Գրադարան

Թոքային էմբոլիա․ բուժում

Թոքային էմբոլիա․ բուժում

Time Read 2 րոպե

Թոքային էմբոլիայի կամ թոքային զարկերակների թրոմբոէմբոլիայի (ԹԶԹԷ) բուժումը կենտրոնանում է արյան մակարդուկի (թրոմբի) մեծացման և նոր մակարդուկների (թրոմբների) առաջացման կանխարգելման վրա:

Ծանր բարդություններից կամ մահվան ելքից խուսափելու համար անհրաժեշտ է հնարավորինս արագ նախաձեռնել բուժումը:

Բուժումը կարող է ներառել դեղամիջոցներ, վիրահատություններ և այլ միջամտություններ, ինչպես նաև շարունակական հսկողություն ու բուժում:

Դեղորայքային բուժում

Թոքային էմբոլիայի բուժման մեջ սովորաբար նշանակվում են արյունը նոսրացնող և մակարդուկները տարալուծող բազմաթիվ տեսակի դեղամիջոցներ:

  • Արյունը նոսրացնողներ կամ հակամակարդիչներ (անտիկոագուլյանտներ)․ արյունը ջրիկացնող այս դեղամիջոցները կանխում են գոյություն ունեցող մակարդուկների (թրոմբների) մեծացումը և նոր մակարդուկների ձևավորումը՝ քանի դեռ ձեր օրգանիզմը պայքարում է դրանք տարալուծելու ուղղությամբ: Հեպարինը հաճախ օգտագործվող հակամակարդիչ է, որը կարող է տրվել երակով կամ ներարկվել մաշկի տակ: Այն արագ է ազդում և հաճախ տրվում է բերանային (օրալ) հակամակարդիչների հետ միասին, ինչպիսին է Վարֆարինը (Յանտովին)՝ մինչև որ բերանային դեղամիջոցն ազդի (որը կարող է ձգվել մի քանի օր): Նոր բերանային (օրալ) հակամակարդիչներն ավելի արագ են ազդում և ավելի քիչ փոխազդեցություններ են դրսևորում այլ դեղամիջոցների հետ: Այնուամենայնիվ, բոլոր հակամակարդիչ դեղամիջոցներն էլ ունեն կողմնակի ազդեցություններ, որոնցից ամենատարածվածը արյունահոսությունն է (այդ թվում՝ ներքին):
  • Մակարդուկը (թրոմբը) տարալուծողներ․ թեև մակարդուկները (թրոմբները) սովորաբար ինքնուրույն քայքայվում են, որոշ իրավիճակներում նշանակված թրոմբոլիտիկները կարող են արագ տարալուծել խոշոր արյունատար անոթը խցանող մակարդուկները: Թրոմբը քայքայող այս դեղամիջոցները կարող են առաջացնել հանկարծակի և ծանր արյունահոսություն, ուստի դրանք սովորաբար վերապահված են կյանքին սպառնացող իրավիճակների համար:

Վիրահատական և այլ միջամտություններ

  • Մակարդուկի (թրոմբի) հեռացում․ եթե ձեր թոքերում առկա է մեծ, կյանքին սպառնացող արյան մակարդուկ (թրոմբ), ձեր բժիշկը կարող է հեռացնել այն՝ օգտագործելով ձեր տվյալ անոթի մեջ անցկացվող բարակ, ճկուն կաթետեր:
  • Երակային ֆիլտր․ կաթետերը նաև կարող է օգտագործվել օրգանիզմի հիմնական երակում՝ ստորին սիներակում հատուկ զտիչ՝ ֆիլտր տեղադրելու համար: Ստորին սիներակով ձեր ոտքերից արյունը լցվում է դեպի ձեր սրտի աջ կեսը, ուստի ֆիլտրը կարող է օգնել, որ մակարդուկները մուտք չգործեն ձեր թոքերի անոթներ: Այս միջամտությունը սովորաբար նշանակվում է միայն այն մարդկանց, ովքեր չեն կարող ընդունել հակամակարդիչ դեղամիջոցներ կամ ովքեր արյան մակարդուկներ են ունենում նույնիսկ հակամակարդիչների օգտագործման դեպքում: Որոշ ֆիլտրներ կարող են հեռացվել, երբ դրանց կարիքն այլևս չկա:

Շարունակական բուժում

Դուք կարող եք լինել մեկ այլ խորանիստ երակային թրոմբոզի (ԽԷԹ) կամ թոքային էմբոլիայի ռիսկի տակ, ուստի կարևոր է շարունակել բուժումը, օրինակ` օգտագործել հակամակարդիչներ՝ նոր մակարդուկների ձևավորման կանխարգելմանն օգնելու համար: Նման դեպքերում շատ կարևոր է կանոնավոր կերպով ձեր բժշկին այցելելը՝ բարդությունները կանխելու կամ բուժման մեջ փոփոխություններ կատարելու համար:

Հոդվածը տեղադրվել է՝ 27-12-2023 վերանայվել է՝ 05-01-2024

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով