների հետ, քան գլխային առաջադրությունը:
  • Կեսարյան հատում. սա վիրահատության միջոցով երեխայի ծնվելն է, երբ ցուցումների առկայության և հակացուցումների բացակայության պայմաններում դուք պետք է շրջանցեք բնական՝ հեշտոցային ծննդաբերությունը:
  • Ինդուկցիա. սա բժշկական միջոցառումների խումբ է, որի նպատակը ծննդաբերությունը խթանելը և արհեստականորեն սկսելն է:

Եթե ձեր երեխան ծնվում է շատ շուտ

  • Եթե ծննդաբերությունը սկսվում է շուտ՝ մինչև 37-րդ շաբաթական հղիությունը, ապա այն համարվում է վաղաժամ:
  • Եթե ձեր երեխան ծվում է շուտ, ապա ամենայն հավանականությամբ նա հատուկ խնամքի և հսկողության կարիք ունի:

Հոդվածը տեղադրվել է՝ 22-05-2020 վերանայվել է՝ 12-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով